啱啱搞完騷，阿 Paul話唔介意搞「 Beyond三十周年」，但收到風世榮做唔到。
探熱針
鼓佬唔恨做 Beyond終極散 Band
相知相交三十多年的 Beyond三子，自從○五年搞完紅館演唱會，阿 Paul（黃貫中）與家強隨即傳出不和，當時負責做和事老的鼓佬世榮，慘變夾心人。事隔多年，三兄弟各自有家室、另組樂隊，關係愈來愈疏離。
明年是 Beyond成立三十周年，也是樂隊靈魂人物家駒逝世二十周年，大批 Beyond fans期待三子在這重要時刻合體開騷，阿 Paul及家強這對不和兄弟開晒口話唔介意再次同台，反而已轉戰內地十年、娶了吉林老婆，上月尾做埋老豆的葉世榮卻一口拒絕：「我簽 咗內地經理人，工作排到一四年，我支持 Beyond三十年，但參與唔到！」
虎視眈眈
上週五及六（七月十三及十四日），與小交響樂團合作《 Paul Wong Rockestra演唱會》，闊別紅館舞台六年，尾場獻唱家駒經典作品《情人》時場面感人，唱《不見不散》時，平日硬撐的阿 Paul，終於忍唔住喊，聲言唔知有無機會再踏紅館。
明年便是 Beyond成立三十周年，同是家駒逝世二十周年的日子，不少演唱會主辦商也虎視眈眈，分別派人接觸 Beyond三子，提議舉行紀念演唱會。
不少演唱會主辦商接觸 Beyond三子搞騷，但已將事業北移的世榮，以無期為由 say no。
○九年與阿 Paul破冰合體搞騷的家強，似乎唔想再踩入是非圈中，只表示一切隨緣！
世榮唔得
據知當年開騷幾乎開埋拖的阿 Paul與家強，對「 Beyond三十周年 show」心郁郁，阿 Paul在個唱慶功宴上說：「其實十年來我食 咗好多 嘢都唔出聲，我知道阿榮好似唔得，我幾時都話隨時 ready，聽日開都得。」 記者致電近日完成大陸巡迴演唱，正身在老婆家鄉吉林湊女的世榮，對明年回港做「 Beyond三十周年」，他斬釘截鐵說：「呢個日子的確好特別，我絕對支持，但返唔到 嚟，因為我喺內地 嘅工作已經排到一四年，包括出碟、同 Ever（世榮另組的樂隊）做巡迴 show，仲要拍戲同拍劇。」
仲未正式受浸的阿 Paul，開騷前裝香拜神做到足。
阿 Paul在尾場獻唱寫給家駒的《不見不散》，一時感觸落淚，他說不要讓朱茵見到，破壞其鐵漢形象。
在 Beyond非官方網頁，大批歌迷自行發起一人一留言，希望 Beyond搞得成 30周年演唱會，但他們的願望，會再一次落空。
紀念亡兄
唔參與，但世榮建議可找回三十年來曾加入過 Beyond的前成員劉志遠，以及最早期的 William等開騷，到時一定抽時間回港做觀眾捧場。
至於忙於湊仔的家強，更不置可否。「呢個日子好特別，但我忙緊年尾做新碟，又諗緊開純音樂 show，下年可能會搞首次個人演唱會，剩番 嘅時間唔多，哥哥走 咗廿年，我會想做紀念家駒 嘅 嘢，多過 Beyond， Beyond最終做唔做得成，隨緣啦！」
Beyond三子各有想法，多年來鵪鶉被嫌棄，曾被指靠 Beyond個名在內地搵飯食的世榮，更表明 Beyond已在九九年解散，無可能「離 咗婚都繼續生仔」。
基地北移的世榮，當務之急，是賺錢養家大於一切。
世榮與吉林老婆誕下的 B女未改名，他說一抱 B女就喊，唯一熟手是換片和洗尿布。
世榮 B女手長腳長似足媽咪，大眼睛則似老豆，世榮話不斷要搵朋友幫手在港買奶粉餵 B。
○五年 Beyond最後一次合體不歡而散，阿 Paul講過，夾 Band要先夾人，世榮話希望 fans明白，他們各人已有自己的天空。
世榮雖然人在吉林，但仍在微博祝福阿 Paul Good Show，還訂了花籃送到紅館。
我是憤怒
阿 Paul紅館開騷，即使老婆朱茵懷胎七個月無到，現場反應一樣好。但阿 Paul卻在慶功宴、微博、 facebook不停鬧，世榮認為阿 Paul努力做好音樂卻被忽視，說到個唱首場入座率得八成，世榮為他護航：「佢（ Paul） rock底嘛，係躁 啲，其實入座率唔係 artists控制到，可能佢表演緊燈光大刺眼睇唔清楚 啫，叫好不叫座，總比叫座不叫好好得多，希望大家平和 啲、包容 啲啦！」
音樂冇人提
首場完騷在後台接受訪問，阿 Paul埋怨沒有記者問他關於音樂的問題。
老婆被跟
在慶功上投訴屋企樓下日日有廿幾架車等朱茵，幸好有好鄰居同看更通水，並表示已拍下狗仔隊記者的照片。
嫌篇幅細
「打開報紙個人醒晒，用咗六年時間籌備，手指彈到爛，（篇幅）仲細過部 iPhone，唔出仲好，唔好咁細呀。」有記者安撫他稱是誤會，阿 Paul忽然激動：「當我誤會你 哋，我黃貫中錯晒，正衰人，正×街，出街俾車車死，可能好多人拍爛手掌。」
搞散 Beyond
週一（十六日）有報章以專欄形式指 Paul不接受現實，他發火在微博以粗口狂轟該報相熟記者，並作出人身攻擊，指責她令 Beyond解散！但據知專欄執筆其實另有其人。
詛咒妻兒
週二（十七日）凌晨， Paul依然氣難下，在微博繼續鬧，指記者挑撥 Beyond成員不和，氣得父親中風，意圖推翻其事業及詛咒妻兒。 
留言列表
