面對面
水能載舟 周柏豪
今年一月，因為一隻打破的水杯，周柏豪在社交網絡上發表了一段約百多字的感言，從而引發了波及全港的抽水大行動。無論報章定雜誌、無論毒男定親子討論區、甚至電視台體育新聞同宜家傢俬水杯促銷，全城響應，不亦樂乎。
經過此次行動，男主角沒有被抽乾，反而因此抽動靈感寫下新歌〈斬立決〉，反諷這個世代盛行的網絡法庭文化，用事實證明，一人一啖口水未必真能浸得死人。本月 28日，周柏豪將舉行一連 3場的個人演唱會，一年開兩次演唱會，場館更大、場數更多：「陳奕迅同我講過，以前都有好多人唔鍾意佢，不過佢同自己講，有一百個人唔鍾意佢，即係出邊有一萬個人鍾意佢……我 buy Eason呢種講法喎！所有評語，我無論好壞一概愈睇愈 high，多人鬧即係多人睇啦，我寫出嚟都係想多人睇咋嘛！」
28歲的潮文原作者周柏豪說這番話的時候，表現硬淨；可是說回當天寫這篇碎杯感言的原因時，卻眼泛淚光……這就是我要說的，很多跟風抽水的人應該不知道，今年 7月，周柏豪最疼愛的外婆因病去世，而寫下潮文那天，正是他帶着暴瘦 60磅的外婆四處求醫正式確診的日子。周柏豪說，水杯落地，對有些人來說是雜音，對那天心急火燎的他來說，反倒帶來了一刻寧靜。
即管笑我
周柏豪打過籃球、教過琴、做過救生員和男模，入行前還在音樂人陳光榮的錄音室裏當過學徒，然後 07年簽約華納唱片正式入行。除了碎杯潮文事件，兩年內在他身上還發生了與陳山聰爭超雲失意豪門事件及巴黎港女合照懸案， 5年職業歌手生涯，周柏豪說被人笑慣鬧慣，早就練到見怪不怪、處變不驚的好本領。 
年頭開過《 See You Soon》演唱會，周柏豪年尾將在大一倍的 Star Hall舉行《 Imperfect Live》演唱會，原定兩場因為訂票熱烈加多一場。
寫〈斬立決〉呢首歌，唔係反擊、全無憤怒，純屬感情抒發，講吓呢種網絡現像，無論喺我定喺人哋身上發生，又或者係攞劉翔受傷網友諸多猜疑做例子， 𠵱家啲人慣咗係咁，有乜事都鍾意你一句我一句，集體抨擊，鬧咗先算。背後嘅原因，唔會深究，冇人關心。 
03年開始做模特兒，穿慣潮服拍慣 chok相：「做歌手後有時啲回應相唔靚仔，我會好嬲網友話我走樣，又怪記者落錯相。」
我都細個過，我都試過跟住大家一齊上網鬧人，就算意見相反，都驚提出嚟俾人鬧埋一份；我都介意過，初入行時俾人話殘話醜樣，會唔開心一輪；俾人笑我報大數：「周柏豪有 6呎高？你 6呎我咪 6呎 6？」我會嬲到瞓唔着……結果，俾人鬧吓鬧吓，個人咪大囉！講真，網絡上有幾多人，見到明星一張撩鼻屎相，就笑人哋「呢條友食鼻屎大」先？ 
潮文事件被全城抽水，周柏豪話當時正為婆婆生病四處求醫，沒有心思為之心煩。
阿媽由細到大都同我講，人哋點鬧都好，我就係我，你鬧我、我又唔會痛嘅？咪當你吹波囉……再加上聽過 Eason一番話，我學識由得人講、由得你笑，甚至見到評論愈多人鬧愈覺得 high，有人鬧咪代表你睇咗囉！愈多人唔鍾意我，即係代表更多人鍾意我囉！
沒有遺憾
入行前曾經是香港籃球隊青年軍，入行後與好友余文樂合組籃球隊橫洲工業：「我係運動員出身，特別鍾意同時間競賽。」
