鄭大班喺政府總部搞完三日大龍鳳，暫時收兵整休，DBC二十四小時播金曲算係「維持廣播」，以候轉機。佢嘅策略係用群眾攻勢迫政府插手，只要蘇錦樑向股東施壓，促DBC履行發牌規定復播，黃楚標同李國章等就唔可以唔泵水，電台即可翻生，佢就得其所哉，財聲兼收！
正如小弟上期所講，政府完全睇通個局，故一於蹺埋手好少理，唔會介入亦唔會收牌，等班股東自己搞掂個爛攤子，政府先至出手收拾。
大班發動群眾攻勢盡地一煲，谷政府插手迫股東泵水復播，但政府睇通個局，一於少理，而電台收支帳目正受審查，分分鐘橫生變數。
大班個「復播運動」已谷到盡，效果都係咁，睇嚟已無以為繼，過兩日其他新聞冚上嚟，單嘢將迅速冷卻，到時大班好難再燒番起。最不利係多數傳媒知道事件背後有種種利益，言論自由只係漂亮口號，所以報道唔大，只有近期同佢結盟嘅肥佬黎份生果報肯幫拖，加埋佢前夥計游清源喺自己版面大吹大擂，威力同反國教冇得比。冇咗傳媒全面造勢，單嘢更難以炒得起！
知情人士指，DBC事件發展落去，有兩個疑團可能殺埋身，要大班拆，結果會點有唔少變數。其一係股東標叔叔已搵咗隊會計師審查電台過往收支帳目，如果某些關鍵資料搵得番，或者查查吓有新發現，標叔叔可能以此為理由拒絕泵水，政府就好難再叫佢哋注資，而大班亦要向政府交代，屆時電台只有一個結局，就係清盤執笠。
電台爭拗爆發後，該台財務總監突然辭職，佢為乜跳船，係咪知道某些內情，將來會唔會有嘢講，係事件另一個變數。
其二係標叔叔已取得法庭禁制令，禁止大班將董事會會議內情向外洩露，但佢拍檔林旭華喺集會公開播出會議上標叔叔發言嘅錄音，雖說錄音係大班喺員工大會上播出，有人錄低咗，交畀林旭華於集會播出，事前未得大班同意，故此與佢無關，不過標叔叔仍可以追究，如果法庭認為大班故意向外洩漏會議機密，佢就要面對蔑視法庭嘅刑事指控。
黃楚標被爆大鑊，董事會發言出晒街，料將追究到底，搵出誰是放料幕後黑手。
呢類消息外洩最近仲陸續有來，周一生果報就話，該報記者攞到DBC二月及四月董事會嘅詳細內容，究竟記者點解咁把炮，攞到呢啲資料？邊個係放料嘅幕後黑手？如果追查落去，分分鐘有人要負責。
DBC目前唔生唔死冇晒節目，本來通訊事務管理局可以話電台違反牌照規定，收番個牌，但聽講該局唔會咁急，先會去信叫電台解釋，書信往來都要幾個月，大班如果搵唔到新水，拖得幾拖就冇力再撐，到清盤官司展開，好快就兩腳一伸玩完。
大班做電台大亨夢碎，講到尾係因為股東押錯注買唐唐贏，如果上台嘅係唐唐唔係CY，個故事就完全改寫。命運弄人，大班惟有怨個天。
留言列表
