close
早前，有指女子組合Hot Cha成員Regen，因為同Neway太子爺薛世恒傳緋聞，而激嬲咗薛嘅女友陳法拉，結果被Neway旗下嘅唱片公司放逐澳洲，但係最近Hot Cha破例三位成員歸位，拉大隊去咗台灣墾丁同高雄拍廣告。據東姑得知，幫售賣攝影器材嘅舖頭做咗四年代言人嘅Hot Cha，非常好腳頭，產品銷量激增，所以Hot Cha雖然已拆夥，但係喺廣告商重金禮聘下三女再度重逢。
Regen去咗澳洲一排黑咗啲又肥咗啲，肯定係喺當地勁食海鮮同享受陽光與海灘嘞。
舊年Hot Cha以性感水着上陣去咗日本沖繩拍廣告，令到一班宅男睇到眼都唔眨，今年個廣告就冇泳衣睇囉；不過，好彩都有貼身單車衫騷身段。廣告足足拍咗五日，Winkie、Crystal同Regen每日都要凌晨四點起身化妝，拍到日落先可以收工。拍完呢個廣告之外，有傳Regen年尾就會歸隊，到時Hot Cha三女又可以再戰樂壇。
今次廣告主題係依家最流行嘅踩單車環島遊，Crystal（左）同Winkie（右）一邊踩單車，一邊影相，實在樂在其中。
雖然今年個廣告啲服裝有別於舊年嘅水着，但係貼身嘅單車套裝，一樣可以展現Hot Cha嘅玲瓏身段。
全站熱搜
留言列表
