Dream Car

興奮無止境 McLaren　 MP4-12 C Spider

2013年01月02日 ~~ 第1093期 交易通．搵車快線

去年初 McLaren MP4-12C橫空面世，即成車壇焦點，喺接近零宣傳、車價達 400萬嘅情況下，用半年時間狂賣超過 60部！銷售表現令代理興奮、部車嘅性能亦令一眾車主興奮！
不過新一年興奮事接踵而來， MP4-12C開篷版正式推出，打開硬頂與風飛馳嘅感覺更爽！甚麼「開篷車車架軟」、「加速冇咁快」等，全部都係廢話，比硬頂版多咗 25匹馬力，整體表現甚至勁過硬頂版！

去年買咗 600匹馬力硬頂版嘅車主，又唔使嘈住，全因車廠賣大包，為所有已售車免費 upgrade電腦，即送 25匹馬力！同開篷版睇齊！算係新年禮物啦！不過今次開篷版又點只加大馬力咁簡單，外表唔同之餘，仲有新設備。


硬頂版車尾原本係一塊斜向大玻璃，開篷版已改為凹字形防滾架設計，難得仍保留一個窗仔望引擎。


座位後增設附發熱線、電動尾窗，升起可以防止亂流入車廂，降低可以更清楚聽引擎聲，留意後方平直位仍有細小引擎艙透視窗仔。


車廠早預咗硬頂或開篷都用同一個碳纖駕駛艙，圖中可見座位後已預留硬頂摺合存放空間（紅圈）。


引擎前方同座位後方之間，就係硬頂存放空間，閂篷後就變成獨立儲物間。

冇頂車尾更靚

硬頂版車尾傾斜，就可以用大大幅玻璃遮住引擎，泊低車後，人人都可以從外參觀引擎，完完全全滿足演嘢心態。開篷版由於車尾較平，同埋要做到「凹」字形咁有防滾架作用，所以冇可能做大大塊玻璃引擎艙蓋。但用得 400幾萬買部車，點可以冇引擎望吓？所以車廠喺引擎上方開個小天窗，都可以欣賞到引擎部分，唔似直接對手拉利 458 Spider封密引擎咁冇癮。
車尾其餘位置如升降尾翼、高置雙出式尾喉等，都同硬頂版一樣，難怪廠方話，其實喺設計 MP4-12C原型車時，早預咗做兩個版本，而兩者喺懸掛同底盤設定都完全一樣，可見車廠對 MP4-12C個底盤極有信心，毋須任何補強。


硬頂體積細小，只由兩塊組成，所以開關時間只需 17秒。

少量新增設備

冇頂、再加展開翼門，呢個造型落旺區，一定全場矚目。

開篷版其實除咗係一個新車型外，亦都可以視為一個改良型，因為車廂加入咗新配搭座位用料，而狹長嘅中控台近波箱按掣位又加咗開篷掣及尾窗掣，外觀上都豐富咗。而最大轉變，可算係首次可選配升降避震，唔好以為係為咗 low低車身增強彎路表現，其實係方便出入較高壆位時稍為升高車身，保住條頭唇呀！此外，據知整套音響系統雖然同硬頂版一樣，但軟件已作出更新，除去少量 bug，令操作更順暢。 

McLaren MP4-12C Spider Spec.

引擎保留小窗，仍可以欣賞引擎外觀。

引擎： 3,799c.c. V8 twin turbo
馬力： 625ps/7,500rpm
扭力： 61.2kgm/3,000-7,000rpm
傳動： 7前速 SSG雙離合器自動，附+/-模式
制動：前、後鑽孔透氣碟
懸掛：前、後雙搖臂
車重： 1,376kg
車身： 4,509× 2,093× 1,203（ mm）
0-100km/h： 3.1秒
極速： 329km/h
售價：$4,385,000起
查詢： McLaren Hong Kong（ 2893 1888） 

波箱引擎升級

一如以往，開篷 MP4-12C都有行車模式選擇，一般情況下 Normal或 Sport模式已經好夠用，當由 Normal轉到 Sport，明顯 feel到軚盤、油門實咗，懸掛嘅回饋力硬咗，引擎聲更嚇鬼，如轉到 Track模式，情況更加厲害，咁樣有利精確高速行走，亦可以營造更強氣氛。
開篷版對比硬頂更新電腦程式後，引擎加多 25匹、達 625匹馬力，但筆者試車時發覺香港路面根本冇可能試出分別，相信只有外國嘅車主或落 track先有呢個福分。反而改善咗嘅波箱程式有更明顯分別，轉波時齒合更順、更快，有理由相信 0-100km/h加速由硬頂版嘅 3.3秒縮減到 3.1秒，都係波箱功勞，只要夠膽用力踩盡油門，強大加速力可以令身體緊釘喺座位上。
筆者主要喺港島南區一帶試車，嗰頭啲路面多彎又鋪得唔靚，本來唔係太適合 MP4-12C一類 supercar，不過開篷版真係同硬頂版一樣表現，車架硬到暈、懸掛剛柔並濟，對比好多一味只懂以「硬」來對付傾側嘅懸掛，實在高明得多，揸住佢日日出入上班都唔辛苦，拉利 458做唔到。


車廂內布局大致同硬頂版一樣，冷氣操作仍放在車門上。


引擎最大馬力雖激增 25匹至 625匹，但香港地冇可能試得盡！


新增車身升降系統，會由軚盤後獨立控桿操作。


中控台兩個簡單扭掣，分別操作 Handling及 Powertrain，分 3級 Normal、 Sport及 Track。


所有音響系統歸納喺直身 mon之內，升級作業系統後，操作更爽快。


座位形狀冇任何改變，但多咗新物料選擇，如拍攝車用黑色皮內有鮮紅色透氣孔。


表板以轉數表為中心，左右均為行車資料顯示。


引擎同波箱更新軟件後，馬力即時增大、波箱表現更順、更快！波箱死火燈掣左右方分別追加尾窗掣及開篷掣。


新款 20吋合金軨，連中心個蓋都有碳纖花紋。


如果以 Track模式盡油狂轟，喉聲勁爆唔會輸蝕畀拉利 458。

老牌對手　 Ferrari 458 Spider

MP4-12C Spider喺市場上直接對手唔多，唯一只有今代同時轉用電摺硬頂嘅 Ferrari 458 Spider。 458 Spider一如以往都係用 V8自然吸氣引擎，但容積就增加到 4.5公升，馬力有 570匹，數字上完全輸畀 MP4-12C，不過拉利始終係拉利，縱使車價要$4,398,000，捧場客仍多的是，據知今日訂車，都要年底先有車交。 

撰文：袁國基
攝影：葉偉豪