海膽三文魚子壽司飯定食$188

尋澄味

深宵「足」地定食 Doraya

2012年06月29日 ~~ 第883期飲食男女

歐國盃晚晚精彩，希臘神話再現，「爛橙」零分出局，不論戲碼強與弱，總之唔睇瞓唔着。
多得科技發達，令到一班愛波之人，可以輕鬆用 iPad去到邊、睇到邊，大家再不用焗住去捱茶記和酒吧的「剩飲$60位」。

於是，睇波和食消夜這個 crossover的聚腳點，就成為了近來最切身的話題，就似足當年的宅男相約在老麥屠龍一樣有氣氛。互相交流情報和測試之下，銅鑼灣的魚生飯定食，是為準備演唱會而進行地獄式操 fit計劃的首腦「葛爺」之推介。營業至深宵的 Doraya，一直都是魚生刺身粉絲的朝聖地，深夜時分食魚生飯，隔籬左右都是日本人，還有附近收工的姿整 sales情侶，唔知以為去咗日本築地市場。圖文並茂兼中日對照的餐牌，除了將小食、烏冬、刺身壽司分門別類，當然亦有店長推介。
健康之選的凍番茄，剝皮之後在柚子醋浸泡，原個切片上，冰凍清甜勁開胃，絕對勝過一樽消腩丸的藥用價值，熱捧英格蘭的劉翁更說對前列腺有微妙的保健作用，他獨自「隊」兩個。
魚生飯是 Doraya的主打，趁未送上先食一客最 basic的蛋卷，蛋卷蛋味濃郁而且沒有造作伴碟，啱晒今屆捧蛋的洛賓「獨食」。

日式番茄沙律$38

海膽拼三文魚壽司飯定食，魚生的肥美程度，勁過日本料理門口的食物模型，再加上大大板的北海道函館海膽，與越光米煮成的壽司飯一併撈勻，是真正的金鑲銀，啖啖軟綿，一啖吞盡太平洋的深海精華。香葱吞拿魚腩蓉飯，抵食程度嚇壞人，大大 pat的吞拿魚腩蓉勁肥美，魚味超濃，入口即溶的感覺近乎食吉隆坡的貓山王榴槤，好在有大量葱花和紫菜絲平衡了魚腩蓉的肥膩，才不致食完肥到坐爆櫈。魚生丼以外的豬肉生薑燒定食，豬肉肥香之中還帶軟筋，即時想起遠在新宿的松屋。
鹽燒吞拿魚骹鹹香惹味，最啱送酒。把減肥計劃徹底破壞的汁燒雞扒，香脆雞皮和軟滑的雞肉中間，還有一層黃油的肥膏會在口中爆開，淨食送酒一流，送飯更是好幫手。
話咁快到四點九，球證鳴笛完場，我不愛 Russia，不殘戀西班牙，在床上只想起 Doraya。

香葱吞拿魚壽司飯$125

汁燒雞扒$88

Doraya
地址：銅鑼灣駱克道 451號地下
電話： 2834 8851

少年食神林澄光（ Michael）
旅遊飲食達人，醉心研究各國飲食文化，深信飲食無分貴賤，致力用有限金錢換無限快樂。近作有《少年食神曼煮泰菜》、《秘．台灣隱世美食遊》