Sony CEO Andrew House全程四萬咁口，講到價錢比 XBox One平 100美元時，笑到露牙肉！ 

Geek友講場

洛杉磯直擊 E3 PS4 399美元低價開戰

一年一度美國 E3電玩展正式展開！今年重點落响 SONY、微軟兩間公司身上，皆因 PS、 XBox後繼機終於正式公布！距離 PS3發售已經講緊 06年嘅事，就快 7年未出過新家用主機嘅 Sony明顯非常重視唔衰得，陪住 PS4公布嘅唔只有由 PS3講到𠵱家嘅《 FF Versus XIII》（更名為《 FFXV》），仲有自家牌頭新作，震撼消息不斷，最重要係定價低開 399美元，$3,000家吓連新手機都買唔到，何況係一部８核家用遊戲機？絕對係低價搶市場！

今次發布會喺美國時間 6月 10日晚上 6點於洛杉磯 Memorial Sports Arena舉行，容納到大概 8,000人， 01年周董周杰倫都揀呢度開個唱。 

未入場仲有 snack畀舟車勞頓嘅全球記者頂肚，有心。 

呢個 moment成為全場、甚至成個 E3重點，「 PS4支援二手 game」！

會上示範 PS4遊戲，因為係工程機，試玩《刺客信條 IV: Black Flag》時經常都 lag到冇聲。廠商： Ubisoft• 1人用•動作• PS3版 11月• PS4 2013年尾 

AC4:Black Flag 

新機黑媽媽　可以玩二手

E3開 show前一日，美國時間 6月 10號， Sony先招待全球媒體到佢自家發布會，未入場已經知肯定有 PS4公布，不過一開始前都先介紹今年 PS3重點作，包括《 GT6》、《 The Batman: Arkham Origins》、《 Beyond: Two Soul》等，但反應當然遠不及 SCE總裁兼 CEO Andrew House拎部 PS4出嚟咁震撼！
以目前外觀睇， PS4全黑方正外形跟弧形機身 PS3完全唔似、型唔型見仁見智，卻隔代遺傳厚版 PS2嘅 DNA。之後現場更即時重點列出 PS4功能： 8核 AMD美洲豹 CPU跟 XBox One同級，用上高價 GDDR5 RAM、 3D功能高對手 33%左右。此外，針對 XBox One限制二手遊戲轉售、借 game畀朋友玩加設的限制， PS4一一開綠燈，換來全場近一分鐘掌聲，另外亦無需每次開 game都要連線認證，擺明針對性出擊。此外， PS4定價為$399美元，比 XBox One平足 100美元。雖然 XB One包埋 Kinect係抵玩，但 PS4可視乎需要選購配件，自由度又比對手大啲！

Andrew House拎出手上呢部 PS4時全場歡呼，真係等咗好耐啦！ 

香港遊戲網站 Blogger　 Milk Ng我睇完 Microsoft嘅發布過嚟，感覺上 XBox One冇乜新意，遊戲係幾好，但好多都唔係獨佔，佢哋唔支援二手遊戲，等於剝削遊戲擁有者權利，我唔鍾意。 PS4整體上都係不相伯仲，最吸引嘅係定價，平 100美金相差好遠。 

PlayStation4 spec.
處理器：八核心 AMD Jaguar
GPU： 1.84 TFLOPS, AMD next-generation Radeon based graphics engine
記憶體： 8GB GDDR5　容量： 500GB
光碟： BD6 CAV/ DVD8 CAV
端子： USB3.0、 HDMI、 AUX、 Digital Out
體積： 275× 53× 305mm　重量： 2.8kg
售價： 399美元（約$3,100）　
推出日期： 2013年底

PS4機背共 5個駁口，只估到 USB 3.0、 LAN、 HDMI、電源，仲有一個係咪駁 sensor bar呢？ 

全球圍試 PS4

翌日記者正式入場 E3， Sony終於展示出 PS4主套實機任影，幾十間傳媒齊齊圍住影，想埋去都唔係易。記者幾經辛苦影完相，又要去排隊試玩 PS4遊戲，雖然數量唔多，亦只係「小遊戲」唔係大製作，但入得場嘅玩家基本已經可以拎到 PS4全新 Dual Shock 4手掣上手玩，實試後發現之前睇圖以為手掣大咗只係錯覺，雖然多咗塊 TOUCH PAD响面，但唔影響操作，感覺亦冇特別重過 PS3手掣。

