今日好玩嘢

黑色十月靚鬼猛鬼任你撞

2012年10月10日 ~~ 第281期 Face

又到十月哈囉喂，想應節除咗可以入兩大樂園探聖羅蘭同搵「殭屍拉 baby」，市區一樣鬼影處處。自問係嚇得之人，樂富就有個萬呎鬼屋，玩血腥斷肢、巨型眼球，兼要你自己搵啱路走，兜錯路絕對可以撞鬼撞到飽。唔係咁襟嚇，城中仲有幾個場大搞可愛卡通 Halloween show，比如時代廣場就將添布頓卡通《怪誕狗 Sparky》變 3D，勁 cute翻生狗加埋怪誕味十足嘅寵物墓園布景，影相都靚鬼死！

互動片段

驚遊墓園

全場驚嚇度 No.1
4索命舞台南瓜妖

呢間房行到入去勁窄，僅可以一人通行，因為入口角度，行入去時會見到一面哈哈鏡牆，定神一望，竟然有兩隻化妝勁恐怖嘅南瓜怪跳出嚟！驚都未驚完，先醒起兩隻嘢係倒影！真正嘅南瓜怪其實企喺你背面，其中一隻仲突然彈起， model即時尖叫！
驚嚇度：★★★★★

猛鬼免費撞
嚇鬼死

屋邨屋苑最忌就係有凶宅，估唔到屋苑商場竟然帶頭擺間鬼屋出嚟任人玩，仲要免費入場，聽落好似有啲伏味，硬係驚佢好重宣傳成分，隻隻鬼都着住超市、快餐店制服賣廣告，咪嬲死多過嚇親？
記者決定帶埋年年都有去海洋公園玩哈囉喂嘅 Hilary入去試佢一試，囡囡玩完猛讚有水準，冇中伏！成個鬼屋畫分成多個主題區域，一路行都有好多阻礙物，好似要跳過啲眼珠咕先走得甩，中途又要搵啱出口走，最後仲要玩滑梯逃生，好在 Hilary今日冇着高 踭鞋嚟玩！

START
1入場抽生死籌

迷宮門口有兩道門，大門口封晒黑布營造緊張氣氛，究竟邊一條路會恐怖啲？「魔幻秘道」牆身凹凹凸凸仲吊滿核突截肢，仲要驚有鬼鬼突然出現；「血腥舞台」雖然闊好多，但布置就更恐怖，吊滿膠袋包住嘅「死屍」，啲血好似未乾咁！
驚嚇度：★★★
５（５為最高） 




A血腥舞台


B魔幻秘道

踢住眼球走
2眼球雜耍室

兩條路冇耐就匯合番，進入一間好多白色吹氣咕嘅暗室，點知 model踢到腳邊一粒，望一望先知係大大粒眼珠，喺堆眼仔中間仲突然彈出一個人扮嘅裂口鬼，救命呀！
驚嚇度：★★★ 

嚇到走唔郁
3「凶」中飛人特訓室

仆「屎」我！

俾裂口鬼嚇到跑去下一個 point，雙腳忽然好唔踏實，原來地面係由吹氣彈床造成，企都企唔穩，呢個時候仲有個邪惡扮美國隊長出嚟招呼你，想走又走唔得快，勁邪！
驚嚇度：★★★★ 

迫埋牆角
5終極逃亡陣

雞咁腳逃離南瓜怪魔掌，環境一轉變成全金屬嘅「恐懼鬥室」 feel鐵籠地獄，仲有隻着超短裙嘅「鬼妹」招呼你，條路又窄，要超近距離喺佢面前行過先可以跑到出口！
驚嚇度：★★★★ 

