蔣家旻秘「妓」入屋 @ 818 娛樂八掛大放送★

「甜到漏」的無綫小花蔣家旻（Angel）入行5年，終憑處境劇成功入屋，更於台慶劇中挑戰演技飾演貪錢妓女，令人眼前一亮，擺脫「少女版佘詩曼」之名的她終成功上位！

今年23歲的無綫小花蔣家旻（Angel）入行5年以來，曾6度擔演女主角的「少女版」，可媲美無綫甘草羅樂林一日死5次的經典！不過Angel終憑處境劇《愛．回家》成功入屋，擺脫「少女版佘詩曼」的影子，她笑言受寵若驚：「拍《愛．回家》真係令我成功入咗屋，每次出街都會有小朋友叫我馬子妮，令我一時間都以為自己真係姓馬。最記得有一次去澳門做嘢，有街坊走嚟同我討論劇情，真係好Surprise！真係估唔到會有咁多人留意我！」

Angel早前於無綫劇《天與地》中飾演「少女版佘詩曼」而開始為人所熟悉，問到會否怕活在阿佘的影子下，她稱本身視阿佘為偶像：「可以令人記得我已經係Bonus，而且我好欣賞阿余，佢份人好爽直、對人亦都好Nice，而且係一個好好嘅榜樣。因為佢無論開廠捱到幾夜，個人幾唔夠瞓都好，佢個樣都好精神，而且每遇到飛紙仔嘅情況，佢都可以即記即做，我視佢為我嘅學習榜樣，所以依家我無論遇到咩情況，我都會頂硬上！」

2006年，Angel參演港台劇《過渡青春》而入行，翌年被無綫挑選為TVbeople主力拍攝宣傳片，同年開始參演劇集，由普通人搖身一變成為藝人，她坦言初時難以適應：「啱啱入行時我真係唔慣返工嘅時間，好記得第一次入廠拍宣傳短片，要朝早7點入到廠，咁我即係要5點起身返工，真係唔慣。之前拍《天與地》亦試過因為趕戲要喺公司瞓，甚至連妝都冇時間落就趕下一場，真係有一刻諗過點解自己要咁辛苦，點解要選擇入呢一行！」但Angel補充始終心繫演戲：「負面情緒其實都只係起身嗰一刻先有，每當一Role機拍劇嘅時候，我就成個人醒晒，心中想拍戲嗰團火始終都Keep住喺度！」

震住向三哥Say Sorry

外表「精甩辮」的Angel，入行初期亦試過失魂「蝦碌」的情況，她笑說：「第一年入行嘅時候我唔識睇通告，仲試過因為咁而失場！當年我拍劇集《疑情別戀》時，收到通告知道下午要拍外景，拍完之後我以為可以收工就返咗屋企，點知原來夜晚8點要入廠繼續拍，當晚9點助導打畀我問我去到邊，我先知原來要開廠，但當時我仲喺屋企，如果趕返去再化妝、Set頭要花成兩個鐘，所以當晚取消咗場戲。第二日補拍嘅時候，我即刻同三哥（苗僑偉）、靚靚（袁詠儀）道歉，嗰時我真係好驚！Say sorry時連把聲都震埋，但佢哋好好人，冇嬲我之餘，仲講笑話我令佢哋早收工！」

除了憑處境劇成功入屋外，Angel最近更可以在台慶劇中擔當一角，經常飾演「少女版」的她希望可成功轉型：「喺《大太監》中扮演貪錢妓女，可以話係我演戲嘅轉捩點，因為證明自己可以Handle唔同嘅角色，唔係只可以飾演單純少女、大學生，我都唔想做死一世妹！」她續說：「我都怕拍完處境劇之後冇劇拍，呢行好冇安全感，我都希望可以試多啲唔同嘅角色，最開心係依家播完《愛．回家》再播《大太監》，人哋可以睇到我演戲嘅分別。喺《大太監》入面我同飾演太監嘅曹永廉有好多對手戲，好記得有一幕戲我要服侍佢、挑逗佢，仲有Kiss戲，本來我只係需要錫佢塊面，但我就主動同導演講要錫佢個嘴同條頸，因為咁先更逼真，更似妓女挑逗客人！」

否認撬苟芸慧牆腳

正所謂「人紅是非多」，早前Angel被傳做「小三」介入苟芸慧（苟姑娘）與羅天宇的戀情，但她自言清者自清：「我同天宇係好同事、好朋友，佢只係當我係細妹。（見到報道唔開心？）最初見到啲咁嘅字眼都有少少唔開心，因為影響到我人格，不過既然係清白亦毋須唔開心！（覺得苟姑娘點？）雖然我哋冇合作過，但有喺公司撞過，嗰時我同佢講早晨，佢都會同我Say Hello，份人好有禮貌、好Nice、又冇架子，我覺得佢真係好靚、好白淨、好Sweet！我係女仔都好鍾意佢，佢被封『宅男女神』真係當之無愧！」Angel更坦言為人有骨氣，誓不當小三：「現實中我一定唔會做小三，如果人哋有女朋友，我就一定唔會差隻腳埋去，因為我覺得好麻煩，要逼人分手就好冇意思。我係一個好需要安全感嘅女仔，一定要確定對方單身先。（如果自己遇到小三點對付？）其實我對自己冇咩信心，我會覺得自己唔夠Quali同人爭，亦唔想同人爭，如果有小三，我寧願自動退出！」

後記：早到又夠Pro

拍攝當日，Angel比原定時間早了半小時到場，並一早帶備三對高跟鞋以供配襯衣飾之用，更不停詢問在場人士對其配搭衣飾的意見，工作態度如此認真，成功上位之日當然不遠矣。

蔣家旻斷言絕不做小三，如遇到小三寧願自動退出。