close


我唔係台灣病夫！（設計對白）林書豪，唔係神，總會有輸波嘅一日！對戰黃鋒更錄得9次失誤，成為個人最多失誤紀錄，慘！

林書豪，終於輸了！上週六香港時間早上，紐約人主場大戰黃蜂，林書豪雖然個人交出26分、5次助攻，可惜有9次失誤，7連勝終於行人止步，紐約人以85：89敗陣！幾乎日日就要落場迎戰，週一凌晨贏完上屆冠軍小牛，本週又要鬥熱火，林書豪如有「神」助都冇用，就算佢輸波唔輸陣，始終都有隱憂，事關因腳傷缺陣多場比賽嘅紐約人大佬安東尼（Melo）即將回歸，佢接受訪問時講到明：「坦白講，最後一擊梗係我啦。我9年來都係咁㗎啦！」仲有不停嘅種族歧視。大佬歸位，細佬坐歪，林瘋熱潮究竟仲可以燒幾耐？


國籍：美國英文名：Jeremy Lin 出生日期：1988年8月23日（23歲）身高：6呎3吋體重：200磅學歷：2010年美國哈佛大學畢業，主修經濟，副修社會學。家庭狀況：父母，兄林書雅，弟林書偉，全家信奉基督教。

林瘋傳奇
2010年開始NBA生涯嘅林書豪，兩年嚟一直坐冷板，先後效力火箭同勇士都俾人炒魷魚，到去年12月以短期合約形式加盟紐約人，繼續做大後備，球會打算等到2月7日合約期滿，再俾大信封林書豪叫佢過主。　　點知响2月4日作客網隊一戰，呢排輸多過贏嘅紐約人，卒之靠林書豪反敗為勝，有晒心理準備輸埋呢場俾球會炒魷嘅教練迪安東尼，靠佢贏波保住份工，林書豪亦獲球隊續約，但年薪只有592萬港元，同明星球員拜恩2億年薪仲差30幾倍囉！

全台瘋狂
因為林書豪，全台灣吹起NBA強烈巨瘋信號，無論睇電視，抑或行過商場廣告大銀幕，甚至打開facebook，全部都係林書豪林書豪同林書豪。由原本日日鬧緊Makiyo、友寄隆輝打的士司機，全台反日情緒高漲，點知响2月4日，林瘋以大後備身份代表紐約人上場大戰網隊，成功帶領隊友反敗為勝，所有人視線即時轉移，聽聞就連班台灣師奶阿婆，都專登一早起身睇NBA，之後先落街買餸；買大樂透（與香港六合彩雷同），指定要買林瘋波衫號碼出生日期又或者入波次數，問你服未！過去十幾日，林瘋日日上報紙頭版，唯一蓋過佢風頭嘅人，就只有「台灣帽子天后」鳳飛飛肺癌病逝嘅消息。

注定坐歪
人人將林瘋捧上天，Nike同Adidas爭住同佢出波衫出球鞋，世界財經雜誌《福布斯》又話林瘋嘅運動員品牌估值，會達1,400萬美元，即係1億港紙，同湖人明星拜恩睇齊！覺得佢嘅風頭，會比「中國巨龍」姚明更加犀利！
成為全球目標，林瘋亦不負眾望，帶領紐約人連嬴7場，不過到咗第8場，紐約人終於輸俾黃蜂，林瘋終於斷纜！
輸波唔係問題，重點係紐約人大佬安東尼（Melo）即將傷癒歸隊，外界估計，以安東尼嘅一哥性格，絕對唔會讓路俾林瘋上位，就算教練俾佢落場，交波上籃重任只會交番俾安東尼，林瘋分分鐘要坐番冷板，或者等到勝負已定嘅垃圾時間先有機會落場！

認祖歸宗
瘋潮仲可以吹幾耐，根本冇人知，不過台灣人依然當佢係國寶，希望佢可以返嚟效力中華男籃代表隊，就連台灣外交部都準備向出生美國嘅林瘋，發出中華民國護照，等佢有資格入中華隊助陣，不過問題係，如果林瘋留响台灣超過183日，隨時會收到入伍兵單，就算佢為台灣人爭光，一樣要當兵！台灣人爭，估唔到連中國人都想林瘋入籍中國，盛傳佢祖籍浙江，既然「良禽擇木而棲」，不如入籍做中國男籃隊，不過林瘋嘅大伯接受訪問時表明，一直有叮囑世姪要飲水思源，打NBA都要記住自己係台灣人，更強調林家早於17世紀就由福建移居台灣，至於點解話佢係浙江人？原來林瘋外婆响浙江長大，到1949年先移居台灣，既然林瘋生於父系社會家庭，條數點計，都係台灣人！ ####

 

 
返去食滷肉飯啦！（設計對白）安東尼歸位，接受《ESPN》訪問講明要做番大佬，唔俾機會林瘋上位。 (路透社圖片）


林書豪相關產品响紐約開始有得賣，包括寫住「Lin」嘅波衫，仲有「Linsanity」大手指，聽講好賣到講你都唔信！（台灣《蘋果日報》圖片）


林書豪人氣急彈，即刻俾人揭情史，呢張攬女相，盛傳女方係國內藝人呂麗萍個女，兩個秘密拍拖，其實女主角只係林書豪相熟牧師嘅囡囡，大家搞錯晒！


唔少林書豪fans，一致認為偶像無論係落場表現抑或眼神，同《男兒當入樽》裡面，效力陵南嘅仙道倒模咁似，仲話當年林書豪响勇士，同仙道一樣著有7號嘅球衣！


台中有美式餐廳推出「豪小子套餐」，只要球賽當日上半場落單，下半場紐約人贏到波就可以半價，仲有髮型屋推出17蚊台幣剪林書豪頭優惠，即刻大排長龍。台灣《蘋果日報》圖片


全台我為瘋狂，去買大樂透，指定要揀同林書豪有關嘅號碼，包括佢著緊嘅17號球衣。台灣《蘋果日報》圖片


登上2月27日《TIME》亞洲版封面主角，標題係「Linsanity」。


初入NBA，因為黃皮膚經常俾人歧視，林書豪話全靠睇聖經，令佢捱到今時今日，所以每次入球，佢都會指住個天，將所有榮耀歸於上帝。


長居台灣嘅林嫲嫲，當年專登飛去美國湊林書豪，兩嫲孫感情特別好，林書豪識講國語，全靠阿嫲教佢！


林書豪爸爸林繼明本身係NBA迷，當年响美國嘅親子活動就係打波，佢希望三個仔識打籃球，可以融入美國主流社會，冇諗過林書豪可以打到入NBA。


前年夏天，林書豪返台灣，到籃球訓練營教小朋友打波技巧，佢話今年會再返鄉下行一轉，答謝支持佢嘅同鄉。


成為首位打入NBA嘅台灣人，前年總統馬英九親自接見，林書豪更送上寫住To Mr. President嘅籃球俾馬總統！

arrow
arrow
    全站熱搜

    litalife 發表在 痞客邦 留言(0) 人氣()

    E-mail轉寄