豉椒牛肉寶老團$50卷面加入大量七味粉，伴着香濃豉椒香及條條牛肉嫩滑惹味，層次豐富。

潮𡃁便當

夏日 Keep Rolling

天氣熱，胃口自不然差，簡單分量少嘅手卷，以濃味開您胃嘅土耳其卷、凍住嚟食嘅海蝦三文魚卷、酸酸甜甜吉列豬扒卷，至玩嘢嘅蒸魚豉椒牛肉卷，走夏日 mode歡迎外賣，邊行邊食都得，非常切合夏日 casual態度。

米芝蓮級　中墨手卷健康食

行開中環見到賣一款「寶老團」，原來乃墨西哥 burrito(餅卷)的變奏。由出名愛用食材大搞新意的米芝蓮星級名廚廚魔 Alvin Leung開設，帶入中日元素，例如在牛肉糰加上豉椒、手撕雞糰加入四川辣油芝麻醬、蒸魚糰上加入蟹籽，就咁睇以為係壽司， fusion味加創意十足！烹調食材的方法以健康為主，蒸魚糰的魚肉以低溫 60度烹調，務求肉身更滑，營養不會流失；牛肉糰選用美國安格斯西冷低溫烹調至 medium rare，因此要烹調足 2小時，慢工出細貨，難怪肉身好腍軟。

3D Diabetic Special$50雞肉汁香滿溢，露筍爽口勁 refresh，仲有紅米粒粒分明，有嚼勁。

八珍甜醋沙津$50除了寶老團，店內亦有沙津提供，醬汁酸酸甜甜用上中式甜醋汁，雞蛋食落似煲薑醋嗰陣味但蛋身嫩滑，新奇又開胃。

粵式蒸魚$50鯛魚肉異常嫩滑，層層分明，最正是有脆卜卜蟹籽及有咬口紅糙米，大過口癮。

四川辣雞寶老團$50辣味頗為突出，雞肉有強烈芝麻香，一句講晒，開胃！

食客 Stephane Loupy
瑜伽老師
叫咗粵式蒸魚，每道餡料味道分明，有創意，幾特別，價錢 ok，同埋至重要健康。

Beautifood
地址：中環德己立街 21號 The Plaza LKF地下 B號鋪
電話： 2521 6233
營業時間：星期一至三： 12nn-9pm，星期四至六： 12nn-1am(星期日休息)

重口味開胃　薄切牛雞卷

旋轉烤雞肉卷$50用上比利時雞，肉質不嚡而且腍軟，當日叫咗小辣，好香口！

在中環扶手電梯近荷里活道橋底，大半年前開了一間土耳其烤卷小店，最地道莫過於有一部土耳其式旋轉烤肉機（ doner kebab），一大嚿雞肉不停旋轉，以機身背後熱力烤熟肉身表面，然後由店員將肉片逐片切下，再用土耳其地道來貨的烤卷皮（ lavash）包裹，勁似去咗當地。小店提供牛、雞、羊及蔬菜等味道，可因應愛辣程度點大中小辣，當中雞肉出奇的腍軟，微微帶辛，強力推介；羊肉羶味不會太濃啱啱好，一咬肉汁澎湃，愛羊者要試！

旋轉烤牛肉卷$50牛肉味突出，肉身具分量，伴生菜及番茄，大大減低膩口。

土耳其烤羊肉粒卷$65羊膻味適中，一試無妨。

食客 Sylvia Lam
會計及行政
我通常食羊肉卷，因為醬汁香濃，有蔬菜好新鮮，肉亦夠腍，一句講晒唔錯。

27 Kebab House Turkish Restaurant
地址：中環荷李活道 27號地下 D-E號鋪
電話： 2795 2727
營業時間：星期一至四： 10am-6pm；星期五、六 24小時營業(星期日休息)

韓國媽媽級　吉列豬扒卷

三個韓籍主婦 Laura、 Grace、 Sunny膽粗粗開韓國食店，以為無人問津，偏偏媽媽級味道引來不少客人，外國人、韓國人、本地人都食，店內一款 korrito最為特別，原自 burrito一字，乃 Grace在墨西哥居住時最喜愛的食物，因為店內主打韓食，所以改名"k"orrito，有 fusion之意，例如一款 tonkatsu korrito，饀料其實是吉列豬扒，連醬汁都甜甜酸酸似足吉列豬扒汁，感覺好哈日，加埋生菜、甘筍及脆脆增強口感，好開胃。另外仲有雞肉、蝦肉及豆腐 3種口味任您揀。

Tonkatsu Korrito$58Tonkatsu即吉列豬扒，醬汁酸酸甜甜，仲有富心思脆脆，一試上癮。

Chicken Korrito$58雞胸肉略嫌嚡口，勝在有 honey mustard醬甜伴住食，唔至於乾啃。

Laura、 Grace老友鬼鬼， 8月更打算在港鐵香港站開分店。

K-Roll
地址：上環文咸東街 6號順發樓地下 6A號鋪
電話： 2234 5505/ 2234 5506
營業時間： 11:30am-8pm（星期日休息）

芝士香爆燈　凍食全麥餅卷

夏日千島蝦薄餅卷$39海蝦蝦身細小，由於撈入自調千島醬汁，鹹香鮮味，令整個薄餅卷味道 double up。

英國三文治專門店 Pret為迎接夏日，全線分店將在 6月 19日出售 3款薄餅卷，包括芝麻雞肉、千島海蝦及蘇格蘭三文魚 cream cheese卷，全部以墨西哥全麥薄餅包裹，纖維豐富，食落有粗粒帶口感，首推三文魚 cream cheese卷，片片肥美三文魚配用上辣椒、黑椒撈過的忌廉，濃郁好味，惹味紅洋葱畫龍點睛，令味道層次更複雜。

蘇格蘭煙三文魚忌廉芝士薄餅卷$39肥美魚肉濃郁芝士，看準三文魚芝士怪 taste嚟殺，實 buy！

芝麻雞肉薄餅卷$39雞肉厚身，配以醒胃芝麻醬汁後增強食慾。

芝麻鴨肉沙律$52醬汁香濃，有大量雜菜，清爽！粒粒鴨胸肉令菜式味道更豐富。