818 娛樂八掛大放送★

CY本已周身唔掂，政府智囊中央政策組（CPU）一哥邵善波又點多個火頭，說今後將由該組全職顧問高靜芝負責挑選人才加入政府架構，借用某政圈人士的比喻，這個角色同中共中央組織部差不多，已非智囊咁簡單。

一位前高官指，煲呔時期中策組真係做政策研究，但高層冇人理會，阿頭佳叔一直旁邊站，成個組變成可有可無。到CY上台，其戰友波叔坐正，中策組性質大變，回復當年肥彭時的角色。當年CPU阿頭顧汝德乃肥彭主要軍師，經常在港督府密商同中方博弈的政治策略，有內庭「魔僧」之稱，波叔就是想成為CY身邊的「魔僧」。

CY改變中策組角色，除了變中宣部，並派親信高靜芝擔任「中央組織部」，掌人事篩選權，等於繞過林鄭，搞另一個權力架構。

雖然顧汝德幫肥彭打政治仗，但深藏不露，唔似波叔咁揚，據聞CY身邊參謀亦認為波哥過火，應該收斂。此外，當時中策組亦冇負責人事任命嗰瓣，不會觸動政府原有的規章制度。

該前高官指，過往搵人加入諮委會，先經民政事務局提議，再過各有關局長的一關，重要委員會成員就經政務司司長批准，CY這新做法等於由中策組負責篩選，繞過原來程序，林鄭當然唔會likey，雖然她出來講好說話，但強調中策組角色冇變，說話有「骨」，暗示不同意高靜芝揸人事權，睇嚟開始有小小暗湧。

另有消息說，CY如此安排，背後有其盤算，就是透過親信高靜芝出手，全面整頓現時諮詢架構內之「分餅仔」流弊，將一批霸住個位唔做事的各式人等（包括政二代及富二代）砍走。但CY安插嫡系在體制外搞人事清洗，是危險行動，分分鐘養出另一隻「實權怪獸」，亦令林鄭等高官反感，對內部團結不利！