Fun App

Playmobil海盜騎劫 iPhone

2013年01月02日 ~~ 第293期 Face

科技進步，玩具都唔可以一味靠硬，好似 Lego就一早軟硬兼施，出 game又出 app出晒名。死對頭 Playmobil都唔執輸，最近就砌到去 iOS，推出遊戲 app《 Playmobil Pirates》。以海盜為主題，起屋仔、買人仔，玩落有內涵一啲都唔失禮。最重要係免費， Playmobil fans唔想破費買咁多公仔就要一試喇。

《 Playmobil Priates》
平台： iOS
售價：分 iPhone、 iPad版，免費

QR code for iOS

海盜船有嘢你篤

隻 game玩法似 fb版《 The Sims》，喺個小島上面僱用海盜、增建各種不同功用建設，建立海盜王國。隻 game好玩在唔係一味得個「起」字，入面有好多迷你遊戲，例如駕駛海盜船出海冒險，玩法變咗篤芒射擊遊戲。定時定候仲會有其他海盜團襲擊你個島，要好似玩「塔防」遊戲咁起炮台保護自己，如果俾敵人成功入侵，整爛架海盜船就要花 1小時修理先可以再出海㗎。

射擊尋寶
點擊海盜船出海尋寶，即變射擊遊戲，過到關可以拎到秘寶開新任務。

模擬海島
一般日子，依提示建設小島、升 level、賺金幣，玩法類似成日見嘅模擬城市系遊戲。

敵人來襲
有個壞海盜個名同《 One Piece》奸角一樣叫黑鬍子，定時會派人攻擊，要喺沿途布置炮台攻擊，漏咗一隻都會擊毀你部海盜船，要花真實時間 1小時先可修理完畢。

千金難求要孤寒

遊戲入面需要用代幣購物，好似個島原來分成多個大版塊，開 game時只能用一忽仔建基地，加上建築物頗大份，好快就冇位起樓。想擴展地圖，就需要花千幾代幣探索；所以起樓盡量將建築物集中埋一齊，寸金尺土一格都咪浪費。
唔想用真金白銀買代幣（$15=2,000 points）玩 app，就要多啲出海尋寶，如成日打到沉船，記得喺 home page雙點擊 home掣完全 quit app，咁樣不單冇敵人來襲，海盜船亦可以照樣修理，整好後手機會有訊息通知，就可以避開攻擊。

除咗買地，你亦可以去酒場用錢招募新兵，佢哋可以幫手鋸樹、捉魚、打蛇賺錢。

隻 game啲錢好難賺，每次拎得 10個金幣左右，但開一塊地要 1,000多金幣。

出海尋寶一轉可以賺到幾百個金幣，算係比較有效率。

Lego懷舊賽車

其實 Lego都有好多 apps，呢隻《 Lego App 4+》最老少咸宜兼真係有砌嘢 feel。首先你要由各組不同部件組裝出 Lego車，正式開始玩法似 Gameboy越野電單車，左右傾斜電話保持車身平衡。喺賽道上收組一定數目嘅小 Lego就可以獲得新配件砌新車，簡單得嚟好玩又好砌。

iOS上有好多類似玩法嘅平衡賽車遊戲，上斜落車時要就番角度唔係就上唔到甚至搞到反車。

啲配件好搞怪，有得裝對腳上車，可以跳起拎到更多 Lego配件。

《 Lego App 4+》
平台： iOS、 Android
售價：免費

QR code for iOS