Fun App

App爆機

早排張家輝輯爆肌相一出，立即震驚 facebook；到呢排晚晚睇《求愛大作戰》，都聽到班盛男話想練大隻去追女神，可見男人有番幾 muscle傍身，真係一大賣點嚟。
不過肌肉總唔係話有就有，對抵唔住地獄式操練嘅人嚟講，想爆肌更加係天方夜譚。好彩𠵱家科技發達，一個手機 app就能將不可能變可能，為閣下平平無奇嘅軀體徒添一身橫練肌肉，就算呃唔到人，對得啲相多，話唔定真係能激發出操練決心。

即加朱古力

Abs Booth
iOS Free/ Android$15.43
一身肌肉當中，最煞食始終係 6嚿腹肌，要將自己變筋肉人，首要梗係加排朱古力落肚！呢個 Abs Booth app就係專幫人喺相入面 key上腹肌，雖然可揀嘅肌肉素材只有 3款，但勝在有得校 size同顏色，去夾番你嘅身形同膚色，畀少少心機 key的話，真能整到似層層。況且腹肌又唔係咁突出，只要你平時密密實實，班 friend突然見你貼張爆肌相上 fb，真係信你禾稈冚珍珠都唔奇，呃到人嘅機會比胸肌或臂肌大得多，而且男女都啱使添。

iOS 

Android

谷肌 step

1. Load圖
開 app後即時影相或載入相片都得，記住個身愈正面 key得愈似，一於搵番張家輝變肌男前嘅相嚟玩。

2.揀肌
跟住就可以從 3嚿預載腹肌中揀嚿最夾身形嘅。個 app仲有其他卡通腹肌，但 key真人相唔啱使。

3.調校
之後篤底下啲掣，即能調校腹肌大細、長度、闊度同顏色，務求 fit到其他肌肉同膚色。

4.完成
原圖張家輝雖已好紥實，但腹部冇肌肉凸起， key完即明顯見到 6嚿。當然想 po相更真實的話，張相 lighting最好有陰影遮遮掩掩，或者用 app加啲顏色特效去掩蓋破綻。

筋肉萬能 key

Muscle Maker!
iOS$8
若你個 body「豐滿」到 key肌肉都冇人信，咁不如成個身換咗佢。呢個 Muscle Maker! app有 7個健美先生同 1個健美小姐嘅身畀你 key個頭上去，雖然擺明唔真，似足呢排啲人用張家輝個身做萬能 key咁款，純粹得啖笑，但好在自我感覺一定良好！更啱用嚟惡搞朋友，鼓勵佢減肥。

先從 8個 body中揀一個。 

然後再 load相，個 body就會退咗地疊上原相上面，只留番個頭，想見多啲爆肌身的話，張相就唔好咁大頭。 

變身前後照

Gym Photo Progress
iOS$23
若閣下已下定決心練大隻，喺實行前請先買呢個 Gym Photo Progress app。事關只要喺操練前用佢影定啲相，當有朝一日你變成筋肉人後，再用佢喺相同 angle再影相的話，佢就識將操練前後兩張相半透明疊埋一齊，令人睇到變大隻前後嘅對比，效果一目了然，勁有滿足感！

預設正面、舉臂、側身幾個指定 pose畀人跟住影，自己度新 pose亦得。 

變身完成後，前後兩張相一合埋，就睇到身形變化有幾大。 

撰文：陳兆奇
部分攝影：傅新發