Geek友講場

電玩朝聖日本遊

2012年09月12日 ~~ 第277期 Face

日本努力振興旅遊業，除咗有東京晴空塔 Skytree呢類熱爆新景點，仲主攻各位機迷阿宅，大搞 ACG（指動畫 Animate、漫畫 Comic及遊戲 Game）特備節目。今次《 FACE》成為唯一受官方邀請嘅香港雜誌，飛去東京直擊萬人空巷「 Final Fantasy 25周年展」！順道搜羅大大小小東瀛電玩動漫熱點， ACG迷一齊跟住朝聖喇！

互動片段

FF 25周年　直擊澀谷 Final Fantasy展



《 FACE》 Gadget版監修人 903 DJ Donald

通頂排 5粒鐘　直擊日本 Final Fantasy 25周年展

《 Final Fantasy》貴為 game界超級品牌，今年踏入 25周年自然有一大堆慶祝節目，澀谷新商場 Hikarie就喺 9月頭舉行咗為期兩日嘅「 FF 25周年展」，入面有歷代《 FF》嘅大型展品及珍貴原稿插畫。《 FACE》記者親臨現場直擊實況，由於開放畀一般玩家嘅展期只得一日，開幕前一晚有過千日本 fans由會場入口一直排隊到澀谷 JR站，通頂排 5個鐘等入場！
筆者人大咗，近幾年對《 FF》新作推出都無太大反應，但睇到日本 fans嘅熱情，電玩魂即時返晒嚟，有一種朝聖靈修之感。


多條人龍分段隊列，目測人數應該過千，不過日本人排隊好有紀律，一啲都無混亂。


日本人對遊戲嘅熱愛，可以從 event過後佢哋同製作人握手，都唔同側邊 cosplayer合照看出。

東南亞區記者：日本 fans夠熱情

John Marc

來自新加坡 ESPN記者阿 Marc及馬來西亞 Gamespot Asia記者 John都有嚟睇 FF展。阿 Marc就話被日本 fans熱情嚇倒：「喺新加坡搞一定無人會排隊畀錢買精品，日本 fans真係好愛 FF，遊戲迷值得睇吓呢類 event親身感受呢種熱情。」阿 John就反而懷念舊時嘅 FF：「 Square近年唔係好明白 fans需要，希望佢再出到《 Kingdom Hearts》呢類有 heart作品，搵番正確方向。」

直擊 FF展會場熱點　巨大都市級展品

香港遊戲展覽，來去都係網上搵得到嘅平面插畫同埋買得到嘅商品，欣賞指數唔高。呢個 FF展就唔同，一入場就見到《 FFXII》嘅 Judge等身大模型及其他大型展品，睇見遊戲場景由 Fantasy變做 Reality，真係無比興奮！


最靚係《 FFVII》嘅神羅都市，當年《 FF》首登陸 PS1，見到呢個近未來工業城市，嗰種震撼 𠵱家就變成 2米長嘅實景模型， 6號魔晃爐仲有被 Weapon打穿嘅缺口，當年有打爆機嘅 fans必定感動。


武器及人物嘅展品都造到等身大，放喺門口嘅係《 FFXII》角色 Judge。

FF元祖美術設計　天野喜孝原畫展

鬼才天野喜孝喺日本 FF迷眼中有如神一般嘅存在，佢為歷代《 FF》畫插畫，更負責《 FF》一至六代嘅角色及怪物設計，一手打造《 FF》嘅夢幻色彩，會場內展出咗 25幅插畫真蹟，係 fans駐足最耐嘅一部分。


唔好以為《 FF》得男 fans，單係《 FF VII》、《 FF VIII》兩代男主角已經殺死唔少女機迷，在場所見男女約為 2:1，有唔少仲係後生女添。


仲可睇到當年 Square工作人員於遊戲製作時嘅手稿，紅白機同超任年代要喺格仔紙下設計角色，方便繪製點陣圖，全部都係用筆寫嘅 hard copy，極為懷舊。


天野嘅畫風獨特奇幻，電影《畫皮 2》都搵佢做概念設計，亦有人覺重口味，好似 Jeremy Scott，唔係當佢神咁拜就係頂佢唔順。

Final Fantasy 25th Anniversary Ultimate Box Collection內容

FF1（ PS） 1碟、 FＦ II（ PS） 1碟、 FFIII（ PSP） 1碟、 FFIV（ PS） 1碟、 FFV（ PS） 1碟、 FFVI（ PS） 1碟、 FFVII國際版（ PS） 4碟、 FFVIII（ PS） 4碟、 FFIX（ PS） 4碟、 FFX（ PS2） 1碟、 FFXI（ PS2） 1碟、 FFXII（ PS2） 1碟、 FFXIII（ PS3） 1碟。特別編集映像 DVD 1 Disc、 25周年記念音樂雙 CD、迷你雕像、 25周年記念 Crystal Art works特刊。

