佢嘅左手雖然係斷肢，但 figure會送多一隻「肉手」，畀你配番另一個「冇咁傷」嘅造型。

漫遊毒物

I'll be BIG　半米高未來戰士

2013年01月02日 ~~ 第293期 Face

《未來戰士 2》大隻佬完場時自投溶爐以防未來科技外洩，一句：「 I'll be back」真係經典對白。
不過呢句話要改做 I'll be BIG！因為 2013年玩具界大勢玩巨型 action figure。繼早排介紹完 1/4大比例李小龍， Enterbay於 2013年初仲有隻未來戰士 2戰損爛臉版 T-800大隻佬，身高足足半米，有 4分 1個阿諾咁高，手上支火神炮有成隻手掌咁長！而多間玩具廠仲鬥出 1/4大公仔，好似鐵甲威龍、 Batman、金屬機械人 T-800、《復仇者》版 Ironman，今個月出雙糧唔怕冇錢，最怕屋企樓底唔夠高！




頭雕比 12吋大 25%左右，細位當然更靚，比如眼珠層次、皮膚燒傷位、傷痕、仲有發光 LED眼，支燈按掣 1次着 20秒，省電環保。


支 M79榴彈炮仲係用金屬、木柄、尼龍帶組合成，子彈都係金屬造成，夠晒質感。


而 T-800最強武器火神炮就係金屬加塑膠造，長度幾乎有一隻成人手掌咁長， Enterbay話如果唔係怕過重會令 figure難以握定，佢哋會不計成本，成支金屬造。


隻拳頭分成手套、皮肉、血漬、金屬甲 4個層次，上色非常仔細。


圖中店員整理緊隻州長，你睇吓個比例大得幾震撼，真係差唔多有半個女仔咁高㗎。

售價：$2,888
售賣點： Enterbay
旺角廣華街 1號仁安大廈地鋪 11B/2332 3615 

《海賊無雙 2》 PS3 PSV版同步起錨

家吓日本最入屋卡通就係《 One Piece》，喺低迷嘅遊戲市道中，佢隻《海賊無雙》全球賣成 120萬隻。上星期香港 Asia Game Show破天荒跟日本《少年 Jump》展覽 Jump Festival 2012同步公開續集《海賊無雙 2》試玩，仲公布同步於 PS3、 PS Vita上登場，記者除咗去到影囡囡 cosplay，仲玩咗兩手 PS3版。
上集結局雖然去到救火拳艾斯，但其實有唔少劇情跳過冇得玩。續集冇錯係由 2年後漁人島出發，仲會用外傳形式補回空島篇，跟雷神．艾涅爾大戰。記者玩無雙最少 10年，感覺上今集比較似「猛將傳」，都係加新人新版圖，其他基本打法同系統並冇重大改良。不過《 O.P.》真係好屈機，試玩人龍係全場最長，相信一定可以谷起 PS Vita。


角色換上「 2年後」新造型，連新電影《 Movie Z》版本嘅紅色海賊軍服都有！試玩當日，有台版女帝 cosplayer林采緹到場試玩，併埋一齊畀大家養養眼！（首批送路飛服裝 DLC code，其他角色估計係付費下載）




雷神．艾涅爾都算係《 One Piece》暫時最令人討厭嘅敵人角色啦，不過佢啲 2億伏特電擊真係勁。


由於上集已經算造得好好，敵人小兵數量相差無幾，以一敵百場面分別唔大，操作方法亦唔覺有改變。


《 One Piece》呢類級數嘅作品，可以喺 AGS跟日本同步公開，已經吸引，大會仲有背心裙指導員陪打機，人龍自然長啦！




今集冇限定主機，改為在初回 boxset內送主機 sticker，另附畫集、配樂碟、 15個收藏金屬牌。（售價約$1,000）

廠商： BANDAI
機種： PS3、 PS VIta
類型：無雙 action
發售日： 2013年 3月 20日
售價：約$700 

少年 Jump大集合！

《 One Piece》連載刊物《週刊少年 Jump》亦公布推出創刊 45周年紀念大亂鬥遊戲《 Project Versus J》（暫名），暫有《海賊王》、《美食獵人》、《龍珠》 3位角色（下圖左起），更將由讀者投票選出其他登場角色：《星矢》、《幽遊白書》、《北斗之拳》齊打架，想起就覺得正斗！（發售日、機種、售價未定） 

撰文：鍾世傑
部分攝影：傅新發