人氣總選9變4
19歲嘅莉乃，身高5呎2吋，而且上圍只得30A，冇乜身材，但勝在儍更更性格討人歡心，今年大躍進，殺入人氣總選第4名。
AKB48人氣總選結果終於出爐，賽前AKB一姐前田敦子宣布提早畢業棄選，卒之由死敵大島優子大熱勝出重奪票后寶座。不過最令人驚喜係上屆只掹車邊攝位排第9嘅指原莉乃，今年連跳5級排第4，成老闆秋元康新寵。
今年19歲的莉乃，唔算靚女但勝在儍更更又勤力，仲唔介意扮醜引人笑，最重要係聽教聽話，連老闆秋元康都點名佢係隊中最努力成員。不過上週忽然爆出佢同前男友嘅情慾照，有相為證好難扮儍，莉乃仲有冇得繼續升呢定係一鑊翹起，就要睇老闆秋元康撐唔撐佢喇！
買碟換選票
莉乃能在人氣總選成功上位，除老闆力捧之外，據知背後原來有家鄉九州大分縣官員發功，最近網上盛傳有大分縣議員發現，該縣官員涉挪用原本作維修動物園約25萬港元，改為買唱片換取選票，還將所有票投落莉乃身上，藉此幫她上位，有埋後台，莉乃唔上位都難。成功上位的莉乃，今年已拍過3套日劇，一部電影，仲廣告一個接一個，工作量同一姐大島優子有得揮，最近上綜藝節目《一笑無妨》中，佢大口氣話：「我願望係下年總選攀上第1位！」
前男友出賣
莉乃個樣儍更更，但最近都爆出原來係「肉食女」。日本爆料雜誌《週刊文春》上週爆大鑊，指自稱係莉乃前男友的人爆料，2人拍拖4個月後，曾到一商務酒店爆房，仲強調當時2人都係第1次，可惜由於莉乃愈來愈紅冇時間見面，最後提出分手。莉乃上緊位先搞單咁嘅嘢，上週五（15日）AKB48嘅經理人秋元康開腔話：「𠵱家會叫造成話題嘅莉乃解釋！」還安排她上週六出席《AKB All Night Nippon》電台節目自己解畫。最新消息係，莉乃雖然無被踢出局，但就被公司調去九州博多，加入師妹組合HKT48。燉冬菇當係懲罰囉！
追貼敦子
出道5年，今年頭先出處女寫真《Sashiko》，至今大賣超過10萬本，成2012年上半年最高銷量寫真集第2位，同第1位敦子嘅《不器用》銷量只差1,345本，追得好貼。
老闆新寵
今年AKB人氣總選大執位，除咗指原莉乃大躍進，屬於SKE48成員嘅松井玲奈亦冧莊殺入十大裏面第10位，難得SKE成員咁爭氣，老闆秋元康當然點名玲奈成2012力捧新寵。
最近日本《週刊文春》登出莉乃前男友 所拍嘅情慾照，不過個樣遮咗大半，張露bra相又連樣都睇唔到，真係好難肯定相中人真係莉乃。
6月頭舉行嘅AKB人氣總選中，由上年第9位連跳5級進軍第4位嘅莉乃，攞獎時開心到喊晒口。
2012年半年內莉乃已拍咗3部電視劇，最新一套係5月尾已首播嘅《兒童警察》，劇中莉乃以儍妹女警姿態演出，做番自己。
封面常客成為秋元康愛將後，莉乃今年唔只頻頻做漫畫雜誌如《月刊Young Magazine》封面，連OL時裝雜誌《JJ》都搵佢吸客，大小通吃。
老闆明錫 AKB老闆秋元康曾上電視公開讚莉乃好有推動力，睇好佢會上位，老細開到口，莉乃紅硬啦！
留言列表