SE e-Store訂購網址： http://store.jp.square-enix.com/special/ff25th




總共有 22隻遊戲光碟、 2張 CD、 1張映像 DVD加 1本畫集，封面同畫集都係由天野喜孝設計。

日本限定　 FF25周年究極 BOXSET

究極 Boxset香港冇行貨，入手困難，但 SE方面講明，其他 25周年限定商品會安排喺香港發售，之但係詳情同數量都未定，不如 12月飛去日本，去大型玩具店同 game鋪搵仲直接。

旅遊時購物慾往往激增，對於電玩迷嚟講，限定 game商品更係不可抗拒嘅誘惑。《 FF》 25周年記念商品當然為數不少，其中矚目首選係究極合集《 Final Fantasy 25th Anniversary Ultimate Box》，結合咗 1至 13集《 FF》遊戲碟，豪華包裝定價 45,000日圓（約$4,500）， 12月 18日開賣。佢只限日本 Square Enix e-Shop訂購，又要日本地址又要日本銀行信用咭，網購都有難度，親身去日本 game鋪尋寶，入手機會仲大。

新 game速報　雷電三部曲最後一擊

買唔到限定版唔緊要， FF迷仲可以等新 game。新作《 Lightning Returns Final Fantasy XIII》喺會場發布，延續主角 Lightning嘅故事，似足蝙蝠俠玩三部曲。話說《 XIII》結局佢去咗另一個世界，《 XIII-2》換咗阿妹做主角，《 Lightning Returns》正係講述 Lighting於異世界嘅故事。暫時資料話會玩最後 13天末日倒數， Lighting嘅行動會令末日鐘指針加快或者推遲。


故事發生喺異世界，玩末日倒數，做啱行動可以延長時間。暫時睇唔到有其他同伴，不過 Lightning喺戰鬥中就可以隨時換衫轉變能力。


如果想重溫頭兩部，可以等 9月 13日推出嘅《 FF XIII/ FFXIII-2》合集，中文字幕版賣＄ 558，送明信片 8張。


《 Lightning Returns Final Fantasy XIII》
PS3、 XBox360• Square Enix• RPG• 2013年內
於 FF展內向傳媒播放咗段不得外洩開發中片段，最大分別係戰鬥改以四個掣揀招出，睇落冇咁單調。

你都可以參與！最終幻想演奏會

FF展完咗，究極合集入手難度高，好在仲有機會去日本聽音樂會朝聖。
曾經喺歐美各地盛大公演過嘅「 Distant Worlds: Music from Final Fantasy」音樂會，會喺今年年底於日本演出。唔好以為係迷你演唱會，入面有齊成隊管弦樂團，上 YouTube聽吓就知 FF音樂可以幾咁 fantastic。暫時只有演出日期，售票詳情稍後會喺 Square Enix Music官網公布。 http://na.square-enix.com/music

公演日期：
2012-12-26　東京國際 Forum ROOM A
2012-12-28　大阪國際會議場 Grand Cube
2012-12-31　東京國際 Forum ROOM A


「 Distant Worlds」由 5年前開始巡迴公演，今次係日本第二次本土演出，話會再現《 FFVI》名場面加入歌舞劇元素。


除音樂會，年底仲會搵知名樂手 crossover製作音樂大碟，日本人氣爵士樂隊 Tokyo Sky Paradise Orchestra。

雖然 FF25周年展期已過，後頁仲有其他推介必去動漫景點！

生化女侍應　直擊澀谷 Biohazard Cafe

每次去動漫勝地秋葉原，總見到一批萌萌女僕派 cafe傳單，但講咗咁多年都冇幫襯。反而今次行程就去咗驚慄遊戲《 Biohazard》於澀谷 Parco開設嘅「生化危機 Cafe」。入面有各種 Bio主題食物：急救噴霧拎嚟噴草藥沙律夠盞鬼，仲有打扮成 S.T.A.R.S特種隊員嘅女 dancer載歌載舞。食物質素唔差、澀谷區夠潮又就腳，去完 shopping食晚飯值得一試。

