左︰艾莉身懷世紀惡菌嘅抗體，人類最後望。右︰喬爾黑市商人，受人錢財帶艾莉潛逃美國西岸，卻漸漸當佢係親生女咁照顧。

漫遊毒物

《 The Last of Us》世界未日靠老豆

做老豆真係好辛苦㗎！父親節有冇好好慰勞老豆呀？今個星期，唔只有韋史密夫喺《末日 1000年》帶親生去末日地球大冒險，加上畢比特參演嘅喪屍災難片《 World War Z》都係末日救家人，撈埋一齊出奇地似《 Uncharted》系列製作室 Naughty Dog嘅 PS3獨家新作《 The Last of Us》！
遊戲內，玩家可體會做老豆之苦，由本來做蛇頭偷運小女孩出境，漸漸變得情同親父女，喺一街喪屍嘅浩劫地球中進行大逃亡！

《 The Last of Us》

機種： PS3
廠商： SCE
類型： AVG
語言：中英文字幕/英文對白
人數： 1P/多人模式 2-8P
日期： 6月 14日
價格：$388

真菌四散父女情

開 game後主角喬爾將經歷一場世紀浩劫，(序章劇情太震撼，筆者唔想劇透)。轉眼 20年，感染事件後冇被「蟲草真菌」感染成為喪屍嘅人類只淨番少數，各國政府解體，文明接近滅亡，求生成為人類唯一守則，大家只靠軍方隔離區保護，以軍事物資度日。不過有人類地方就有貪婪慾望，主角喬爾本來係個有錢乜都肯做嘅黑市水貨客，某日接到任務護送小女孩艾莉逃離軍方追捕，橫渡去目的地美國西岸，但漸漸得知不少末日真相、更與艾莉發展出一段父女情。製作人早已聲言自己係 PS2名作《 ICO》超級粉絲，該遊戲永遠有個小女孩跟住主角，非常強調二人同行的重要性。本作 AI同伴絕對有令你嘆為觀止嘅表現，除咗幫你對付敵人、給予提示，故事上表現出嘅親子情、友情，更係有如電影般有血有肉，加上劇本精采萬分、令人感動到喊。

艾莉係少數唔怕末日惡菌「蟲草真菌」嘅人類，主角係咪帶佢去救地球？

對白劇情及互動耍素，完全超越同類遊戲，仲要有中文字幕，值得細心欣賞。

故事開始時主角父女搏命逃離喪屍追咬，你唔只冇武器，仲要抱住個女行得頗慢，夠晒緊張！

喪屍滿街

近年喪屍 game唔只故事公式扮 chok，敵人數量更加係《無雙》化，本作喪屍數量就貴精不貴多，種類主要分仲有人樣的普通雜卒型「跑者」，步速極快但防禦力弱。強一級係感染末期頭部爆開嘅「循聲者」，視力勁弱但聽覺敏銳，你行得太快被發現就好易變成佢兄弟。而最麻煩就係成身肉瘤嘅肥喪屍「巨無霸」，除咗行近死九成，更識遠方投擲毒霧，非常麻鬼煩。

除咗喪屍得人驚，不擇手段捉拿艾莉嘅政府軍同樣可怕。

幾隻喪屍齊出已經令人好頭痕，恐怖感返晒嚟。

完美廢墟　末世求生

以往喪屍求生遊戲，舞台常困於固定建築物內，本作雖不如《 GTA》嗰類 sandbox遊戲咁大個城市任你走，但一樣會不斷玩、不停轉換宏偉場景，遊戲過程橫跨美國東西岸，各處荒廢景象實感驚人，令玩家完全置身末日世界，感受吓人類死剩種嗰種折墮生活，咪話玩電腦篤滑鼠啦，衰到要食死老鼠呀！簡直係對消費文明一大諷刺。
講到爛身爛勢，《 The Last of Us》主角冇《 HALO》裝甲或《 Bio》靚靚軍裝，兩個主角拎住背囊就闖天下，遊戲中要不時留意四周景物，尤其玩普通或以上難度，補給物資經常性不足：子彈、回復道具，仲有強化武器用的「零件」、提升主角技能的「維他命」，要當正自己係拾荒者咁執，一件不能少！

呢間係黑心燒肉店，要排隊買燒老鼠肉食，仲恐怖過執舊水瓶裝果汁。

遊戲細心地製作咗好多荒廢已久的城鎮，呢一幕走入黑膠唱片鋪，電筒光源處理空前逼真。

玩本作令筆者諗起以前玩《生化危機》，每粒子彈都珍貴非常，真係粒粒皆辛苦。

按 R2可發動聆聽系統，聽取敵人聲音位置進行絞殺，咁就可以慳番啲子彈。

發現工作台就可用「零件」改造武器，強化上彈數、射程等等。

獵人 Vs螢火蟲　兩大陣營網上血拚

多人模式中，你可以選擇 2大陣營「獵人」及「螢火蟲」，進行 4 Vs 4團隊對戰。遊戲以 12週共 84日為一個循環，一場對戰代表 1日，主要對戰模式有 deathmatch「生存者」及搶資源「支援團隊」兩種，其間玩家可挑戰各種任務取分， 84局後就分出勝負迎接 ending。玩家除咗殺敵，更要抽時間四處收集物資壯大陣營實力。達成指定要求後，更可獲得額外「齒輪」獎勵，以購買防具、武器強化戰力。

對戰角色有：突擊、狙擊、支援及潛行四種職業，另可裝上各種額外技能，如防止敵人「聆聽」自己位置等等。

對戰時互追亂射絕對唔係首選打法，建議要多活用有「蛇叔潛行」及道具製作等技能去擊敗敵人。