腌篤鮮燒賣$36/5件
將上海最傳統的湯料變身成為廣東燒賣 饀料，燒賣出奇地鹹香，夠晒飽肚。

潮 𡃁便當

偷心•點心

2012年08月29日 ~~ 第275期 Face

2年前「添好運」榮登米芝蓮一星餐廳，掀起一陣點心熱。沉寂了一年多後，市面又突然開了多間點心店，有大型品牌的副線、有自資小店，亦有新式酒樓，全部點心即叫即製，個個點心師傅都身懷絕技，藝高人膽大，自創點心款式，即 check 4大最新點心店的必食推介。

Face之選
腌篤鮮燒賣
最型上海點心

南小館是小南國的年輕副線，餐廳採用白色簡約設計，加上落地玻璃同懷舊吊扇，十足 6、 70年代的老上海法租界情懷。
Menu上除了有小南國主打的生煎包和小籠包外，亦多加一系列上海新派點心同糕點，當中最有噱頭的，非腌篤鮮燒賣莫屬。腌篤鮮原是上海人最傳統的燉湯，師傅就幫其來了個大變身，用傳統材料，筍、鹹肉同新鮮豬肉熬 6小時，再用湯來煮糯米，加入筍粒和豬肉粒來做燒賣餡，咬落軟糯，帶有鹹肉的鹹香，必試。

金網生煎窩貼$36/3件

將傳統的筍絲換成海參絲，配合豬肉和海蝦，煎得香口，一咬，肉汁滿瀉。

南小館甜甜拼$58

自選 4款甜品，必食幼滑兼杏仁味超濃的杏仁白玉，和質感似冰皮月餅的上海綠茶糕，中間還有紅豆蓉，有驚喜。

細沙南瓜糰$28/3件

將南瓜蒸煮成蓉，南瓜皮煙煙韌韌，好有咬口，完全唔會過甜。

南小餅(2件起)$15/件

自家設計的燒餅，將減辣的魚香茄子切碎釀入餅內，白芝麻皮夠香口，即叫即製夠新鮮。

食客

左起
Sherraine文員
Gienne文員

好鍾意呢度啲裝修，感覺好 casual，點心做得好精緻又唔肥膩，好好食呀！

南小館

營業時間： 11:30am-11pm
電話： 2648 2299
地址：銅鑼灣軒尼詩道 500號希慎廣場 12樓 1201鋪
註：茶芥每位$6、加一

自家創
生煎黑豚叉燒包

原本只是夜夜笙歌的棉登徑，繼豚王進駐後，又有一新潮中式酒樓開張！剛開張未夠一個月，已經晚晚爆場，胡楓、蘇永康等明星都有捧場。每日 11am-4pm有茶市，雖然點心數目唔係太多，不過全部都好精緻。
創新主打點心是懷舊一口叉燒包，落重本用半肥瘦黑豚肉，加自製叉燒醬，先蒸再煎香底部，放到有洋葱墊底的韓國石窩裏，上枱時一打開蓋，吱吱喳喳的，好似鐵板燒般，香氣四溢。

生煎帶子腐皮$38

少有地用上自製蝦膠、墨魚膠同帶子，爽口彈牙，乾身腐皮煎至香脆，唔會食到成口油。

懷舊一口叉燒包$28/3個

創新做法，用上半肥瘦黑豚肉造叉燒，再用生煎包方法，將包底煎香，上枱時，即聞到窩裏爆香了的洋葱味。

XO醬蘿蔔糕$38

本地有機蘿蔔手切成條，加入臘肉同蝦米，有咬口唔糊嘴，配上自製的瑤柱蝦膏 XO醬，非常惹味。

Check!
遠年陳皮紅豆沙$28/碗

用 30年新會陳皮，天津大紅豆焗煮 2個多小時，去埋皮，唔使落生粉都起晒沙，每日只供應 40-50碗左右，未到 8點就賣晒，所以嚟食 lunch搶飲頭啖湯，必點！

雲來軒

營業時間： 11am-4pm(茶市)、 6pm-11pm(晚市)
電話： 2722 0156
地址：尖沙咀棉登徑 17-23號華楓大廈 1樓全層
註：茶芥每位$8、加一

懷舊大雞包
iPhone咁長

有 30多年餐飲業經驗的陳老闆，同樣 sell點心即叫即製，雖然款式唔算特別有新意，卻有接近失傳的大雞包！
其實好多新式酒樓嫌步驟繁瑣，已經唔再出雞包，因為成個 iPhone咁大的雞包，有 3個普通叉燒包的分量，卻只賣$13，真係大件夾抵食！不過老闆為了迎合健康的飲食潮流，都將傳統用料如鵪鶉蛋改成農場雞蛋，又選用多種菇類同去皮雞髀肉，完全唔滯唔油膩。

懷舊雞球大包$13

失傳的大雞包，皮鬆軟唔厚實，餡料佔了 8成，有半隻雞蛋、青菜、雜菇同雞髀肉，絕不欺場。

蒜蓉蝦春卷$18

將蒜蓉粒炒香，配上原隻海蝦炸香，蒜蓉味特別出，春卷夠香口。

脆米炸蝦腸$18

炸香的米網包着原隻越南海蝦，炸香再包腸粉皮，即叫即製，皮夠滑，最正係塊米網擺咗成個鐘都仲好脆！

自家點心

營業時間： 9am-12mn
電話： 2395 9288
地址：太子花園街 224A地鋪
註：茶芥每位$2、免加一

獨家 wasabi燒賣
開胃醒神

鋪頭細細，容納 30人左右，用灰白色做設計主調，半開放式廚房，簡單又唔「娘」。陳老闆夠貼心，容許食客逐件 order點心（ 2件起），可以試勻唔同款式。
師傅們每朝 4點開始整點心，全部唔落味精。最醒神的是西紅柿青芥燒賣，老闆自家設計，手打蝦膠同手切豬肉，特別爽口，再將 wasabi混入燒賣中，千祈唔好一啖擺入口，否則 wasabi的辣味即時由口腔沿着氣管一直上腦，包你食到眼淚鼻水直流！

粒粒合桃酥(2件起)$8/件

炒香磨成粒的合桃非常香口，焗製的外層鬆化酥脆，好吃！

西紅柿青芥燒賣（ 2件起)$6/件

8： 2是蝦膠、豬肉和肥豬肉的黃金比例，手切豬肉更有咬口，最有 gimmick是面層和中間的 wasabi，食完醒神呀！

誠實豆沙包(2件起)$6/個

豬仔造型最受小朋友歡迎，自製天津紅豆蓉唔算太甜，食一個都唔會滯，惟豆味未算太濃。

喜•喜點

營業時間： 8am-9:30pm
電話： 2806 2666
地址：北角電氣道 127號地下
註：茶芥每位$2、免加一

撰文：伍嘉瑩
攝影：顏青瑋、葉曉明、吳偉業