Waitress變 Dancer　陪你打喪屍

Bio Cafe玩法其實都似女僕餐廳，有自己主題，不過呢度設定係 S.T.R.A.S.隊員專用餐廳，女服務員身兼 dancer隊伍「 S.T.R.A.S. ANGELIQUE」，每個入場客人都係警察隊員。
佢哋受過排舞師上野隆博訓練，每隔兩小時就會有一段歌舞演出，個個台型十足，跳到最後仲會拎武器，搵埋觀眾向餐廳後面嘅 Bio一代大佬 Tyrant開槍。當然隻怪物唔會走出嚟，只係玻璃上有電腦特效，不過整體嚟講約 4分鐘嘅表演都頗為精采。




Bio角色全部係西方人，「生化舞」節拍一樣強勁， dancers夠熱情奔放，唔係亂跳㗎。


整間 Biohazard Cafe唔算太大，不過就有好多 detail位。除咗道具，仲有 Ada同 Jill嘅服裝， 9月 17號開始仲有新一集電影《滅絕真相》道具展出！


波士怪物係會被強勁嘅投影射燈打晒爆炸效果，舞蹈員仲會叫埋觀眾玩埋一份，搵槍射佢，教埋你點揸槍，夠晒親切。

Biohazard Cafe& Grill Bar
東京都澀谷 Parco Part 1 7/F
營業時間： 11:00-22:00
入場時限：平日可坐２小時、星期六、日及公眾假期限 100分鐘。
網站： http://www.c2s.co.jp/biohazard/

精選生化食物

食品名稱同賣相都畀足心思跟足遊戲嘅設定，餐紙造成浣熊市嘅報紙，上面啲新開 keep住轉，有玩過《 Biohazard》一定倍感親切。仲會有 Waitress即場 serve你，喺你面前溝 cocktail、切烤肉！


正路咖喱飯，不過改用特種部隊野餐金屬桶去裝，夠晒「風味」，味道有水準，日本珍珠米飯有咬口，咖喱牛肉又腍又入味。（ 1,300日圓）


鐵桶咖喱


刀切 BBQ燒牛肉放題
類似巴西燒烤，成支牛肉烤熟後由女隊員親自用㓤喪屍嘅刀仔切畀你食， 2,700日圓無限添食，畀夠 3,700日圓連沙津、麵包、湯、咖喱醬都可以任添，係餐廳入面嘅晚餐主打菜式。


草藥噴霧沙律
紅草溝綠草係常用嘅回復道具，顏色上就似到十足，特色係有支急救噴霧調味料，試過個噴霧冇味嘅，志在玩吓。（ 600日圓）


燒杯 cocktail Blue Racoon
Cafe有賣酒，呢杯 cocktail一拎出嚟用醫院常見嘅燒杯裝住，又橙又藍，經女隊員溝埋就變咗綠，幾似生化藥物，飲落似熱情果汁，易入口但都有 Vodka味。（ 680日圓）

烤肉套餐任食：男性 3,700日圓、女性 3,300日圓
烤肉單品任食： 2,700日圓、小學生 1,850日圓

Gucci都撐　阿奴都睇　 JoJo奇妙展

903 DJ Donald本身都係動漫迷，但佢話自己未試過喺日本睇動漫展覽。「雖然冇呢種經驗，但有次去新宿行咗間幾層高嘅動漫店，已經有種朝聖 feel。不過我反而喺歐洲有類似體驗，上次去歐洲玩時，竟然畀我喺羅浮宮撞到至愛漫畫《 JoJo奇妙冒險》作者荒本飛呂彥嘅展覽，勁有緣！」
呢套作品非常之型，連 Gucci都同佢合作，而作者仲非常有義氣，近日特別喺自己鄉下：地震災區仙台舉行《 JoJo展》振興經濟同旅遊，阿奴話一直冇機會飛去日本，但都提埋其他 JoJo fans：「個 show會搬去東京再展出，如果香港 fans怕東北有輻射， 10月有睇趁手！」




出埋別注手機
早排 Docomo仲同 LG合作搞咗部 JoJo Smartphone（ LG Optimus Vu），唔只有別注機背圖案，機內介面、 wallpaper、遊戲、影相相框都係 JoJo主題！（限 15,000部、已售罄）