ＥＮＤ

小心呀！幾驚都好，出口位係一條滑梯，就算後面成班友係咁叫，都小心趕頭趕命仆親！ 

樂富廣場猛鬼馬戲團

日期：即日至 10月 31日，逢星期五至日及公眾假期開放
時間： 5:30pm至 10pm
地址：樂富廣場 B區露天平台
收費：免費
查詢： 3168 0080 

靚鬼死
怪誕寵物墓園

Jumbo你係咪鬼上身呀？
主角 Victor帶埋支電筒去盜墓，帶住寵物狗 Sparky去俾雷劈，但翻生之後成身傷痕，望落重嚴重過之前，但起碼行得走得。

呢排有雜誌踢爆某寵物善終公司亂扔動物屍體，真冇陰功，呢班人嚟玩添布頓新電影《怪誕復活狗》同時代廣場合辦嘅立體寵物墓園，話唔定真係會撞鬼！ 

怪誕人物逐個捉

《怪誕復活狗》係講主角 Victor因為唔捨得狗狗 Sparky，行雷拎佢出街劈一劈，即刻翻生。呢個商場展覽就將電影場景「寵物墓園」搬到現實，雖然冇乜機關畀你玩，但係啲立體陳設真係好似將《怪誕城之城》嗰種泥膠動畫放大咗一樣，貫徹添哥黑色美學設計，幽怨卻不失浪漫感。電影 18號先上映，展區就可以幫你率先了解呢套「人狗情未了」有乜角色、講啲乜， model Jumbo影完相猛話要去睇戲！


故事圍繞行雷閃電，所以墓園背景特登加入雷聲效果同閃電燈箱，不過就要等入夜， set埋三腳架先捕到呢一剎那「光景」，拍片反而更容易影到效果。


《怪誕狗》奸角造型唔算嚇鬼，呢位 Nassor要奪取 Victor起死回生嘅秘方，結果搞到一鑊泡！呢個場景有少少似新界山頭啲「金塔」，喺成個展覽中最有邪味。


呢個孖辮妹 Elsa係市長個女，同 Victor一樣好錫佢隻寵物貴婦狗 Persephone。呢兩隻公仔比較細粒，要坐地下先可以合照。


寵物墓園佔地相當大，仲有間屋仔展出劇照、製作花絮圖片，仲會播出預告片。

Frankenweenie at Times Square

日期：即日至 10月 31日
時間： 8am至 10pm
地址：銅鑼灣時代廣場露天廣場
收費：免費
查詢： 2118 8900

鬼影處處有
好鬼死 cute

去完時代廣場影怪誕狗，隔幾條街嘅皇室堡入面，一樣有其他星級卡通喺度。場入面有齊米奇、米妮、布魯圖同唐老鴨，個個着晒萬聖節 look，萬聖正日時扮鬼扮馬同佢哋合照，好過入樂園排長龍！ 

皇室堡呈現迪士尼米奇與好友萬聖派對

日期：即日至 11月 4日
時間： 10am至 11pm
地址：銅鑼灣皇室堡地下中庭
收費：免費
查詢： 2895 0668

潮鬼現身

海洋公園一樣有派代表出市區，話晒今年搵潮人 Wyman做代言，連布置都要同 fashion有關。所以喺朗豪坊呢個影相位，就以 Boutique做主題，猛鬼企定晒喺櫥窗入面同你合照，貪靚鬼之選。

朗豪坊×海洋公園潮鬼「慌」廢 Boutique

有阿 Y，連啲鬼都要潮，相右邊呢個原來係牛頭 fusion馬面，唔講真係唔知……

日期：即日至 10月 31日
時間： 11am至 11pm
地址：旺角朗豪坊 4樓通天廣場
收費：免費
查詢： 3520 2800 

倒吊鬼魅

想要搞鬼地方，可以去新都城中心呢間倒轉屋。出面睇間屋真係成間翻轉咗，屋內布置雖然未睇得，不過都會全部玩倒轉錯視感，夠晒特別。 

將軍澳 MCP新都城中心
潮爆鬼馬倒轉屋

日期： 10月 20日至 31日
時間： 12nn至 9pm
地址： MCP新都城中心 2期 L1天幕廣場
收費：需消費滿 HK$300或以上
查詢： 3194 3200 

撰文：鄺浿鏇
攝影：黃家活、彭自維
模特兒： Hilary@Style、 Jumbo@M.Spy