PS展場一片藍海，重點都係 PS4試玩區同 PS3遊戲，反而 PSV得番一小角落。 

正常手掌大細，拎住唔會唔舒服， analog設計更有質感，震動效果亦比以前更勁， good！ 

手製底向 XBox學習，加設有線耳機駁口；另外手柄加咗防滑膠，大汗人唔怕玩 move飛手掣。 

必 Check注目作

以下呢三隻 PS4新作雖然未有得試，但全部都係足以成為出機誘因嘅頂級作。

《 Final Fantasy XV》

由《 FF13》宣布玩雙主角開始， Lightning姐不知不覺出到第 3隻 game，本來宣稱會獨立出 game的男主角 Versus， 6年後仍然影都唔見。今次 E3佢終於高調現身，正名為《 FF XV》撐 PS4，新作改成動作遊戲，雖然已經一拖再拖，片又唔多，但睇現場反應仍然算熱烈，鐵定唔使再等 PS5先有得玩，已經要燒炮仗！
2014年內•人數未定•動作 RPG•售價未定

《 Infamous: Second Son》

內部記者會已經有得試玩，不過全程唔畀影相拍片。故事係以系列主角 Cole個仔 Delsin為主，佢同樣擁有閃電、火焰等超能力，試玩可見戰鬥系統已經有一定完成。
2014第一季• 1P•動作類•售價未定

《 Driver Club》

由越野車《 Motorstorm》系列開發商 Evolution Studios度身訂做，只要有 PSN Plus就可以免費下載，特色係「汽車用」社交平台，賽車時朋友可以亂入挑機。
跟 PS4主機同步推出•人數未定•駕駛• PSN Plus用戶免費下載

實 game即試　新世代畫面更細緻

PS3係 06年出品， 3D畫質已追唔上電腦，唔少高要求機迷近年都改用 PC打《 COD》等 FPS遊戲。記者試玩完 PS4，覺得佢畫面終於追番 7年來差距，直迫中階 3D電腦，動作流暢而且冇晒狗牙格仔。睇圖未必完全 feel到分別，希望香港 Sony年尾搞 Asia game show會有 PS4畀香港人親身體驗吓！

PC級震撼射擊《 Warframe》

《 Warframe》本來係 PC平台嘅高清 FPS射擊遊戲，移植落 PS4後畫面勁靚，動態效果亦理想，最喜歡佢用得盡 PS4手掣，比如用 PS move作體感瞄準、正式面世時連 touchpad觸控板都能用埋，絕對係 PS4機能示範作。
廠商： Digital Extremes• 2014年發售

現場只得 4部機試《 Warframe》，遊戲畫面絕對係超強級數，試玩感覺亦唔錯，唔係睇得唔玩得。 

《 Warframe》角色有職業設定，能自定義嘅裝備同能力唔少，仲可以同電話連動，出街都可以改外形。 

多邊形大晒冷《 Knack》

《 Knack》係今次試玩機台最多嘅遊戲，主角係一部迷你機械人，一路打怪獸一路吸收四周嘅碎片，如路邊汽車、敵人武器，令身體不斷變大，而且身上每件碎片、細至手指關節都係用獨立 3D多邊形組成，可以晒畀人睇吓 PS4多邊形數量有幾勁。

Knack最初只係 Q版身形。 

變到成層樓咁大，坦克車都唔驚！ 

PS3依然強勢

咁係咪唔買 PS4年尾冇 game玩？記者覺得 PS4真正高潮會係 2014年頭，年尾聖誕反而要留意 PS3！事實上 E3場館仲重點展示咗《 GT6》、《 Beyond： Two Souls》同《 The Last of us》，玩埋真係可以換新機！

《 GT6》試玩人龍勁長，全程車玩五分鐘左右，過下癮都抵排嘅！ 

以《潛行凶間》女星 Ellen Page為女主角嘅遊戲《 Beyond： Two Souls》賣女性英雄，少少似新版蘿拉。 

美國的 booth baby都唔會作性感打扮，日系龍友應該會失望，入鄉隨俗冇計啦！

PS4新作：一嘟即睇

Driver Club 

FFXV 

Infamous

Knack 

Warframe 

拆樓、跳傘、 Tablet指揮　 Battlefield 4今年必爆

唔計三大廠商，數到今年 E3最注目遊戲廠， EA認第二冇人敢認第一。首推 32Vs32嘅《 Battlefield 4》，試玩一段上海地圖對戰，玩家先由直升機空降落地，穿過隧道又搭 lift上大廈頂層，响上面定位呼叫空中部隊支援後，即時再由高空跳落地，空中打開降落傘着地後游水埋岸，回頭一望，成棟大廈炸冧斷成兩截！以上全部係遊戲做到嘅實際情況，型到你唔信！
有得玩、記者點忙都要排隊試！玩後感係遊戲非常重視團體組織性，載具多到一次試玩用唔晒，兩個字：「過癮！」留意唔係次世代作品， PS3同 XB360喺 10月 29號已經有得玩。

