818 娛樂八掛大放送★

銅鑼灣蓮花宮 陳宛蔚黐錢國偉求神轉運 

監製錢國偉（Wilson）雖然有正印女友「雜果賓治」陳宛蔚，但依然鬼咁多女黐埋身，早排佢同白雲嘅緋聞，搞到女友呷晒醋，不過大前日中午12點幾，就見到Wilson同女友揸車去咗銅鑼灣嘅蓮花宮。陳宛蔚着住熱褲仔、背心、拖鞋一身街坊裝，鬼咁熱情同男友搭膊、蹺手，入咗去一間花店買花，不過就係女友畀錢囉。

出錢買花 

癡纏點香 

追問籤文 

熱情掃背 發嗲功挨實男友

之後Wilson同陳宛蔚入廟還神，Wilson買埋香燭誠心上香，廟祝幫佢哋敲響銅鐘作福，佢哋走去廟宇後面化寶，好認真咁跟足儀式拜神，陳宛蔚仲跪地求籤，Wilson乖乖陪女友搵解籤佬，兩人臨走前再入廟拜多次神先走，真係好誠心。
離開廟宇之後，佢哋喺大坑行咗一圈，陳宛蔚再發揮嗲功，邊行邊挨實男友，好似脆麻花鬼咁癡纏；據知，Wilson嘅《喜愛夜蒲2》開畫票房過百萬，旗開得勝，相反女友簽咗王維基之後，因為經理人部門地震，搞到冇工開俾人投閒置散，惟有陪仔去拜神，希望快啲有工開。
採訪、攝影：張俊銘