close


在上海開工，fans跟到實，單人相任影，合照免問。

內外一致

無綫新劇《拳王》是非不絕，口徑一致唱衰視帝鄭嘉穎格衰扮大佬、目中無人。喺香港「鼻朝天」，返到祖國同樣氣燄。收二十六萬人仔一集，新高價去上海埋位拍電視劇《滾滾紅塵》，同幕前、幕後零交流，預咗！對住米飯班主（fans）更絕情，fans二仔底跟到入距離上海市個多小時車程的片場陪開工，想話等機會影張合照，鄭視帝照樣say no唔在講，仲全程匿埋休息車避得就避，見到落大雨，fans冇瓦遮頭淋濕晒，都好少理。好絕！

巨星待遇
鄭嘉穎去年憑國產電視劇《步步驚心》在內地意外爆紅後，電視劇一部接一部搵上門，繼在橫店拍完古裝劇《英雄》後，緊接以新高身價，廿六萬一集接拍《滾滾紅塵》電視版，同今個暑假檔期電影《王的盛宴》女主角秦嵐合演亂世情侶。身價暴升，鄭嘉穎當正自己國際巨星，向劇組要求開工期間，要安排一架拍電影先有機會用到的休息車跟身，供他享用。「拍電視劇唔會有budget安排休息車俾演員，不過套《步步驚心》爆咗佢出嚟，佢啲期又好緊張，劇組怕進度出問題，到時要度期補拍仲麻煩，所以買佢怕，焗住安排架休息車俾佢，為咗唔好俾人覺得大細超，仲要安排俾埋女主角添！使大支出，全部開雙。」一名《滾滾紅塵》的幕後人員透露。《滾》劇早前在上海車墩影城開工，差不多時間，無綫新劇《名媛望族》亦拉大隊去到同一影城取景，兩個劇組不時撞正同一個景點街開工，距離約等同由電視城一廠行過二廠，但卻不曾見過鄭視帝過界，搵香港同事打個招呼。

鐵石心腸
因為《步步驚心》，令鄭嘉穎多了一班國內fans，難得見到偶像真身，fans幾乎日日拉大隊，到距離上海市個多小時車程的影城探班，開工等到收工，跟足！每次鄭嘉穎拍完一個鏡頭，fans總會蜂擁上前黐到實，「嘉穎你累嗎？」、「今日要拍到幾點？」有人擁護，但鄭嘉穎都只是有一句沒一句敷衍了事，對fans要求合照，他更耍手拒絕，甚至速閃上休息車。為免應酬fans，鄭嘉穎索性玩自閉，食飯叫外賣送上休息車慢慢歎，任得一班櫈都冇張坐吓的fans，繼續呆等。入夜後，片場黑到伸手不見五指，但fans繼續守候，點知忽然落大雨，fans慌忙搵位避雨，但鄭嘉穎卻毫不關心，不聞不問；到工作人員要求視帝落車試位，他只是掂行掂過，完全將守候在外的米飯班主隱形。對同劇合作對手不瞅不睬，自己的死士fans同樣無優待，鄭嘉穎「橡膠」樣，鐵石心，內外一致！

搵錢配套
食住去年尾鄭嘉穎與謝天華為爭視帝不和話題，湖南衞視開拍內地劇《英雄》，鄭嘉穎飾演風流吳王夫差，謝天華客串做越王勾踐，兩是非男同劇合作。劇集在橫店開工，有關方面安排fans探班團賺一筆，最近又推出一系列Q版紀念品及畫冊，全套買齊508人民幣，咁識搵水，難怪鄭嘉穎要收十八萬人仔一集拍《英雄》，照俾。 ####


Fans賴死唔走，鄭嘉穎趁拍劇空檔，全程匿埋上車休息。


電視劇曾安排探班，fans聞風而至，被重重包圍的鄭嘉穎，當場黑面。


鄭嘉穎以廿六萬一集，和秦嵐合演電視版《滾滾紅塵》。


冧庄做視帝目中無人，鄭嘉穎被有份拍《拳王》的冼灝英怒插，兩人出席宣傳活動更加面左左。


《步步驚心》大收旺場，帶挈鄭嘉穎人仔滾滾來。早前，在橫店拍攝《英雄》，傳他力追女主角穎兒。


全程做「獨家村」的鄭嘉穎，吩咐女助手（灰色衫）將飯餸攞上車，拒跟其他演員同枱開餐。


入夜後落起大雨，鄭嘉穎有專人打傘服侍，但視帝對fans的死活卻不聞不問。


65RMB 鄭嘉穎Q版鎖匙釦，價錢唔平。


35RMB Q版謝天華iPhone殼。


39RMB 由十位主要演員做嘜頭的Q版攬枕。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