上週五（ 30日）晚， PSY現場演繹 hit爆全球的〈江南 Style〉， MV中嘅舞伴泫雅亦上台趷晒籮伴舞，全場 high爆。
真面目
韓流襲港 唔肯整容減肥 PSY霉足 10年大反彈
K-pop界最大型音樂頒獎典禮 MAMA（ Mnet Asian Music Awards），今年轉移陣地，上週五（ 11月 30日）於香港會展舉行，今年最紅 K-pop歌手組合好似 BIGBANG、 Super Junior等都專程飛嚟香港攞獎，令全港韓迷熱血沸騰。
不過講到最威，一定係威水到坐私人飛機來香港，今年憑自創馬舞唱〈江南 Style〉紅遍全球的 PSY，個人連擸「年度歌曲大獎」、「全球最受歡迎歌手」等 4個大獎。但 PSY自 2001年入行後，曾因吸大麻被捕；之後又因違規服兵役，入行 10年霉足 10年。今年 PSY重開 turbo捲土重來，堅持唔整容、唔減肥，一樣彈得起。
旋風攻港
今年 34歲的 PSY（朴載相），今年 8月推出騎呢膠歌〈江南 Style〉後，唔只紅爆韓國，甚至攻佔美國 Billboard細碟榜 no.2，到現時為止〈江南 Style〉 MV在 YouTube點擊率，更突破 8億 7千萬次，連 Justin Bieber都唔夠佢鍊。
MAMA壓軸大獎——「年度歌曲」獎，由型男鄭雨盛頒畀 PSY嘅〈江南 Style〉，連埋「最佳舞蹈表演」、「最佳音樂錄影帶」及「全球最受歡迎歌手」，攞足 4個獎，成當晚大贏家！
過去 10年， PSY事業雖然唔多順暢，但婚姻卻好美滿。 06年就娶咗著名大提琴家汝惠妍，現育有一對孖女。據知汝好忍得 PSY嘅喜愛夜蒲性格，所以結婚 6年都仲幾恩愛。
6分鐘袋 300萬
紅咗短短幾個月後升呢變成國際巨星的 PSY，上星期終於首度訪港。
短短時間賺過億， PSY駕臨香港都要有番咁上下排場，上週四（ 29日）下午， PSY乘搭私人飛機先去泰國慶祝泰王生日，再來港。 PSY回酒店休息後，傍晚更由工作人員陪同下，坐遊艇出海遊維港，嘆完世界，當晚更踩過澳門搵真銀，去新濠天地夜場 Club Cubic開騷，據知雖然當晚 PSY只係唱〈江南 Style〉一首歌，兼只逗留 6分鐘，但已穩袋 300萬港幣酬勞， easy執！
澳門掘金
當晚同 PSY餅印一樣嘅錢國偉，就帶住女友陳宛蔚一齊做主持。 A貨同正牌同台，夠晒噱頭。
去 MAMA前， PSY就過大海於新濠天地嘅夜場 Club Cubic表演，唱〈江南 Style〉時更即場跳招牌馬舞，雖然跳到五官移位都幾騎呢，但表演 6分鐘就收 300萬，肉酸啲都抵。
扮嘢王
入行 10年， PSY一直以騎呢搞笑做賣點，上年未紅前， PSY就曾於演唱會中，着泳衣露出半個八月十五扮女人跳舞，都幾肉酸！
大學勁薯
出身富貴的 PSY，父親是南韓半導體測試設備公司 DI Corp的主席朴元浩，所以 PSY於大學時就到了波士頓大學升學， 99年再到美國伯克利音樂學院讀音樂。當時 PSY都係單眼皮，而且都係肥嘟嘟，證明佢真係冇整過容。
醜到戴面具
左：大成
右起：鄭雨盛， PSY，崔智友，彭于晏
當晚 PSY亦有到慶功宴湊熱鬧，佢一出現大把星好似崔智友、鄭雨盛甚至 BIGBANG大成，都要黐實佢。網上圖片
講到戲肉，當然係上週五（ 30日）晚在香港會展舉行的 MAMA頒獎典禮。雖然當晚強敵好似同門師弟 BIGBANG及 Super Junior一齊爭獎，但今年憑〈江南 Style〉一曲走天涯的 PSY一人掃走「最佳舞蹈表演」、「最佳音樂錄影帶」、「全球最受歡迎歌手」及「年度歌曲大獎」 4個大獎。
今時今日人氣爆燈，冇人嫌扮嘢王 PSY又肥又醜，但 PSY就自爆 01年初出道時曾被唱片公司老闆勒令整容兼減肥，甚至戴面具才可上台表演。
不過 PSY由於自覺並非走偶像路線，當然唔制。卒之就係呢份堅持，令佢霉咗 10年，今年親自創作首 fit到爆燈的〈江南 style〉先可以出人頭地。而 01年出道的 PSY，當年除了被嫌醜，亦曾因吸大麻被捕，最後被判罰款 4萬港元。兩年後服兵役，又因涉嫌不誠實履行兵役義務，於服兵役期間違規開騷，被安排於 07年重新入伍服兵役 2年，事業跌到谷底。
冇送阿爺終
早前 PSY接受訪問時，對於曾吸毒一事表示極之後悔。原來當 PSY被捕時，適逢其爺爺因病去世，而當時 PSY因要在警察局接受問話，連爺爺的喪禮亦不能出席：「我爺爺好錫我，當佢去世時，我竟然冇喺佢身邊陪佢走過人生最後一程，呢件係我一生人最遺憾嘅事。」