廠商： EA• 1至 128人用•戰略射擊• PS3及 XB360平台• 10月 29日發售•售價未定

E3會場全日上映 64人混戰，排隊排半個鐘左右就玩到，抵排！ 

除咗出晒名見乜坐乜自由度高之外，今集勁到連高樓大廈都可以炸冧，遊戲引擎勁到已經近乎奇蹟一樣。 

科技進步咗， 2代後再度回歸嘅 Commander mode，今次仲可利用平板操作（場內未有得試）。 E3現場招積到有個指揮中心，大芒可以睇地圖落指示「統率三軍」，旁邊就監視晒所有隊員個屏幕，邊個偷懶即時知。

進擊巨人降臨《 Titanfall》

除咗《 BF4》， EA另一隻 FPS《 Titanfall》亦唔能夠唔講，由《 COD》開發小組 Respawn Entertainment開發，佢哋口氣大到話隻 game會重新定義新世代遊戲。玩家可以用兩段式跳躍裝置飛簷走壁，亦可以坐上稱為 Titan嘅機械巨人上作戰，感覺勁似《進擊的巨人》。
廠商： EA•人數未定•戰略射擊• PS3及 XB360平台• 2014年初發售•售價未定

E3開幕前嘅 EA發布會，選擇响近百年歷史嘅聖殿劇院舉行，門口一隻巨人 1:1模型，同劇院嘅氣派裝修一樣咁矚目。 

立體機動裝置？人類打機械巨人？概念似足七成！《巨人》 fans都可以玩住當係遊戲版。 

日廠靠續集　雷光+蛇叔救駕

廠商： Square Enix• 1人用• PS3及 XB360• RPG•日版 11月 21日推出 

廠商： Konami• 1人用•動作•推出日未定E3場內冇 game試，不過就有條超血腥 Red Band版預告，網上仲可以搵埋 cut走血腥位嘅 Green Band版。 

新作預告：一嘟即睇

Battlefield 4 

MGSV 

Titanfall

XBox One　神作壓場

XBox One早已作全球公布，相比可以睇住對手嚟打嘅 PS4自然輸蝕得多。今次 E3記者會惟有狂谷遊戲作品，打頭陣已經有神級製作人小島秀夫站台幫手宣傳《 Metal Gear Solid V》，亦有 EA出手將兩隻超大作《 Battlefield 4》同《 Titanfall》放响 XBox One記者會度公布，仲有《 Dark Soul 2》等隻隻都極有吸引力，但其實都唔係獨佔作品，除開只有《 Forza 5》、《 Dead Rising 3》、《 Project Stark》等較有睇頭，可惜都唔係超級賣點。

XBox One外形用「動態磚」概念設計，同樣用 AMD「 Jaguar」架構、 8核心處理器，輸蝕在係用 8GB DDR3，而非 PS4嘅 GDDR5記憶體，仲有傳佢粒 GPU繪畫多邊形數比 PS4少，但有待證實。 

相比 Sony個 booth， XBox One場館設計比較開揚，通道闊落啲，但試玩機就少好多，唔知係咪要留空間玩 Kinect呢？ 

E3個 XBox展館同樣好多試玩， XBox One實機亦多，人流好旺。

XBoxOne spec.
處理器：八核心 AMD Jaguar
GPU： 1.23TFLOPS, AMD
記憶體： 8GB DDR3
容量： 500GB
售價： 499美元（連 Kinect套件，約$4,000）
推出日期：美國 2013年底推出，香港 2014年推出。

3大獨佔作！

《 Dead Rising 3》喪屍增值
《 Dead Rising 3》今次變埋 XBox One獨佔，全新 open world大地圖唔再困獸鬥，喪屍數量多到似畢彼特新片《 World War Z》，出機必玩！
廠商： CAPCOM• 11月推出•人數未定/售價未定

《 Spark》神之手
《 Project Spark》玩法好難形容，簡單講玩家就好似神一樣，要自創人物世界同玩法，好玩與否考你智慧，屬黑馬作品。
廠商：微軟•發售日及其他資料未定

《 Ryse：羅馬之子》揮軍打無雙
獨佔作品中比較似樣嘅動作遊戲，以 CryEngine 3遊戲引擎為基礎，《 Ryse： Son of Rome》要控制主角帶住千軍萬馬攻城掠地，遊戲主要用手掣打，但有時又要體感 Kinect打手勢命令士兵作戰，幾有趣。
廠商： Crytek Studios•發售日及其他資料未定

