今日好玩嘢

似足 Ironman飛翔水上飄 Flyboard

香港人勁鍾意玩水上運動，更要愈玩愈激，由最普通嘅衝浪滑板，玩到 Wakeboard（花式滑水）、 Kiteboard（風箏滑水）都仲嫌未夠喉，依然要繼續搵新嘢玩。
今個夏季，有專家將外國最 hit嘅 Flyboard引進香港，利用嘖射水力將你從水面升到半空，大玩輕功花上飄；做唔成 Superman，都可以學 Ironman用科學力量體驗飛天快感，爽爆！

易學噴水飛天

全香港最先引入 Flyboard嘅滑水教練阿 Ben解釋，全套 Flyboard分為 2支手柄同滑水板底部共 4個噴水口，原理就係借助大量噴出海水嘅推動力，將玩家成個人升高，你可以擺動雙手去控制角度，四周轉向移動，真係似足 Ironman靠雙手雙腳噴射飛行。
阿 Ben又話， Flyboard最正係易玩，就算玩水上運動唔叻嘅人， 20分鐘內一定掌握到升空竅門。「玩 Wakeboard可能有人玩幾個月都仲未起到水，但 Flyboard一玩實識，好易得到滿足感，即刻影到飛天相貼上 facebook，好開心！」

供水1. Flyboard底部有條粗水喉連接住一架改裝過嘅水上電單車， Flyboard幾時噴水、噴水力度幾猛，全由操控電單車嘅人話事。 

起水2.最初成個人係浸喺水中，只要電單車一踩油，噴嘴開始射水，成個人就會升起。 

升空3.只要電單車踩行油，噴水力度夠勁，人連板就會一飛沖天，最高可飛盡水喉長度達 30呎咁高，但阿 Ben話為安全計，一般只會讓客人飛 15呎左右，都已成兩個半人咁高。

轉彎4.升空後，想再飛向邊個方向，就係由玩家自己控制，兩支手柄就係用嚟幫助轉向。由於噴水時有好大力度令 4個出水口保持直線向下，所以啲水唔會射到自己，放心！ 

從玩家主觀角度用 GoPro拍片，原來比旁觀望過去感覺仲要高。 

法國高手發明

Flyboard係由法國著名世界滑水冠軍 Franky Zapata喺 2011年發明，呢兩年幾期間，佢喺全球多個地方示範玩過，旋即 hit爆，勁多滑水迷想玩。喺經過改良之後， Flyboard終於喺今年 1月量產推出畀人買嚟玩，所以絕對係最新最 hit嘅水上玩意。

攞平衡　似玩滑板

凌空翻筋斗垂直爬升到一定高度時，用盡力向前或後拗腰，帶動成個人打完個筋斗先落水，襯托埋兩條手柄噴出嘅打圈水柱，動作勁靚！ 

問阿 Ben玩 Flyboard竅門係乜？「喺水中升起時，最緊要係小腿用力壓到塊板保持水平角度，咁樣噴水口就會向下，一泵水自然會垂直托高個人向上升。」若然噴水口傾向前或後，泵水就只會谷到個人向後或前游，升唔到上水。
初學者可能怕升得高跌得甘， Ben話唔怕：「剋服最難嘅上水之後，喺水面只要好似玩普通滑板，用腰腿力去控制塊板，擺動上身平衡就得，唔易跌落水。」加上升空高度係由阿 Ben坐喺水上電單車度踩油操控，萬一個玩家好論盡，咪噴少啲水，畀佢喺水面停留就算；見個客玩得叻先會射到佢 10幾呎高；至於花式，阿 Ben只會應個別資深玩家要求去教，𠵱家睇住佢表演先啦！

進階花式　海豚式彈水

剛剛升到離開水面時，上半身弓身向前，成個人就會向前彈起再插番入水。然後喺水底立即曲膝令腳板垂直，再彈番起個人出水同入水，如是者做三、四次，真係似足海豚彈水嘅動作。

新手玩後感攝影師 Woody易學亦易攰

「我本身都有玩開 Wakeboard，覺得 Flyboard真係唔難上手同平衡。不過因為塊板好重吓，而且封鎖咗腳板活動，所以壓佢落水同控制方向要用好多力，幾易攰，每次玩 15至 20分鐘真係夠晒皮，要唞一輪先再玩到。」

Flyboard　器材睇真啲

阿 Ben因為玩其他水上運動玩到悶，上網見到外國有人玩 Flyboard，最近仲正式發售，就立即買咗套返嚟，塊板連改裝水上電單車費用，使咗大約$70,000幾港紙。
除購置器材，搵場地都要花心機，由於塊板會猛烈咁噴水，噴中人有一定危險性，所以要喺冇人嘅空曠海面度玩。「我起初同班 friend出海玩時，可能畫面真係太震撼啩，成日引到遠處玩緊水嘅人走埋嚟，打聽點樣可以 join埋玩，於是咪直頭開個網站租埋畀人玩囉，𠵱家啲 booking已經排到成個月後，好多人想試！」咁又係，咁新鮮嘅玩意，係人都想望清楚啲，即刻詳細講解套板嘅運作同收費。

Flyboard塊腳板連實一對滑水鞋，穿對腳入去後，就靠晒膝頭、小腿同腳腕力量去操控塊板。 

阿 Ben話玩嗰陣全程着住浮水衣，而且手腳都戴住器材，所以識游水都幫唔到，所以唔識游水都一樣玩得，但唔可以驚水。 

負責供水畀 Flyboard嘅水上電單車經過改裝，拆除咗車葉，改為抽水同泵水系統，一踩油就會由海中抽水泵到 Flyboard。

水會先泵到腳板，再分流到兩支手柄，但其實手柄只屬輔助作用，可以拆走，單獨用腳板玩，新手顧少樣嘢仲易上手。 

出海時，仲會有架可坐 4人嘅艇仔跟住，所以成班朋友可以輪流上 Flyboard玩。 

Flyboard塊腳板重成 20kg，冇可能喺艇上面着，一定要先掟佢落海，喺水裏面着，然後穿手柄。阿 Ben話佢會幫客人着，客人只要瞓直浮喺水面就得。

試玩 Flyboard詳情

阿 Ben間公司有艇帶客人出深水灣對出海面玩 Flyboard，來回船程連講解大約 40分鐘， book兩個鐘的話， 4個人除開每個大約玩到 20分鐘，夠晒學識起飛。 

對象：建議 18歲或以上，略懂水性。
地點：深水灣對出海面（圖中紅圈範圍）
時間：星期一至六 10:00am-06:00pm（需預約）
人數：每次最多 4人
收費：$1,500/1小時（最少 2小時，可 4人 share。）
查詢： MING KEE Shipyard Limited（ 5485 5988）

奴 COMMENT

之前在網上睇 Flyboard影片經已覺得好吸引，入水能潛，出水能飛，花式多；𠵱家終於來到香港，正喎！大家終於可以扮 Iron man！不過玩呢類活動要注意安全外，還要顧及觀眾雙眼感受，試問你有冇見過 Ironman裝甲上面有豬腩肉？所以全香港只有張家輝可以玩，嘻嘻！

撰文：陳兆奇
攝影：黃家活