漫遊毒物

人人都係哈利波特　 AR互動魔法學園

2012年12月26日 ~~ 第292期 Face

《哈利波特》作者 J.K.羅琳新作告別魔法，熱賣神話即時破滅。果然，生活緊張呆板嘅麻瓜，都需要一個充滿想像力同魔法嘅空間去 relax自己。
原來喺迫滿人嘅旺角行人區，正隱藏住一間叫「魔法學園 Cafe Maidjikku」嘅魔法主題樓上 cafe，女僕改穿魔女斗篷，化身魔法學徒，陪你暫避繁囂發個魔法夢。《 Face》就帶埋 J.K.羅琳為 PS3監修嘅互動電子書遊戲《 Pottermore： Book of Spells》上去開堂魔法考試，以 move體感棒化為魔法棒，考吓班魔法使修為有幾高！

互動片段

魔女試玩

魔法少女麥兄

由 F.1開始追《哈利波特》，開佢任何波特咒語都難佢唔到，最近仲一個女仔孭背囊遊英國哈利波特城。

冷笑話小松鼠 Kasumi

其實隻 game就只係單打，自言講笑話比打機在行嘅 Kasumi，喜歡講爛 gag、扮「好假的肥仔」，話佢只係陪影相同埋幫手打氣。每個哈利波特身邊，都應該有個開心果老友榮恩。

《 Pottermore： Book of Spells》

人數： 1人
類型：體感互動電子書
售價：$299
機種： PS3/需配合 Move體感系統使用
遊戲需要 PS3主機、 Move手掣、眼仔 webcam、光碟、魔法 AR書。隻 game預你放本書喺地下玩，所以眼仔都要輕輕向下對準屋企地板，喺畫面見到書同埋自己半身就 ok。 

AR魔法試煉

《 Book of Spells》係英國 Sony團隊開發之遊戲電子書《 Wonderbook》第一炮，套裝包括 1張遊戲藍光碟同一本 AR電子書，所謂電子書只係 12頁印有巨型 AR code的紙張。配合 move手掣同 webcam，遊戲畫面中，你手上嘅無字天書就會變成 J.K.羅琳監修、波特仔佢哋喺霍格華茲用過嘅魔法課本。書中嘅文字、圖畫全部有互動性，仲可以用體感手掣畫符施魔法，學晒 5個 chapter共 20多款咒語，變唔到魔法師都變到波特專家。作為 13年波特飯，「麥兄」一見到電視入面嘅自己拎住本羅琳魔法書，即時笑到超 hyper，從未見過咁喜歡考試嘅學生， ok咁即時開考！


《 Book of Spells》定位係《 H.P.》內的「書中書」，羅琳會喺遊戲內解構 Lumos路模思等知名咒語的來歷， fans實鍾意睇。


說故事部分似 pop up立體繪本，篤吓下方 2個英文，仲有互動情節。


又會教你咒語嘅正確英國口音讀法，至正宗！

魔法操作實習篇
3D繪本噴水兼飄移

遊戲操作極簡單，畫面上見到書本內有乜想睇，以魔法棒尖對準後按「 T掣」就可閱讀，圖畫就會變成立體剪紙 pop up或其他互動物件，好有趣！


有時啲圖畫可以變成互動 3D實物，好似呢個裝落眼珠嘅玻璃瓶，唔小心傾斜書本仲會跌爛，搞到一地眼珠。


學會噴水魔法後，又可以向畫面射水，部 LED電視真係好似俾水淋咁樣，超過癮！

Fing掣畫符用盡波特咒語

見到書本中有啲大隻字樣，即可學習用魔法棒畫符咒。要按「 move按鈕」，棒尖出現金光，跟住寫字就可施法！


畫 J字能使物體在半空飄浮。 Wingardium Leviosa




畫圓就係哈利常用嘅路摸思，令棒尖變光當電筒用。 Lumos

考生的 4項準備

影相
先用眼仔影張魔法相片（波特世界內的魔法照片，相中人都識郁），貼於考卷上。 




揀棒
遊戲畫面中， Move棒會被 AR立體圖案覆蓋，變成一支完全嘅魔法棒。而開 game時更連棒棒嘅顏色、用料都可自選，麥兄勁讚：「小說人物個個支魔法棒都唔同款，唔少飯仲會買番同一款式收藏。呢隻 game一定係 H.P.飯製作，好細心！」 