你知唔知，婆婆救過我一命㗎？細個我哋 3兄弟跟婆婆住，一歲嗰年啱啱識行，我走去攬婆婆大髀，唔知佢攞住一盆滾水畀我阻住兜頭淋落嚟。婆婆為咗救我一腳伸開我，但就燙傷成隻腳。佢用偏方篤爆水泡，又搽油又搽香爐灰，搞到發炎有併發症好危險……除咗今年重病，婆婆上一次瞓咗成個星期 ICU，就係為咗我。 
去年初與陳山聰網上罵戰，盛傳是追求何超雲引起。被捲入豪門恩怨後，周柏豪說，以後不敢結識富貴過自己的異性。《壹週刊》圖片
婆婆走嘅時候 84歲，一年前開始病，成日話肚痛、瘦咗足足 60磅。我同婆婆有個習慣，次次喺佢屋企食完飯，臨走都要同佢握握手鬥大力，呢一年時間，我感受到婆婆一日比一日冇力、慢慢由一個肥婆婆變成一個瘦婆婆。我記得入院前幾個星期，我鬧佢唔食飯，佢嬲到成晚唔睬我，直到我臨走，佢至叫住我，攬住我話「多謝」……係好傷心，係好掛住，但係我同媽咪都話，我哋冇遺憾。婆婆都知，我哋個個都好錫佢、個個盡可能抽時間陪佢、佢想做嘅嘢、想要嘅嘢，我哋咩都會滿足佢，喺佢病嘅時候，帶佢周圍求醫；應承婆婆嘅嘢，我哋全部都有做到……唯一冇辦法做到，係我應承咗婆婆要賺好多錢，買間大屋同佢一齊住，同埋，我話過要畀佢睇到我成家立室。做唔到，唔係我哋錯，原來人真係冇辦法同時間競賽，人可以做到嘅，就係喺有限嘅時間，唔好畀自己有遺憾。
有借有還
出道 5年，薛凱琪、連詩雅、何超雲、吳雨霏……周柏豪緋聞女友一大籮，不過正印，其實只有一個。任職時裝集團做買手的女友，有傳早在周柏豪入行時，已經在將軍澳區同居。 7月被拍到與女友赴台看演唱會、外婆去世又帶埋女友奔喪，周柏豪名草有主早已是公開的秘密。 
入行多年，周柏豪常把外婆掛在嘴邊，說與外婆感情最好。
佢見過我阿婆、見過我父母，我所有朋友都識佢。我同得佢出街，就預咗俾人影到，不過我唔會認邊個係我女朋友，無論係真唔係，我唔想影響工作，更唔想連累佢俾記者搞。做一份失去自由嘅工作，係我，而唔係佢嘅選擇。 
7月 25日，周柏豪被拍到與女友赴台觀看 Radiohead演唱會，當晚演唱會結束後，即收到外婆病危的消息。《蘋果日報》圖片
作為男朋友，我冇辦法做所有其他情侶喺街可以做嘅嘢；我份人好鍾意搞浪漫，但係工作關係，我連最基本嘅，畀多啲時間佢都做唔到……係唔係欠咗佢？兩個人一齊，既然有計劃以後嘅路會一齊行，就應該包容對方所有嘢，包括工作帶來嘅不便。同得我一齊，我諗佢就容忍到冇得同我出街拖手、拍拖食飯。冇錯，呢 10年、 20年，我係拖唔到佢，不過以後嘅 40年、 60年，我會拖番夠本。第時大把日子，拖飽佢囉，好唔好？
抹得甩
我和周柏豪都記得，第一次見面做專訪時是在中環街頭，臨尾，一篤雀屎新鮮熱辣空降周柏豪頭上，當下，所有人忍着笑幫忙抹雀屎，周柏豪仰天苦笑：「好嘢……咁大個中環，咁多人，係要屙正我個頭！」
許多年過去，周柏豪說：「當其時會覺得唔好彩、會覺得個天都同我過唔去，其實雀屎咋嘛，抹咗，咪冇囉。對我嚟講，人生都係一樣，冇嘢係抹唔甩㗎。」 
撰文：朱小博
攝影：范仲良
髮型： Cliff Chan@ Hair Corner
化妝： Kris Wong
周柏豪Pakho Chau - 無力挽回 Irreversible MV
留言列表
