曾當新聞主播的張慧慈，多才多藝，現時身兼數職，既是無綫《東張西望》主持、專欄作家、作家，又與丈夫開設思維培訓中心，擔任NLP（身心語言程式學）專業培訓師。最近，她更多了一個身份，就是初嘗當母親的角色，照顧三個月大的兒子。

在大學時副修心理學的張慧慈，除了平時教導不同階層的學生之外，更將這些理論應用在育兒方面，訓練兒子養成有規律的飲奶習慣，聽教聽話。

張慧慈的兒子叫何日楠，外形「肥嘟嘟」，性格乖巧，好奇心強，喜歡與人接觸，深得父母的寵愛。

邊教書邊胎教

三十九歲的張慧慈與何偉光結婚十五載，二○一一年計劃生兒育女，終於在去年心願達成，現在兒子三個多月，初為人母的她當然開心，但表示沒有刻意想生龍BB。「本來我想兔年生仔，反而唔想龍年生，因為又要爭牀位同埋讀書問題，但生仔嘅嘢唔係話你想生就有。」懷孕期間，張慧慈沒有感到特別不適，只覺得很疲倦。而懷胎八個月的她，更自行駕車往返無綫電視台錄影節目，身形沒有出現水腫，令她上鏡依然美艷。「可能BB知我做幕前，所以特別乖，上鏡雖然唔肥，其實我下身係好肥呢！」

這一切源自張慧慈胎教有方，由於她是NLP（身心語言程式學）專業培訓師，教書至懷胎九個月，所以兒子出世後三個月已牙牙學語，亦喜歡聽人說話，觸覺特別敏銳。「我同啲學生講佢哋最細嘅同學就喺我肚裏面，其實我一路上堂，佢潛意識一路接收緊嘢。出世後，個陪月同我講未見過BB咁多嘢講，佢鍾意同人傾偈同埋聽人講嘢，亦好積極咁搶奶食添。」而且幾個月「人仔」已有潔癖的習慣。「可能我有少少潔癖，所以影響到佢潛意識都有，佢未夠一個月，個陪月同我講佢要解咗條尿片先會去便便，唔鍾意噏住，依家已經可以扶住佢坐喺痰罐仔度去便便。」

兩夫妻在2005年開始從事思維培訓的生意，無論在工作和日常生活上合作無間，非常有默契。

張慧慈主持無綫節目《東張西望》時，斯文大方，展現她曾任主播的風範。

腹大便便的張慧慈，早前出席拍檔麥雅緻的婚禮，與同為人母的陳倩揚合照。

張慧慈憶述有次兒子因為肚風而大哭，當她替兒子按摩後，兒子報以甜美的笑容，令她大為感動。

湊仔資訊庫強

平時張慧慈以home office為主，兒子出世後，自然分配多些時間給他，特別留意兒子的一舉一動，從而了解兒子所需。「工人主要負責餵奶同換片，我就同佢玩，同埋觀察佢，例如：佢叫到好似中槍咁就即係要去便便，大叫但冇眼淚即係肚餓，喊到面青係有肚風，我覺得做媽媽一定要對BB有所了解。」其實，張慧慈在育兒方面亦頗有心得，看書、上網及收集朋友、媽媽及兒科醫生等不同人的意見，再集思廣益，透過不斷嘗試及調整從而找出適合兒子的一套方法。「我嘅育兒資訊庫好強，因為我耳聽八方，甚麼人嘅意見都聽、再試，同埋都想做個榜樣畀個仔，想佢將來有求學和求知識嘅精神，唔好局限只聽某些人嘅意見。」

最實證的例子莫過於解決兒子「肚風」的方法，「佢喺半夜同埋黃昏時就有肚風，仲痛到飲唔到奶，我試咗好多方法，最有效係用某隻油塗係手度，再捽熱隻手，放喺佢嗰肚上面三十秒，再輕輕按摩，然後抱直佢，一路行一路掃佢背脊，呢個方法對佢真係好work。」

初為人母的張慧慈曾以母乳餵兒子一個月，但由於身體不適最終被迫放棄。

開心情緒學習

另外，身為心理學專家的張慧慈，在育兒方面亦滲入心理學的元素，尤其應用在餵奶方面，自小培養他有規律的習慣。「我哋同工人夾晒，唔會佢一扭計就畀奶佢飲，會抱住BB望吓嗰鐘，拍吓佢，同佢講未夠鐘，玩吓先、行吓先等字眼；轉移佢視線，等到夠鐘時先餵佢，就算佢喊，都要等佢收晒聲先畀奶佢飲，亦可以畀佢知道呢個世界唔係一開口就有嘢食，要靠自己努力去爭取。不過，佢始終都係BB，每日都會挑戰你，但訓練一、兩個星期就訓練到佢。」的確，這種「特別」的餵奶方法要媽媽夠「狠」才可以實踐。

講到將來管教兒子的大計，張慧慈滿肚密圈，更與丈夫有一致理念，就是讓兒子在有規律的條件下，開心學習和發展。「依家暫時未諗到畀佢上乜嘢playgroup，但都會揀啲玩嘅嘢多，總之要佢透過玩去學習。不過首先會畀佢多啲嘗試，睇吓佢鍾意乜嘢，再專注學習，唔好搞到周身刀無張利。」開設思維培訓中心的她，笑言可以在家中自行教導兒子。

無論選擇playgroup或學校，張慧慈最希望兒子可以愉快學習，學以致用，並與其他人分享所成。「最想佢有開心嘅情緒去學習，將來希望佢會同我講點解咁快放學，好想返學同埋想見啲同學仔。」而她更打算在自己的工作桌旁邊為兒子加設一張小桌子，大家一起並肩作戰，增加相處時間。「將來我哋做嘢時，佢喺旁邊睇書或做功課，咁佢就知道我哋做緊乜，亦唔會覺得唔公平。」

事業型的張慧慈結婚多年，一索得男，一家三口樂融融，她亦希望得到上天的恩賜，能生多一個。

何日楠初生時喜歡搶飲奶，但在張慧慈的「特訓」下，養成有規律的飲奶習慣，身形胖胖的，幸而不致超磅。