數個月前訪問Alex林德信，內容有一半以上也跟他的爹哋林子祥有關；今天訪問林子祥，明明是宣傳他與趙增熹下年二月舉行的《絕對熹祥》演唱會，說着說着，他還是談到兒子Alex去。

「佢入行，我都唔知o架！佢住咗喺外國咁耐，耐不耐就整隻歌嚟我聽吓，我只係以為佢純粹玩，所以佢依家真係做緊一個artist，我睇到、聽到佢有乜嘢唔啱，即刻逐啲逐啲講佢聽，希望佢catch到啦。」

畢竟，入行三十七年的阿Lam，早已榮升為殿堂級歌星，兒子現在步自己後塵，當然不想有任何差池。

「我一做嘢上嚟，好執着，乜都要plan；但佢好似乜都冇所謂咁，好free，有時free得滯好似冇咗自己咁。」他語重心長地說。「不過，我知佢壓力好大o架！因為啲人點都搵佢同我比較，所以佢一定要搵到自己嘅風格！就好似霆鋒同四哥（謝賢）咁，點都唔可以成世叫霆鋒做『謝賢個仔』o架嘛，一定要break awayo架！」

但我知道，阿Lam絕對不會介意，將來有天會被別人稱自己為「林德信個爹哋」；正如他今天仍會掛念關係曾經疏離、七十年代是元朗著名醫生的父親一樣。

 

Miss

林子祥說，在兒子林德信入行前，從未有機會看過他的表演。可是，我明明很記得Alex曾說過，小時候五、六歲已經常扮爹哋開演唱會，在家裏大聲唱着〈十分十二吋〉。「哈哈哈哈！係呀，係呀！」阿Lam聽罷，一言驚醒。「最衰嗰陣我哋冇可以拍低嘅嘢咋，佢真係成隻〈十分十二吋〉由頭唱到落尾呀！哈哈哈！」

看見這張八十年代推出的《最愛》唱片封套，他說：「真係得意，嗰陣Alex仲係BB，咁快就咁大個！」

Alex小時候，阿Lam也處於最忙碌之時，故惟有帶着兒子開工，爭取相處機會。

回想子女（Alex和妹妹April）的成長過程，阿Lam不無感觸，一來、他們早於八八年已跟隨母親吳正元移居美國三藩市；二來、九五年，他跟吳離婚，能跟子女相處的機會又少了一大截。「佢哋細個嗰陣，係我最忙嘅時候，我想畀多啲時間佢哋都畀唔到，佢哋喺外國，我又拍戲又演唱會又錄音，飛嚟飛去，就算見到面都係好短時間，跟住我又要返嚟！

「好可惜喺佢哋十歲至二十歲嗰段時間，我哋見得最少，嗰度咪miss咗啲時間囉！」

我告訴阿Lam，Alex曾表示過，並沒有因為父母離婚而感到有所缺乏，他當堂眼睛發亮，面露微笑。「最緊要係咁樣啫！」再跟他說，我感覺到Alex兩兄妹其實也愛他，他的眼睛已笑得彎起來。「希望係啦！哈哈哈！feel到就正啦！哈哈！」

早前為仁愛堂與Alex合唱〈分分鐘需要你〉，阿Lam被兒子的情感交流感動落淚。

雖然與前妻吳正元（左一）已分開，但因為Alex（左二）和April（右二），兩人關係仍然友好。

Surprise

Alex入行，阿Lam事前完全不知情。「佢從來未真係同我講過：『爹哋，我想入行呀！』佢呢樣嘢咪同我最似囉！我平時好low key，一做起嘢上嚟，總會有好多surprise出嚟，佢又係咁o架！好似嗰次我忽然見到佢喺度跳Gangnam style，我都『咦』咗出嚟，我都未見過我個仔跳舞嘅！哈哈哈！」

然後，他即時變身為兒子的貼身導師，連Alex留鬚，他亦給予意見。「我會睇佢留得好唔好睇，佢冇我咁執着日日去修，冇乜理，搞到有時留到亂晒龍！」

我告訴他，以Alex本身的討好外形和親和力，其實他的鬚留得好不好，早已秒殺大批女性粉絲了，「咁叫佢介紹啲（粉絲）嚟囉！哈哈哈！」他從心底裏笑出來。「希望佢做到金城武咁啦！有人肯影佢相，已經好正o架啦！我已經好驕傲o架啦！哈哈哈！」

兒子在台上演出的大小事項，阿Lam當然更緊張。「佢有時唱歌，一諗到要顧其他嘢，連個咪都會唔向住個嘴！不過呢，前排我同佢幫仁愛堂演出唱〈分分鐘需要你〉，佢真係畀到我surprise！我睇住佢會唔會唔記得入，點知佢入得好準，唱啲歌詞仲……（他的鼻頭紅起來）啲感情出晒嚟！呢個……（說話有點抖震）可以話係我同佢嘅第一次！嗰晚我即刻就……谷晒啲眼淚出嚟……即係呢……（他用力索索鼻水）做爹哋，見到個仔咁大個同自己喺個台上對住自己，唱自己一首咁有感情嘅歌……（抹抹眼角的淚水）呢個……真係好難頂（難忍眼淚）！個仔咁樣梗係開心o架！」