XBOne新作：一嘟即睇

Dead Rising 3 

Ryse 

Spark

任天堂年底反擊戰

早排因為一份財政報告搞到任天堂好似就消失一樣，實情心水清都睇到老任係放棄淡季，更有策略地响旺季、消費節日先重手出擊。三大主機廠中，得老任選擇網上直播「 Nintendo Direct」發表會，唔搞大龍鳳，但配合會場內即時設置多部新作試玩，殺手級屈機大作《 Mario Kart 8》嘅 gamepad細芒連動，暫時知道可以睇排名、用道具同改變操作方法，但應該唔只止咁少料。另有《薩爾達傳說》、《 Pikmin 3》等多部機任試。事前以為平平無奇，實質已經開始發力，搞到記者差啲走漏眼！

model呢頂紅/綠帽，係全 E3最難入手的紀念品，要排勁長龍玩《 Yoshi's New Island》羸咗先拎到，記者只能帶住遺憾放棄。 

任天堂最特別係場內有多個影相擺設，自己冇相機現場都有攝影師幫手，事後畀番 email就會收到張相，又係「 must影」之一！ 

率先試玩孖車 8！

場內試玩對打「孖車 8」，個個都仲係玩到大叫大笑鬼殺咁嘈，通過遊戲有咁即時同真心反應，老任嘅遊戲仍然超強。
1-12人用•駕駛• Wii U• 2014年發售•售價未定

《孖車 8》可以分割畫面 2P、 4P， gamepad細芒都有連動玩法。 

E3任天堂展場睇落冇嘢，但原來唔少新作試玩，好多隻完成度仲十分高。 

扮貓《 Super Mario 3D World》

新作玩有深度嘅 3D地圖， 4個角色孖寶兄弟、桃公主、冬菇仔各有特長，最新變身係扮貓，可以爬牆同空中飛腿攻擊，好玩。
1至 4人用•動作• Wii U• 11月發售•售價未定

平面《 Zelda： A Link between Worlds》

《薩爾達傳說》最新作，似番手提機 Q版角色、高空俯視玩法，新元素係可以變成 2D牆畫，食正副題：穿梭兩個世界。
1人用•動作冒險• 3DS•美版 11月發售•日版細節未定

就出《 Pikmin 3》

全個任天堂攤位最快發售係呢隻《 Pikmin 3》，要控制 4色外星小矮人收集同伴，用腦又可愛。 Gamepad仲可以化身為小矮人第一身視點嘅相機，成個舞台任你 snap。
1-2人用•智力• Wii U• 7月 13日版、約$480• 8月 4日美版、約$400

異類《 Bayonetta 2》

𠵱家玩老任主機，唔再只得可愛遊戲，「日本動作 game之神」神谷英樹製作嘅長腿魔女射擊+華麗動作 game，估唔到第 2代會成為 Wii U獨家作！
1人用•射擊動作• Wii U• 2014年發售•售價未定

人多《 Super Smash Bros》

一個畫面有幾個角色打來打去、呢個大亂鬥系列《 Smash Bros》都有唔少捧場客，今集有 CAPCOM《洛克人》客串，仲可以 3DS、 Wii U雙平台互片。
2014年發售•其他細節未定

勝負已分？主機大戰，總結：

兩大廠商再次正面對決，金錢有限嘅你肯定十五十六。不過《 FACE》記者已投咗 PS4一票，原因得一個，就係贏在起跑線上。淨計遊戲軟件，表面睇 XBox較強，但其實佢連線內容都未知香港有冇得用，而且獨佔大作唔多，其他 title純睇玩家口味，基本上係打成平手，用家體驗又各有 XBox Live同 PSN。但 PS4冇二手遊戲限制，亦唔需要強制上網先打到機，淨係呢兩個睇落簡單嘅重點已經完勝 XBox One，畢竟遊戲嘅擁有權應該係玩家而唔係廠商，加上機能更高嘅 PS4定價仲要足足低 100美元，微軟若然响出機前都唔改變策略，相信場仗可以唔使打。

《 FACE》 Gadget版監修人 903 DJ Donald

我咁鍾意打機，一定買晒兩部新主機，所以唔使問我揀邊部！不過，個人傾向 PS4開放取向，因為有時啲 game都會同朋友 share玩，今時今日網絡一代，乜都講自由，少限制當然更好。題外話，其實睇完呢啲 game show稿，最怕就係隻隻遊戲都 delay，搞到我有機冇 game玩，請有關方面落力啲，準時出 game！

撰文、攝影：熊俊彥