close

 

新仔上場

最近，日本又再蠢蠢欲動，東京都知事石原慎太郎欲將釣魚島私有化，發表「買起釣魚島」言論。釣魚台的歷史，你又知多少？「掹車邊」的八十後如我，只是略知一二，反而面前這個差不多是九十後的小子卻再清楚不過，原因很簡單，因為他是陳毓祥的兒子陳安立。十六年前，香港保釣先驅陳毓祥，為了宣示釣魚台的主權，他乘坐「保釣號」到達釣魚台列島海域，穿上救生衣游向釣魚島，結果意外溺斃，你還記得嗎？歷史總是容易讓人遺忘，但對陳安立來說，這段歷史永遠不會磨滅，但他沒有承繼父親遺志，高舉旗幟去保釣，反而走入娛圈做藝人，「我覺得超越唔到佢，我就會諗行其他嘅路。」

裙腳仔
時光回到十六年後，長大成人的陳安立在Now電視觀星台當主持人，他沒有藝名，沿用他嫲嫲幫他改的名字，「安立」有安居立業、亦有安身立命的意思；英文名Brian，則是父親陳毓祥改，「我三叔叫Brian，因為我三叔係好孝順，喺家庭入面係好乖仔、好照顧兄弟姊妹、好nice，可能阿爸想我好似三叔咁，所以就用咗三叔個英文名。」陳毓祥留下給陳安立的，除了英文名，還有一段段父子相處的片段，雖然他離開時，陳安立只得八歲，「佢出發前都知少少，但佢冇解釋好多，因為嗰陣時太細個，其實都知佢出咗事，阿爸好似去咗旅行團後就唔返嚟，呢世都唔返。」八歲前的陳安立，被家人取笑是「裙腳仔」，因為他很嗲、經常黐住父親，「我有個好深刻嘅記憶，就係喺戲院同佢一齊相處，差唔多每個禮拜都會帶我去戲院睇戲。佢好鍾意睇有民族、愛國內容嘅戲，譬如《洪熙官》、《太極張三豐》。」還有每逢星期日踩單車的片段，「七歲嗰陣時踩單車炒車，我隻門牙崩咗，喊晒，阿爸踩過嚟見到，佢冇即刻抱我，由細到大，佢成日話『男人大丈夫，流血不流淚。』佢要我自己起番身，拍拍蘿柚冇事繼續行。」

世伯照顧
以為說起父親往事，陳安立應該會有點傷感，但他總是面帶笑容 ，就算攝影師要求他裝出一副cool的表情拍照，他的嘴角總是不自覺地微微向上翹，看來他的童年，除了失去父親，沒有東西是缺少的。經濟上，因為母親劉舜卿當年是「好時光教育機構」的校監，所以沒有太大問題；心靈上，則多得父親一眾好友的填補，如前香港廣播處長朱培慶、前財政司司長梁錦松、港台節目主持人麥潤壽、康健國際主席曹貴子醫生等，「無啦啦有個uncle突然之間帶我去玩具反斗城，細個生日揀lego最多係揀二百蚊樓下，但uncle話鍾意買乜都得，於是我揀咗個千幾蚊，好開心呀，因為嗰陣時細個嘛，突然之間咁多人錫……」朱培慶則會向他細說與他父親共事的日子、講講父親的為人，工作上他亦有給予意見，「因為我同佢個細仔係同年，佢做新聞記者，都叫做同行，同埋我哋兩家人會約出嚟食飯；曹貴子醫生係我哋嘅家庭醫生，我畢業時佢都介紹咗一份Finance PR嘅工俾我。」自覺生活上沒有太大變化，但母親卻來個一百八十度的轉變，父親離開前，母親對他的管教非常嚴謹，「唔俾睇電視、唔俾食朱古力、唔俾飲可樂。」父親離開後就變得完全相反，「鍾意做乜都得，只要你開心，人生最緊要開心，唔想干涉咁多。我細個讀書差，佢唔會鬧我、逼我，佢寧願我花時間讀書，不如花時間喺其他課外活動去玩sport、去玩其他嘢仲好，仲enjoy。」他說母親非常緊貼潮流，玩facebook、玩whatsapp，希望與子女們更加貼近，「有時我夜晚收工收得夜，一、兩點返到屋企睇電視，突然間收到whatsapp，原來係阿媽，『麻煩電視細聲啲。』哈哈，佢喺房嗰喎，但係又唔出嚟，好搞笑㗎佢。」

殊途同歸
父親是保釣烈士，在浸會大學人文學系畢業的他，卻跑去電視台當娛樂新聞主持，他說要走一條跟父親不同的路，「佢係我學習對象，佢讀HKU，大學又係風雲人物，成個宿舍冇人唔識佢，我覺得我超越唔到佢，我就會諗行其他嘅路。」不過兜兜轉轉，始終離不開父親的影響，「其實佢都做過主持，以前喺港台做，十年之後去BBC做，雖然佢係做時事節目。」母親亦非常支持他的決定，「阿媽由細到大都俾好多自由我，家姐係先例，佢叫陳安然，係舞台劇演員，之前喺香港話劇團做，佢中五會考後走去考演藝，行一啲同正常人唔同嘅路，阿媽接受咗，跟住我而家走去做幕前，佢都會覺得OK。」 ####


陳毓祥（中）生前帶同八歲的兒子陳安立（右）、十歲女兒陳安然（左二）及太太劉舜卿（左）一齊參加保釣運動。（《蘋果日報》圖片）


九六年九月廿六日，陳毓祥（左）從保釣號跳進海中游向釣魚島，但因腳部被繩索纏住及被船隻撞傷頭部，救起後證實不治。


雖然於單親家庭成長，但陳安立性格開朗。


勝出比賽後成為觀星台主持，訪問過不少藝人如林憶蓮等。


去年七月，陳安立在Now TV「CEO選拔賽前哨戰」中奪得「傑出CEO」大獎。


曾是籃球隊的陳安立加入由圈中人成立的籃球隊「Hero」，成員包括港男翟威廉（後左一）、高鈞賢（後左三）、無綫主持阿感（後左四）等。


陳安立四歲生日，與父母及家姐在沙田廣場屋企慶祝。


陳安立經常與朱培慶（前左二）及麥潤壽（前右三）等世叔伯飯聚。


大學二年級時到捷克留學一年。


陳安立說有機會的話，拍劇、唱歌都會嘗試，「有時接MC job，要一雞幾味，唔需要真係超勁天王級，但係起碼人哋點嗰首，都可以即刻唱到。」

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