由 6個 90後嫩口仔組成嘅 B.A.P， B意思係 Best， A意思係 Absolute；而 P意思係 Perfect，成個名意思係絕對做到最好、最完美。
韓面
B.A.P 街頭六壯士
今年韓國樂壇新丁特別旺，尤其係男丁。上半年先由 12大軍 EXO攞頭彩；下半年就有 6人嫩口男團 B.A.P發力狂追。
由 6個 16至 22歲型仔組成的 B.A.P，強項跳 K-dance玩 hip hop，特徵係染金毛玩街童 feel。由年頭至今已出過 3張細碟及 2張 EP，夠晒多產。呢班街頭六壯士，將於下月尾喺香港舉行的 MAMA頒獎禮內，有份角逐「最佳男新人獎」，到時唔只同死敵 EXO鍊過，更有可能黐住 PSY一齊跳馬舞。
由 6個 90後仔仔組成的 B.A.P，被視為今年 SM力捧的重頭新晉男團 EXO的最大勁敵。一行 12人的 EXO，個個青靚白淨走靚仔路線，而 B.A.P則啱啱相反，隊員鍾意染金毛，最叻跳街舞唱 hip hop，引到班韓妹流晒口水。
B.A.P出道唔夠一年已出過 2張 EP、 3張細碟，最新細碟《 Stop It》，剛於 10月 23日出街。早前 6個嫩口仔不斷上《人氣歌謠》等音樂節目宣傳。
由於 B.A.P受歡迎，韓國有線電視 Mnet都搵佢哋演出綜藝節目《 B.A.P’s Killing Camp》，希望藉佢哋名氣吸引 fans成為新客戶。
明年攻日
同 Mnet做節目不特止， B.A.P 6子更幫韓國 SBS電視台，演出《 Ta-Dah！ It’s B.A.P！》同《 B.A.P Diary》兩個節目，的確好搶手。
B.A.P由今年 1月出道至今，雖唔夠一年，但已出過 3張細碟及 2張 EP，除唱歌獻舞，仲分別為 SBS電視台及 Mnet主持 3個綜藝節目，有 job密密接。據知 B.A.P現正苦練日語，等今年攻韓國本土成功後，下年正式出日文歌攻日。
隊長乞人憎
隊長最紅
B.A.P以隊長容國最紅。自小夢想做歌星嘅容國，原來為咗演藝事業，竟然放棄入大學，好熱血。
唔好睇 B.A.P 6子喺台上跳舞又齊又夾，實質隊員之間傳出唔少是非，當中以最紅的隊長兼 rapper容國最惹火，有指 22歲隊中年紀最大的容國，由訓練期間開始已經常用前輩身份向其他成員訓話，扮大哥已難頂，最弊係懶到死，試過有次他用手臂受傷做藉口，指使隊友幫佢煮飯兼洗衫，仲一句唔該都冇，最乞人憎係嫌三嫌四，最後搞到成班隊友唔睬佢。話晒年尾係爭獎嘅非常時期，好心 6隻仔仔就爭氣，團結啲一齊抗敵啦！
仔潮
今年除 B.A.P外，另外仲有 7人男子組合 BTOB都係街頭勁舞，而且同樣個個都係 90後嫩男。
今年 3月出道嘅 BTOB，短短半年內已出過《 Insane》等 2張細碟及《 Born To Beat》等 2張 EP，更同 B.A.P一樣，喺 SBS電視台有自己專屬節目叫《 Diary》，係 B.A.P最大競敵。
BTOB同 4MINUTE同屬 Cube Entertainment，所以一班 4MINUTE成員都經常上 7個新仔揸旗嘅節目，撐到行。
留言列表
