摩登飯廳飯廳設計富時代感，銀色餐枱配上特色吊燈，襯以 compressed wood牆身，凸顯冷暖對比感覺。
私家居
Alvin Goh 私人展館
Versace碟屋內有不少精緻擺設，就連用來放香薰蠟燭的碟亦相當講究。「我好鍾意 Versace嘅風格，啲碟係佢送俾我，而我最想訂到佢嘅梳化。」 
窩釘餐枱餐枱為 Alvin首件家具作品，玻璃下透視出巨型窩釘，型格兼實用。「飯枱係上年為 Clé de Peau藝術展設計，係我第一件 design嘅家具。」 
名師作品地櫃上放着個藝術作品「 The son of man」，出自比利時 René Magritte，「佢係個超現實主義畫家，當然我好希望有佢嘅 original。」
星級客人來港定居 7年多的 Alvin，曾與不少猛人合作，包括荷里活巨星奧瑪花曼、楊紫瓊等。最近更為日本天后濱崎步操刀，於慈善相展及雜誌封面作形象總監。
通屋展品
平日對慣靚人，創意天馬行空， Alvin屋內亦擺滿各地藝術家作品及他的創意傑作。「藝術品係慢慢儲落嚟，我鍾意搵啲比較得意嘅嘢，好似我啲作品咁比較偏門。有時我會改少少嘢，轉下畫、換條裙，咁先有新鮮感。」
踏入客廳，書架旁邊放有獨一無二的 COMME des GARCONS婚紗，配合牆上三盞特色壁燈，刺激感官享受。客廳、飯廳以 compressed wood（壓縮木）做了一堵壓木牆，賦予豐富層次感。「我都唔知點解釋全屋嘅主題，有啲 quirky（怪異）、 contemporary（當代），總之要驚喜。」
Alvin着重屋內細節、顏色。走到睡房、廚房及廁所的長走廊，感覺煥然一新。全白色走廊兩旁放滿掛畫，置身其中連步伐也自然地放慢。「走廊同客、飯廳完全唔同風格，好似去咗法國嘅 Christian Dior專門店一樣。我好鍾意白色，成個人醒神晒，屋企都係俾我靈感嘅地方。」
法式走廊由客飯廳進入睡房，是全白色設計的長走廊，兩旁掛有 Alvin的作品及名畫，將藝術元素滲透屋內。 
抽象掛畫「呢幅係我同意大利攝影師 Pierpaolo Ferrari合作嘅作品，佢專登幫我影低紀念。 Model嘅化妝、造型都係我做，好似一幅畫咁。」 
神秘人像除了 Alvin的作品，走廊掛有出自德國攝影師 Amira Fritz的人像照片，相中人頭以花朵遮掩，陰森神秘。「呢個攝影師用菲林影，唔會執相，最 original，你一睇就會定晒神。」
婚紗擺設書架旁邊放了一套價值 6萬元的 COMME des GARCONS婚紗，襯出另一味道。「呢件婚紗係 showpiece，全球只得一件。我每季都會為呢個 model換唔同 outfit，咁先有新鮮感。」 
限量公仔深灰色的麂皮梳化，鋪上同 tone狐狸毛氈，襯以 COMME des GARCONS彩色限量公仔，有點綴作用。 
層次客廳Alvin鍾情 mix and match設計，為增添客廳暖和感覺，刻意配上不同質感的木材，加上充足的自然光，特別恬靜愜意。而 Alvin刻意在梳化鋪上狐狸毛氈，營造凌亂美。
揼本裝修
Alvin定居香港多年，嚮往地道文化。「雖然我有一半時間飛來飛去，但對我嚟講香港已經係我個家。我啱啱去新加坡度假返嚟，感覺差好遠，可能節奏唔同，返到去覺得啲人做嘢好慢。我習慣咗香港模式，要快要爽。」
自命腌尖的他，搬過多次屋，兩年前，他終於遇上自己的理想安樂窩，由煩囂中環搬到鰂魚涌。「起初睇呢度，真係覺得好舊，不過一見個露台咁大，真係好鍾意。我叫業主開價，不過佢話打死都唔賣，我希望慢慢同佢傾，希望有一日佢肯賣。」
未能擁有心頭好， Alvin亦誇張到落重本裝修，連全屋地板和牆身都重整。「我花唔少錢落間屋度，好多朋友話我係咪癲咗，間屋又唔係你嘅。家對我嚟講非常之重要，特別我本身屋企喺新加坡。我喺香港除咗返公司，一半時間都喺呢個屋企，舒服、 relax最緊要。好多嘢唔可以用錢衡量，我 afford到就得，可能呢個就係代價。」有本事將租盤變成家的感覺，何樂而不為。
封口熊仔「睡房門掛嘅 teddy bear，嘴巴拉咗拉鏈，寓意請勿騷擾。」熊仔出自 DSQUARED2，限量推出 20個，相當珍貴。 
鑽粉骷髏英國著名藝術家 Damien Hirst作品 diamond dust，用鑽石粉砌成立體骷髏骨，價值 4萬元。「呢幅買完之後有啲後悔，唔可以直接望住。」 
水造睡房主人房以藍、啡為主調， Alvin對牀冚被單亦有講究，特選 UNDERCOVER潮牌，牀鋪白天鵝圖案幾可亂真。「我唔係特別鍾意藍色，只不過佢嘅色調可以令人平靜同放鬆，好似喺水度瞓覺。」
綠化廁所廁所光線十足，牆身及地下放滿植物，而架上放的各種香水，作空氣清新用途，簡約舒服。 
客廳旁邊的玻璃大門，是種滿植物的私人花園，設有戶外藤椅、梳化及餐枱。 Alvin會搞派對 BBQ外，亦是狗仔 Gentle的小天地。 
撰文：蔡靜雯
攝影：李梓軒
錄像︰黃瑤筠
協力︰湯文峯
留言列表