Independent

感受深刻，只因阿Lam本身在成長時期也曾缺乏過父愛。他出身於杏林世家，爺爺是那打素醫院院長，父親是婦產科醫生。「唱仁愛堂嗰晚，有個女仔走嚟同我講多謝，因為佢爸爸四兄弟，都係我阿爺幫佢哋起名同義診！幾感動o架！另外我有個聽咗我三十幾年歌嘅fans呢，直情係我爸爸接生嘅！哈哈哈！不過，嚟到我同我細佬呢代……哈哈……我見到血就暈低！電視嗰啲血腥呀、開刀呀，我一見到就轉台！唔得！哈哈哈！咁我同我細佬就走咗去art嗰方面發展囉！」

兒子Alex早前正式入行出唱片，作為父親，阿Lam既現身記招支持，更當他的貼身導師。

在他只有幾歲大時，父母離婚，他和細佬跟隨母親。六○年，他在男拔萃讀中一時，母親離開香港到美國去，兩兄弟便開始寄宿生活，直至六五年，再被安排負笈英國四、五年。

「其實前前後後，我同細佬有十年時間又冇爹哋、又冇媽咪，冇一個正式嘅家庭o架！嗰陣喺英國，冇乜中國人，我同我細佬分開兩間學校讀，畀啲鬼仔恰得好犀利，有好多嘢都要自己搞掂！

「我爸爸嗰陣冇理過我哋兩兄弟，雖然佢喺香港已經係頂級嘅醫生，差唔多係元朗第一個西醫，佢對病人好好、好周到，個個元朗居民都睇佢、都識佢！不過佢嗰啲嘢（關愛）都係散晒出去出邊，對自己啲仔，就……冇料到嘅！哈哈哈！硬係外人親啲！」

Beta

直至七十年代中，阿Lam從美國回港成為了歌星，兩父子才再次有所聯繫。「佢嗰陣都已經六張（六十歲）o架啦！見到我喺電視唱歌，佢好鍾意聽，會用beta帶錄起晒佢，佢嗰陣先至好proud of我係一個歌星，as佢個仔，未試過o架！就算食飯見面，我哋大家都冇乜嘢講，佢唯一有講過嘅係：『阿祥仔，我都有聽吓你啲歌！』係咁多囉！依家嗰啲beta帶，仲喺我屋企，不過冇人會知道啲帶裏面錄咗啲乜嘢咯！哈哈哈！」

還以為曾經「生離」的一段父子情可以延續下去，誰料，才相處幾年，卻又敵不過「死別」。「八十年代初嘅事囉。有晚我喺新界拍戲拍到半夜三、四點，坐架麵包車送我走，啱啱經過大馬路佢間診所，我就話：『爹哋，你好嗎？』點知就係嗰晚佢心臟病發走咗！啱啱先有機會可以同佢埋身，佢就去咗，所以，我依家可以同個仔有咁嘅接觸，我梗係開心啦！因為我自己都冇！哈哈哈！同埋因為咁，我每次唱〈追憶〉呢首歌，我都會忍唔住喊o架！」

這是阿Lam一首關於父子的歌，歌詞大概是這樣的：

「從前共你，朦朧夜裏，躺於星塵背後。難明白你，為何別去，留下空空的一個地球……

從前從前曾共我一起的 現仍在心裏逗留……從前誰曾燃亮我的心 始終一生在心內逗留。」

七五年由美國回港發展歌唱事業，那時還未留鬚。「我嗰時仲好鬼佬，廣東話講得唔係太好。到入行，我就開始留鬚，一直到依家。」

七十年代認識了同樣是嬉皮士的吳正元，一拍即合。

六十年代，阿Lam（紅圈）就讀男拔萃，因母親去了美國，開始寄宿生活。

「女人」生活

林子祥今年六十五歲，因為過往長年勤於打網球、高爾夫球和做瑜伽，歲月的洗禮，只在他的臉上留下了一點點風霜，以及換來一頭的白髮。

源於他成長時期的寄宿生活，不用唱歌的日子，他都會親自處理個人的大小事務，包括為自己剪頭髮和修改衣服。「哼！我差唔多大半世人都係自己剪頭髮o架！只係有時做show有sponsor，先會有髮型師幫我執執。」他一臉招積的說。「自己幫自己剪頭髮好易o架咋，只要有兩個鏡咪得囉！

 

「啲衫，我最鍾意去啲vintage shop、外國啲second hand shop摷，如果個size唔啱，或者個款老土嘅，我咪自己縫紉囉！我縫紉好叻o架！好似我依家着緊呢件褸。」說着，他把身上那件綠色夾棉褸的袖反出來給我看。「你睇，本來呢件褸脹卜卜o架，係我自己縫到啲袖同兩邊腰都fit我身形o架咋，連阿華仔（劉德華）都成日問我啲衫喺邊度買！哈哈哈！」

那莎麗葉蒨文會跟你一起在家玩縫紉嗎？「莎麗對呢啲嘢冇興趣，所以佢係男人，我係女人嚟o架！喺屋企，我會做晒女人啲嘢o架！哈哈哈！」

阿Lam如此「女人」的一面，大概應該只有莎麗最清楚。

阿Lam不熱衷於網絡世界，不上網也不用智能電話。「我呢部手提電話，可以打出打入，已經夠用啦！」

下年二月舉行的《絕對熹祥》，阿Lam說，屆時他與趙增熹只會用音樂mix & match，不會多言。

他不會下廚，也不講究飲食。「你畀塊麵包我做一餐都搞掂o架啦！」所以吃個廿多元的燒味飯，他也很高興。

阿Lam很欣賞阿熹的音樂熱誠。「佢喺音樂上嘅窿路，仲多過我以前啲拍檔。」

八三年，因為一曲〈零時十分〉令阿Lam和莎麗走在一起。