入社
再從 4大學院中揀出你心水，就可為所屬學院賺分數。一般哈仔 fans會揀紅社葛來分多，麥兄話佢最愛石內卜，所以企硬要入綠社史萊哲林。 




打掃
你被分派咗一本二手課本，跟住遊戲旁述指示，先用手拍吓電子書封面，即見遊戲中封晒塵嘅舊書，變成一本有閃咭封面嘅豪裝魔法書。 

大考來了！

第 1章仲、阿咯哈呣啦 Alohomora（開門鎖）、 Aquarium噴水咒。學齊 4種就可揭到最後一頁進行大考。首先魔法書中會出現一個金盆，先用噴水咒裝滿水，再追捕逃走嘅海馬，其間要活用 4種咒語。麥兄真係天才，完全唔使記者教路，又以爆分過版！ 




先要用開鎖咒，要用飄浮咒將 4個齒輪歸位，重開大閘。跟住以路摸思 Lumos驅趕圖中呢種暗黑魔法藤，用發光棒尖對住佢哋就會枯萎。 




最後就會撞到波士海馬，原來並唔難打，只需要預先用飄浮咒升起頭套，等海馬浮出水面時迫佢笠住，就會馴服到佢。 

麥兄玩後感

我覺得畫咒語好正，啲畫功好襯《 H.P.》，不過難度就唔夠高，好想買番隻自己試，快啲跟最愛嘅石內卜教授學黑魔法！ 

魔法 Cafe有靜有動

點解會用魔法做主題？店長 Doctor話，近年香港嘅 maid cafe愈開愈多，但就冇邊間有特色主題，傾開偈發現大家都喜歡魔法故事，於是就夾手夾腳建立呢間 cafe。一眼望落去，成個場嘅裝飾都係心機錢，比如幾支蠟燭款吊燈，仲有好似溶化緊嘅朱古力餅天花，碎花布簾隔絕窗外嘅 MK味， Doctor話「好多女仔喜歡呢度裝修可愛，試過有班 Lolita打扮女仔包場 gathering。」不過記者最 like都係妹妹們嘅靚靚制服，件小斗篷中間用金鏈駁住，比一般女僕裝斯文典雅，勁 pure勁 true。
Maidjikku亦唔只齋坐飲茶咁靜，日日都有 2、 3個學員返學，星期六、日晚會更齊人，一眾魔法使都喜愛動漫遊戲話題，店中 60吋大電視、遊戲機、 table game、漫畫都齊全。 Kasumi話：「打機真係吸引唔少男仔嚟玩，有時仲會搞吓 Gundam打機比賽、 J-Pop唱 K之夜，熱熱鬧鬧。」聽到記者都想超齡入學添！ 




佢哋套衫係由 cosplay、繪畫同樣厲害嘅麥兄親手設計。佢哋都有唔少畫畫高手，今日呢碟哈利波特蛋包飯，就係麥兄親手用茄汁繪畫。（各式飯類約$70、飲品約$38，同時 order飲品半價） 

記者大愛呢個天花，支吊燈好似《美女與野獸》入面支會講嘢嘅燭台。








可以同魔法使合照，亦可只係影女仔，即影即有上仲會有女生嘅親筆字樣。早排聖誕仲送件手製薑餅人，新年係咪有利是糖先？$50/1張 

Cafe Maidjikku

地址：旺角西洋菜南街 38-40號萬高商業大廈 5樓 B室
電話： 6808 2148
營業時間：每日下午 3時至晚上 11時
最低消費：每 2小時/$38
臉書： http://facebook.com/maidjikku

學員推介魔法動畫

魔法少女小圓
麥兄超級推介，主角小圓同一班女生為實現心願而化身魔法少女、跟魔女作戰。故事完全推翻《小忌廉》呢類天真無邪、公主童話式劇情，小圓同伴打到斷頭死，魔法奇蹟仲需要以生命找數！ 




中二病也想談戀愛
屬動漫迷專用重口味之作，男主角勇太升高中後決定放棄對魔法的幻想，卻偶遇妄想右眼係「邪王真眼」嘅六花。 




本地魔法輕小說（記者推介）
自幼受老豆影響愛看倪匡作品， 12歲起以筆名「百無禁忌」在網上寫作，今年先 16歲嘅中四學生施浩豐，新作《劍與魔法日常》出書，故事講述地球因巨大光球降下，全世界失憶兼學會魔法，故事以香港為背景，睇落有親切感，連對寫作好有要求嘅倪匡老師都激讚，為佢寫序。卷二《劍與魔法軼事》將於 1月出版，記得支持下本地原創！
（卷一/$48/ ISBN 978-988-19425-3-1） 

撰文：鍾世傑
攝影：傅新發
Model：麥兄、 Kasumi@魔法學園 maidjikku
場地提供：魔法學園 maidjikku