最新消息，由於〈江南 style〉大熱，帶動韓國的娛樂產業創下 400億韓圜（約 2億多港幣）盈餘，到江南區旅遊的旅客更激增， PSY今次認真光宗耀祖。
超親民語錄
MAMA騷後，各得獎嘉賓全去到記者室講得獎感受，大贏家 BIGBANG答咗 1條問題就拉隊走，相反同公司嘅 PSY就好 nice答足 15分鐘。留港三日兩夜，全程都好 nice。
12年前我係騎呢，但 12年之後嘅今天我都係咁騎呢，只係當時唔出名， 𠵱家出咗名，就算騎呢都有人接受。
最近 3個禮拜內去咗 7個國家，我好攰，但好開心，不過健康卻差咗好多，要好好保重身體。
今年聖誕將去華盛頓表演，到時就可以同奧巴馬一齊跳馬舞，搞 hit華府。
想欣賞大量 MAMA及少時美圖，請即 Like FACE K-pop官方 facebook專頁： FACE K-pop
首爾直擊
MAMA分獎唔勻 冇獎少時屈病
今年 MAMA頒獎禮由 PSY做大贏家，不過上年連攞「年度歌手」及「最佳女子組合」獎的少時，今屆竟然連影都唔見。
據知今次 MAMA好似香港新城電台一樣要分獎給多間大型經理人公司，而因少時所屬的 SM Entertainment想谷新進男團 Exo，加上 SM同 Mnet關係唔及 YG跟 Mnet好，所以惟有犧牲少時資源。
上週五（ 30日）早上，本刊記者於首爾機場撞正剛於上週四（ 29日）由越南出席完《 Show!音樂中心》音樂騷返韓的少時，只見當時各隊員如泰妍、 Jessica個個頭耷耷冇乜心情，而 Tiffany更用手掩面，記者聽到有粉絲用英文問 Tiffany：「 Are you OK?」， Tiffany直言：「 I am sick！」令在場 fans大叫心痛。
秀英殘爆 Tiffany病樣
上週五（ 30日）早上， Tiffany由越南返回首爾，落機後戴黑超嘅 Tiffany一直耷頭用手掩住蒼白面孔，仲表示唔舒服，見佢身後嘅秀英一樣咁攰。
左起：徐賢， Tiffany，泰妍
上週四（ 29日）， Tiffany同班好姊妹徐賢同泰妍去越南出騷，上台時仲表現得鬼咁開心，完全唔似病。
侑利原本都冇厘精神，但一見到有 fans送禮物即醒晒，仲笑到四萬咁口。反而佢身後嘅允兒就 cool cool哋。
左起： Jessica， Tiffany， Sunny，孝淵
步出機場時，金髮嘅 Jessica行頭領導班姊妹過馬路，好有大家姐風範。
左起：昌珉，允浩
少時師兄東方神起嘅允浩同昌珉，亦去完越南開騷，於上週五同少時一齊搭飛機返首爾，於 MAMA冇獎攞嘅神起巴打，一樣冇厘神氣，尤其允浩更未剃鬚。
G-Dragon孔雀開屏
今屆 MAMA由 PSY做大贏家，其實同們師弟 BIGBANG亦唔弱，一連擸咗「年度歌手」、「最佳男子組合」及「全球最出色表現」 3個獎，而隊長 G-Dragon以個人身份攞埋「最佳男歌手」獎，唔怪得完騷後， G-Dragon於慶功宴鬼咁開心，好似開籠雀咁，個個叫佢合照都冇 say no！
當晚頒獎嘉賓陳柏霖去到慶功場地， Ritz Carlton酒店內嘅 OZONE，見到 G-Dragon即捉住佢合照。查實當晚 G-Dragon攞嘅「最佳男歌手」獎亦係由陳柏霖頒俾佢。網上圖片
據知慶功宴內，太陽就鬼咁 high，不時走出舞池自己一個跳舞，而且仲黐實紅髮 G-Dragon影迷幻相。網上圖片
除陳柏霖外， Angelababy同彭于晏見到 G-Dragon即夾住佢影合照，乘機抽吓水，最緊要係 G-Dragon唔介意，仲舉埋 V。網上圖片
當晚 BIGBANG更上台演唱大 hit歌〈 Crayon〉及〈 Fantastic Baby〉等，開場金髮（小圖），到尾聲就變咗紅髮嘅 GD更打開件褸露腹肌，明益 fans。
冇衫換？
上週六（ 12月 1日）下午， BIGBANG即搭飛機返首爾，而當日 T.O.P就着住之前一晚於 MAMA騷及記招着過的 Prada 2012秋冬款大褸，唔通 T.O.P冇帶衫換？
T.O.P最搞笑
左起： G-Dragon， T.O.P，太陽，勝利，大成
完騷後， BIGBANG 5子就去到記者室會傳媒，最靚仔兼私底下勁玩得的 T.O.P一見到攝影機即伏低身對住鏡頭，表現熱情， GD亦整蠱做怪，但其他巴打就 cool爆。
留言列表
