練得鋼條身形、六嚿腹肌的 Rex，出身拳手世家，父親是七屆香港業餘拳擊冠軍，二哥是四屆香港業餘拳擊冠軍。父兄為了現實，只能業餘，授徒教 Boxing搵銀養家。
直至家中么子 Rex，在父兄庇蔭下，得以全心全意練拳，成為香港首名職業亞洲拳王。

城市打游擊

一代拳王

2013年01月24日 ~~ 第1194期 香港《壹周刊》

曹星如（英名︰ Rex），香港開埠以來，第一個香港人成為西洋拳「亞洲拳王」。
比賽後，滿臉鮮血的他喘着氣說︰「香港人都可以掂！」
引來全場高呼，連財爺曾俊華亦寫網誌恭賀。
Rex年僅廿五歲，出身拳手世家，父親兄長都習拳練武，後來為了生活，父親教拳授徒，兄長教 Boxing幫人健美減肥，直到家中么子 Rex，在父兄庇蔭下，才得以全心全意全職打拳，成就今日一代拳王。
電影《一代宗師》金句：
「有的活成面子，有的活成裡子；能耐是其次，都是時勢使然。」


上月十一日，灣仔會議展覽中心舉行 WBC亞洲洲際金腰帶賽， Rex打了十個會合，最終對手投降。（ DEF Boxing圖片）

去年十二月十一日，灣仔會議展覽中心舉行了一場 WBC亞洲洲際金腰帶拳賽。 WBC是世界拳擊理事會、全球最具影響力的職業拳擊組織。
是次亞洲拳王對賽，身高一米六九的香港代表 Rex，大戰來自吉爾吉斯的拳手沙利夫。吉爾吉斯出產的拳手，經常在世界級拳賽獲勝。論經驗、論技術，論身形，論所有條件， Rex全沒勝出把握。 

倒下　站着

Rex面對來自出產世界拳賽冠軍吉爾吉斯的對手，不能強攻，只能巧取，最後憑體力及出拳點數，令對方投降。（ DEF Boxing圖片）

擂台上叮一聲，雙方開始埋身肉搏。
開戰不夠一分鐘， Rex已被對手步步進逼，逼到埋角，對方向着他頭顱狂攻，吃下一記右拳， Rex立即倒地。
「第一個 round，已經被對手 knock down（擊倒），當時我覺得所有嘢都完了。」全場以為 Rex輸定了，他自己亦覺自己輸定了。怎料，在倒數最後一秒中， Rex掙扎站起來，舉起雙拳揮向對手，對方被突如其來的一拳，打到腳步浮浮。
最終，每一回合， Rex都被對方打低，又站起身；每次打低，又站起身，足足打了十個回合。
對手最終疲勞透支，在台上拋白毛巾投降，裁判舉起 Rex的手以示獲勝。
《一代宗師》中解說所謂功夫：「一橫一直，錯的，倒下；對的，站着。」這場拳賽， Rex最終「站着」，換來一條亞洲洲際金腰帶，「亞洲拳王」第一次落入香港人手中。 

父影

Rex從前人生零目標，現在背着父兄之名，絕不能有辱家聲，天天奮力練習。

Rex成為亞洲拳王，最欣慰的是他的父親曹樹仁。
現年六十三歲的曹樹仁，是七屆香港業餘拳擊冠軍及亞運代表。
「我十五歲開始打拳，香港第一批華人學西洋拳。」曹父說。
六十年代的香港，年輕人打拳習武，都被認定「爛仔」，曹父當年亦只敢偷偷去學。
「邊度敢話俾屋企人聽自己打拳，我哋嗰一輩，小學畢業就出去打工搵錢，都係做扎鐵油漆，月入八十幾蚊。嗰陣朝早上班，夜晚偷偷去打拳。」
曹父以業餘拳手身份參加本地賽事，成為七屆冠軍，歷史創舉，及後多次被邀請代表香港到外地參賽。
「都是香港拳擊總會出旅費，但你自己都要死慳死抵儲夠錢先可以出去比賽㗎！點解？好似有次去伊朗參加亞運，一次比賽用你一個月時間集訓，一個月唔可以工作，零收入，當時我已經結咗婚，要儲定一個月糧餉俾屋企先得。」回想當年，曹樹仁亦激動地說。
打拳歸打拳，現實歸現實，家有老婆四個仔，柴米油鹽醬醋茶一樣也不可缺。終日拳打腳踢，每次回家口腫面腫，妻子開始有怨言，最終在么子 Rex只有五歲時，離婚收場。 

