close


3/3闔家去生日會
安仔和老婆歐倩怡帶兒子出席兒子同學的麥當勞生日會。到埗時，安仔錫住曾有腰患的歐倩怡，囝囝全程由自己抱。

郭晉安在新劇《東西宮略》中飾演花天酒地的昏君，夜夜笙歌。不過，在現實生活中，他卻是個不折不扣的住家男人及絕世好爸。
自從老婆歐倩怡去年誕下女兒，幫郭家湊成個「好」字後，郭晉安更黐家，難得近日有假期，安仔實行日日孖住老婆湊仔。
生第一胎時，歐倩怡曾因抱仔導致腰骨移位睇脊醫，郭晉安為免老婆再傷及舊患，現在嚴禁老婆抱大仔令山。至於八個月大的細女以雅，他亦特別吩咐讓菲傭抱，歐倩怡則要坐下來才可接手抱B。


近日趁住放假，郭晉安與歐倩怡日日行孖咇湊仔。郭晉安大仔令山精靈活潑又好動，加上差不多四歲的令山已有四十多磅，郭晉安為免老婆再弄傷腰，每次出街都由自己出手抱仔。

做瑜伽紓緩
他說︰「雖然老婆條腰好番啲，但我都成日提佢要注意坐姿，叫佢着平底鞋。佢依家有做瑜伽紓緩，始終輪流湊兩個細路，真係好辛苦，老婆有時都嗌攰。至於抱仔，就梗係由我嚟做。個仔依家好重，我抱一陣都手痺，加上佢鬼咁好動，成日郁身郁勢，所以叫老婆唔好抱佢，費事再整親。「我真係覺得做女人好偉大，之前佢佗個女時嗌腰痛，我見到都心，所以同佢一齊會扶出扶入。依家細女都盡量叫工人抱，怕佢再扭親，就算佢坐喺度抱，都叫佢咪抱咁耐，要休息吓。」有時安仔聽到朋友有些護腰的食療，也會立刻抄低，並會先做「白老鼠」，才讓老婆試。郭晉安坦言感謝太太為她生下一對可愛的小寶貝，現在更加珍惜一家人的時間。他說︰「有咗仔女之後，令我更覺得要錫老婆。一齊湊仔時，會遇到好多問題，兩夫婦嘅合作同互相扶持好重要。」

怕囝囝呷醋
安仔讚囡囡乖巧易湊，甚得其歡心，但怕囝囝呷醋，所以會加倍愛他。「始終個女仲細，會照顧佢多啲。個仔初初都有啲呷醋，所以我都成日提醒自己唔好偏心。依家Brad（郭令山）同同學有咩聚會，我同老婆都會盡量參加，令佢覺得父母好重視佢。」問到明星爸媽出席囝囝同學生日會時，是否很有面子，他說︰「Brad見到電視嘅我，會問︰『大王做啲乜㗎？』我話佢知爸爸做藝人，就好似佢上台扮小蜜蜂一樣，佢好似明白咁點點頭。我同老婆跟其他父母一樣，話題好自然都係仔女，做老竇好似日日都學緊嘢。」談到新劇《東西宮略》受歡迎，安仔亦不禁沾沾自喜。「係呀！依家我出街個個都叫我做大王，咁我咪叫番啲女fans做美人囉。」

齊宣王淫眼出位
網友對上周平均收視28點的《東西宮略》有彈有讚，彈的主要都是批評抄電影版《鍾無艷》的對白及服裝不似戰國時代。至於讚的，都是讚安仔生鬼地演繹出齊宣王自大、急色的個性。 ####


到達又一城的麥當勞，歐倩怡忙於和其他家長打招呼，安仔最初則坐在一角睇住兒子玩。


家長見到安仔後主動和他打牙骹。而小朋友見到安仔，就個個叫他做「大王」，得安仔十分開心。


離開商場時，歐倩怡要覆電話，安仔則拖實兒子，欣賞樓下溜冰場溜冰人士的舞姿。


在《東西宮略》中，陳敏之用口餵郭晉安食提子一幕，被指兒童不宜。


17/2餵仔食榴槤當日安仔一家去九龍城地茂館食甜品，兒子嗜食榴槤，安仔為他點了榴槤班戟，臨走時歐倩怡拉實個仔，怕佢周圍走。


上周出席《東西宮略》宣傳活動時，安仔表示在兒子面前自己唔會扮嚴父，難怪令山直呼他「安仔」，他都不介意。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