荒本飛呂彥出道 20年來愈來愈後生，畫作亦愈來愈有型，入場當然要睇真蹟！


Gucci新宿店早前曾以《 JoJo》×時裝誌《 SPUR》特別篇漫畫《岸邊露伴往 Gucci》為 concept display。呢輯圖正正會喺展覽內睇得番！




荒木飛呂彥原畫展∼ JoJo展
日期： 10月 6日至 11月 4日
時間： 10時至 22時
地點：東京六本木 Hills森畫廊
入場費：成人 1,800日圓、中學生 1,300日圓、小學及以下 600日圓
網頁： http://araki-jojo.com/gengaten/tokyo/

在日留學生： Game Event愈出愈多

留學生阿茲

喺日本讀緊設計嘅阿茲覺得日本 game界近年啲作品就真係麻麻哋，不過 event就愈搞愈有。「呢度連卡啦 OK都會搞 game event，一間叫 Pasela嘅連鎖集團搞得最好，早排有芒亨節，最近又喺六本木 Hills嘅酒吧玩《 Dragon Quest》酒場（已經 close咗），嚟到日本要搵動漫 event一定有。」

9月尾去 TGS遊戲展

提埋大家 9月尾遊日可以去埋東京遊戲展 2012，作為 game迷，真係要試一次。不過留意東京遊戲展其實唔係喺東京都舉行，坐 JR要成粒鐘先到，計埋排隊入場， 7點就好喺東京出發啦！

Tokyo Game Show 2012
日期： 9月 20日至 9月 21日
時間： 10時至 17時
地點：幕張國際展覽中心（選乘 JR京葉線於海濱幕張站下車、步行 5分鐘）
即日門票： 1,200日圓、小學生或更年幼者免費入場
網頁： http://tgs.cesa.or.jp/English

EVA之父庵野秀明的特撮倉庫

相信唔係太多人知道，《新世紀 Evangelion》之父庵野秀明讀大學時係個《鹹蛋超人》迷，仲曾經自資拍過套山寨版短片。近排佢拍完《 EVA新劇場版： Q》之後可能太得閒，真係 call超人公司圓谷合作，喺東京都現代美術館搞特撮道具展。
其實場內戲肉係呢隻來自《風之谷》嘅巨神兵，原來 EVA機械人嘅概念就係咁嚟，場內唔只有模型睇，仲有庵野新拍嘅《巨神兵襲東京》短片播放。


除咗超人怪獸嘅拍戲道具，仲有一大座超人大戰巴魯坦縮水城市背景，超人迷同 EVA迷都會 like！


套《巨神兵襲東京》就係用呢個廠景拍出嚟。




館長庵野秀明特撮小道具展
日期：即日起至 10月 8日（ 9月 18日休息）
時間： 10時至 18時（最後入場時間 17： 30）
地點：東京都江東區三好 4-1-1東京都現美術館
入場費：成人 1,400日圓、中學生 900日圓、小學及以下 400日圓
網頁： http://www.ntv.co.jp/tokusatsu/

遊日上網　 4G LTE pocket WiFi抵玩提案

Check番幾家網絡商收費，日本數據漫遊嘅 1day pass大約為$180/日，非常之貴。近年有唔少人選擇訂購 Docomo啲 Visitor SIM，不過唔係限制上網速度就係有限數據量，如果去幾日短 trip，最近又有個新玩法，原來香港有公司租出 4G LTE pocket WiFi（$1,000按金，$80/日，最少租 4日），包埋數據量無限任用，流量足夠分畀 8部手機一齊用，加上速度夠快，可以打埋 skype電話慳電話費。情侶兩份用，當你去 5日，每人都不過兩嚿水。

間公司叫 VisonData維訊數據，佢租嘅呢隻 e-mobile 4G pocket WIFI，喺日本仲係由 AKB48板野友美代言，夠晒日本啦！
http://www.facebook.com/Visondatahk








b-mobile由 Docomo推出，分 14日任用限速版（上下載速度 300Kbps）同埋 1GB數據量，用晒就玩完嘅版本（ 14Mbps下載/ 5.7Mbps上載）同樣係 3,980日圓。訂購時仲可以揀 micro SIM或者大咭。 http://www.bmobile.ne.jp/english

日本直擊及部分攝影：司徒港燊
協力：鍾世傑
Special thanks： SCEH、 Capcom Asia