兄長

Rex（左）與二哥 Ralf同以打拳維生，弟弟全職打拳，全靠二哥教拳賺錢支持生活。

面對現實，曹父只嘆說︰「可能沒有時間陪佢（老婆），打拳……真係唔易。」
不能靠打拳搵食，曹父於廿七歲時到天天體育會教拳收徒弟，可以傳承，收入亦算夠生活。
父親影響下，四個兒子，全部學拳。 Rex的二哥，現年三十三歲的曹聲揚（英名︰ Ralf），亦是四屆香港業餘拳賽冠軍，曾代表香港參加國家全運會。
一如父親當年，打拳只限業餘，中學畢業後 Ralf曾任職倉務、跟車、助廚多份工作。○四年，轉職在拳館教 Boxing，月入一萬多元，後來亦介紹細佬 Rex一同教拳。
Ralf直言，自己曾幾何時，都夢想成為「全職拳手」，一心一意只在擂台上打拳。「細佬有天分，好有潛質。我就淨係得努力，咁不如俾細佬試吓先。細佬可以轉做全職拳手，多啲時間練拳，所以佢本來教拳啲客人轉來給我教，收返嚟嘅學費，我會分番三成俾佢，一世人兩兄弟，有限資源，留給弟弟。」 

家聲

Rex是第一個奪得這條 WBC亞洲洲際金腰帶的香港人。

有父兄在背後分別作精神及財力支持， Rex可以無後顧之憂專心做職業拳手。不過 Rex直言，自己以「懶」聞名。
Rex五歲時面對父母離異，四兄弟全歸父親管教，耳濡目染，天天在家拳打腳踢。
他回憶童年說︰「我返學唔係瞓覺就打波，從來未做過功課，日日留堂，全校都識我。响屋企就由朝到晚打機，餓都唔會郁，等有人返屋企煮飯俾我食。」 


父親曹樹仁(右二)一門四傑，大仔（右一）、二仔（左二），三仔（左一），四仔 Rex（右三）全部自幼跟他學拳，最後由 Rex為他完成職業拳手，一代拳王的夢想。

讀書不成， Rex中學未畢業就出來做跟車、倉務、裝修等工作，每份工都做不長。直至二哥找他做兼職拳師，他才如夢初醒。
「當時有人問我最叻係乜？我諗來諗去，只識打拳，我先知原來除咗打拳，我咩都唔識。」
初時教拳，月入八、九千元， Rex亦愈打愈有趣，於是竟然根治了「劣根惰性」，識得自動自覺返拳館練習。
Rex經理人 Jay邊在拳館嚴厲督促 Rex打拳，邊向記者嘆說：「每次發覺他又懶散時，我就會嚇佢，而家佢代表『香港』出賽要生性。最有效的一句話，就係話佢要保住『家聲』。」
背着父兄之名，一代拳王，在擂台上揮出「最用心」的左拳（註：他是左撇子）。 

職業拳手難行

Rex於二○一一年九月正式從業餘轉為職業拳手，香港開埠以來第一人。
在香港要成為職業拳手，受到很多掣肘。
「就算你係香港最 top的拳手都冇用，因為最終揀邊個代表香港出賽全由拳總（香港拳擊總會）決定，就算我哋自己話願意自掏銀包俾錢出外比賽，拳總認為唔得，你都唔會有機會。」
Rex的經理人 Jay認為香港拳擊總會做法不透明，令不少有潛質的拳手損失海外拳賽機會，所以 Rex成為職業拳手後，就開始自行出錢搞拳賽。
Jay指出，在香港搞一場拳賽約要二百多萬港元，包括租用場地、宣傳、邀請選手及裁判等項目。現時全由他找贊助商資助，由於規模有限，扣除門票後，仍每場蝕數十萬港元。
蝕錢都要舉辦，因為在國內外，職業拳手必須不停參加比賽才有機會做出成績，爭取更高世界排名。有相當知名度後，才可以吸引更多人入場觀看拳賽及獲得商界贊助。 

撰文：陳剛
攝影：韋平