都說現在做小朋友好辛苦，每日除了讀書溫習考試，便是學這學那，甚少時間接觸大自然，有些孩子就連蝴蝶、蜻蜓的真身都未見過。
出名緊張囝囝，之前曾拍短片反對國民教育的王敏德太太馬詩慧，趁住剛升中一的十三歲兒子王躍穎考試前，偷空兩粒鐘，帶埋囝囝去海洋公園體驗與斑海豹女「俏妞」近距離接觸，但異性竟然冇相吸，反是馬詩慧與海獅女過晒電，「隻海獅會瞇埋對眼攬住你，好似啲小朋友，又好似 lover好冧咁，搞到忍唔住要嘟住個嘴想錫佢。」
同性相吸
馬詩慧（ Janet）與兒子躍穎（ Kadin）的關係就好似好朋友，雖然經常拌嘴，但查實母子感情甚好。問 Janet有沒有與兒子去過什麼主題樂園？ Janet搶着說：「梗係有！」 Kadin即沒好氣說：「冇呀！妳記錯啦，唔係同我去呀。」不過 Janet坦言最怕去玩要排隊，「依家周圍都咁多國內遊客，玩乜都要排成粒鐘。」好彩身為名模總有着數，好似今次海洋公園新推出零距離親親海豹， Janet獲邀率先試玩，她就孖埋囝囝同行，「呢啲大自然嘅嘢，都想佢接觸多啲。」
Janet與 Kadin坐在海豹池邊與斑海豹「俏妞」攬攬抱抱，阿媽比小朋友更興奮，「個 trainer冇用棒棒引住隻海獅，佢都走埋嚟攬住我。」 Kadin酸溜溜話：「佢嗲媽咪多啲。」 Janet得戚地說：「我有母愛囉！」轉頭即為兒子開脫，「其實佢好鍾意動物，但今日佢太早起身啦。」以為 Kadin會有興趣去同企鵝抱抱，他卻說怕怕，「我驚企鵝會篤我屁股！」吓？「因為上次我睇《快樂地圖》，草蜢喺澳洲餵企鵝，俾企鵝撞屁股。」
Janet比兒子攬得更開心，皆因今次是她處女下海，「水裡面嘅動物係第一次 encounter，以前陸地嘅就試過近距離接觸，喺澳洲、新加坡試抱猩猩同樹熊，不過樹熊攬埋嚟我會縮，驚佢啲爪抓到我塊面。」
負責任
Janet和丈夫 Michael都喜歡動物，高峰期曾養過六隻狗，比他們的三個仔女更早成為王家的一分子。「我大女敏感，啲人叫我將啲狗送俾人。」但 Janet覺得對動物都要負責任，有始有終，「之後每次搵地方住，都要有戶外地方養狗。」
現在六隻狗都已過身，屋企再沒有養其他動物， Janet說：「依家冇請工人所以冇養狗。」何不讓仔女養狗，藉此訓練他們的責任感？「佢哋嘅責任即係我責任！依家佢哋讀書都讀唔切啦。」 Kadin卻細細聲說：「我同家姐都想養兔，但媽咪唔俾。」以為 Kadin喜歡「小」動物，誰知他卻說：「我最鍾意老虎！」點解？「夠型囉！」
留言列表
