密室設計好巧妙，要過關需要觀察加細心，稍為大意就會錯過提示。
一開頭真係唔知如何入手，幸好有男友，先搵到第一個提示，之後愈玩愈順利，更成功開鎖逃出監獄。

Main Camp

解謎逃脫　科大仔搞港版恐懼鬥室

2012年12月26日 ~~ 第292期 Face

電腦逃脫式遊戲日見流行，宅男對住部 iPad左篤右篤，努力解謎為求盡快過關。
逃脫遊戲要推理又要考智慧，雖然好玩，但對住個芒沉迷難免感覺超毒，所以現讀科大工商管理系 Yr.2的施煒恆（ Raymond），決定將逃脫遊戲現實化，於旺角開設首個真人逃脫遊戲室，結果日日爆場，難怪 Raymond沾沾自喜說：「我在科大幾努力都搵唔到有咩價值，反而密室受歡迎有價值得多！」

「逃出香港」每間密室只供相識者或團體參加，其他分店才打算擴展到不認識玩家都可以同房解謎，但 Raymond說：「我哋一定會做好監管，免得有玩家乘機博懵！」
上週四（ 20日），本刊直踩 Raymond位於旺角的「逃出香港」遊戲場，在門外已經傳出有幾名女生狂拍門大叫：「救命，放我出嚟！」現場設有 4個主題密室，其後記者親身試玩其中一個「 Dr. Alpha實驗室」時，開始不久已被現場幽暗環境及緊張音效，令各種感官極度驚恐，還要想辦法打開密碼鎖及一連串謎團，結果在限時 45分鐘後，宣布挑戰失敗！

8成逃脫失敗

Raymond笑笑口說：「逃脫失敗好正常，因為只有 2、 3成玩家能成功逃走！」自小就是推理迷的 Raymond鍾情各類偵探小說，最喜愛日本偵探漫畫《金田一》及美劇《 Prison Break》，「其實好似我鍾意推理的大有人在，見香港又冇真人逃脫 game，我咪用 8、 9萬積蓄與 2個朋友夾錢開鋪！」由密室故事大綱到機關設計，全都是 Raymond負責，「部分道具喺淘寶買，而監獄主題嘅大閘就用上幾千蚊訂做！」

密室 1　 Dr. Alpha實驗室

在設有紅外線機關的密室內，要成功破解謎題才可越過紅外線，觸碰到紅外線還會影響逃生， Raymond不建議新手玩，因為難度最高，好考玩家身手避開紅外線，好少人成功在限時內逃脫成功，而曾經試玩的 MC Jin則說：「我哋偷雞玩多咗 15分鐘先破到！」 

玩埋港鐵

密室內有不少香港地道文化，例如為人熟悉的港鐵路線圖也是一大謎題之一，搵唔到電筒摸黑一定破解唔到！ 

破解日記

要破解夾萬密碼，就要靠推理找出日記，不過日記大大叠，畀你搵到都有排諗。

Raymond
科大工管 Yr.2

只靠 facebook開專頁做宣傳，玩家反應比預期中熱烈，開店個幾月，已有 5位數字利潤，出年會喺尖沙咀及銅鑼灣開設 3間分店，現在正同投資者洽談中。 

搵尖子試玩

密室經過 3個月數百次改良， Raymond自爆：「我特登喺科大搵咗啲尖子同學同成績一般嘅同學試玩，結果尖子成功逃出密室會比其他同學快 20分鐘！而每 3個月會更新主題及改謎團一次，希望保持新鮮感！」每間主題密室房然只有百多呎，但都是 Raymond心血，「其他科大同學會苦讀攞高分，但我咁努力讀書考試，一陣就唔記得，搵唔到有咩價值，我𠵱家成績 below average，反而密室受歡迎，每日全 full要預約先有得玩，對我有價值得多！」

密室 2　監獄風雲

被困在疑似美劇《 Prison Break》的監倉內，要絞盡腦汁破解牆上的文字數字謎題，加上監倉內昏暗，即使你找到電筒，都要用用腦才開到，考邏輯推理之餘，細心都係致勝關鍵。

老閉𥄫實

店內有閉路電視留意玩家進度，萬一玩家按下「救命鐘」，工作人員就會開咪畀提示，幫助玩家逃脫， Raymond說：「密室已通過消防條例，玩家可以放心玩！之前我諗過用人體可以通電做解謎方法，但最後怕太危險而取消，安全至上。」

密室 3　童夢聖誕 Ex

估不到密室逃脫都有季節限定， Raymond為聖誕節專門構思應節密室：「為咗開心，𠵱間房嘅難度低啲，成功逃出仲會有神秘聖誕禮物一份！」密室要玩家好似毒男煲電玩才可過關！ 

打機過關

房內會要求玩家要打超任孖寶兄弟拎題示解謎，相信一班男仔去玩實有着數！ 

日台 30萬人集體逃脫

別以為密室逃脫遊戲只得香港獨有，其實這類遊戲早已在新加坡、美國、韓國熱爆，而最有名的一定要數日本的 SCRAP公司。他們開設了不同主題的密室，已經吸引超過三十萬人參加，更將遊戲帶入台灣市場，結果一樣極受歡迎，要 3個月前在網上預訂。
網址： http://realdgame.jp/archives/category/news


在日本有近千人齊齊玩棒球場逃脫考腦筋，氣勢迫人，抵你贏！

早 3個月撲飛

由於日本大熱，所以 SCRAP亦在台北搞逃脫，由於謎團及主題都是從日本版移植，所以水準及好玩度一定有保證，由於一日只開兩場，所以 1、 2月門票早就售罊，而最新就將逃出幽靈郵輪搬到台灣。
綱址： http://www.comma9comma.com/realscapel/about.htm 

Main Camp：

Main Campus簡稱，意即主校園，各大專潮人潮事當然離不開 Main Campus。 

撰文：葉浩婷、譚家昌
攝影：何榮亮