跟咗小甜甜咁多年，王禮泉手揸物業得兩個，值二千萬，認真小巫也。（關永浩攝）

中環人語

小甜甜前密友驚世報料

2013年01月17日 ~~ 第1193期 香港《壹周刊》

上週五中午時分，小宗收到一個神秘電話：「王禮泉一陣會去 ICAC報案，快啲去影相啦！」此王禮泉，正是已故華懋主席龔如心的貼身助手、現為華懋集團顧問。既然有人預先報料，小宗當然即刻派人前去恭候，果然下午三時，佢現身廉署總部，並一支箭入咗去報案，逗留咗兩個半鐘，出返嚟就只係講咗兩個字——「唔該」，咁就坐上七人車絕塵而去。


「 One life one love」呢份遺囑嘅真假，拗足二十三年，都咪話唔厭！

王禮泉一直係龔如心嘅「私人助理」，背景複雜，專幫手處理娛樂事業，如華懋喺尖東租俾夜總會嘅鋪位等，黑白兩道都吃得開。佢早前已經放過聲氣，話有新證據，證明龔如心手持、由王德輝喺 90年寫嘅「 one life one love」遺囑，根本係假㗎；佢又抨擊華懋慈善基金有人失職、腐敗及賬目不清，仲話會喺適當時候採取行動，捍 衞王德輝家族嘅資產！
鬼咩，同樣係千億女富豪嘅密友，王禮泉現時手持紅磡都會軒及元朗加州花園等單位，市值約二千萬，而咁多年炒樓亦只係賺千幾萬。相對於小甜甜嘅知己陳振聰，呀，又真係少咗啲喎！ 

Give me a break
插住嚟減壓

中環返工，有邊個唔大壓力？小宗聽聞有唔少白領，都會去上環太平山街的 Tallensia Floral Art，玩 Floral Jamming減吓壓、輕鬆吓。呢門嘢外國興咗好耐，而家該花店就係每逢星期六搞即興插花，花款四十多種，任君選擇；三小時內慢慢插，傑作可以攞埋返屋企，細心欣賞，盛惠三百八十。
喺中環返工嘅公關李小姐就話抵玩，平日買紮花都唔只呢個價錢，又唔使次次放假都係行街睇戲食飯咁話。有唔少大公司會包場俾員工，會德豐更加厲害到搞「到會」，將活動移師到自己的 Gallery，實行齊齊減壓。負責的花藝設計師 Lowdi Kwan就話，插花可以睇到一個人的性格，插出來顏色簡單統一嘅，就係好有目標，太豐富呢，就可能心大心細，唔知自己想點。相信啲公司高層，就係藉此睇住班員工諗咩，大家醒目啲啦！


呢間花店喺太平山街，平日喺中環想抖啖氣都難，咪趁週六去輕鬆吓囉！（于港民攝）


睇吓班 OL對住盆花幾開心，小宗覺得佢哋人比花嬌。（于港民攝）

本週廣告

你有某財團嘅黑幕想爆？你知邊間上市公司造假？你仲想舉報地產霸權嘅不公？歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/ whatsapp： 6829 5929。

彤叔一家「親戚相」

去開中環新世界大廈，小宗每次都喺 lobby間 Starbucks飲番杯咖啡 hea一 hea，不過呢間 Starbucks已經結業，隨之而來嘅係另一間同樣賣咖啡嘅餐廳 Classified。 Classified由彤叔孫女鄭志雯之老公、亦即鋼鐵大王孫兒龐建貽創辦；餐廳開埋入新世界總部，一家人也。而最有「一家人」感覺者，莫如龐建貽之相貌，竟然與鄭志雯嘅細佬、亦即佢舅仔鄭志明有九成九相似（如圖）！大家都戴住粗框黑眼鏡，相貌忠誠，唔通親戚相見都會愈來愈似？


呢個夫婿究竟係彤叔個孫鄭志明定彤叔孫女婿龐建貽呢？


開估！我係彤叔孫仔鄭志明，隔籬嗰位先係龐建貽，大家咪認錯呀！
（設計對白）（廖健昌攝）

長毛窮風流

本週鏡頭

一月十一日星期五，晨早六時剛過，「尊貴的議員」長毛•梁國雄喺金鐘海富 Canteen開餐——食三文治啫。
長毛告特首梁振英選舉造假，輸官司；終審庭兼判佢賠堂費及對方律師費。長毛話如果破產就冇議員做，故此會設法籌款作賠償。咁嘅環境，仲學乜人去金鐘食卅幾蚊份早餐呢，又？ 

求諸海南

本週新店

一樓一乃有港英特色之行業，有個時期幾為北姑壟斷。強國人富起來後，北姑一詞已然褪色矣。
不經意，北角七姊妹道平地一聲雷出現「一流一海南雞專門店」。菲傭、印傭短缺，就話改求於孟加拉啫，海南雞替代北姑，得唔得㗎？ 

金牙大狀講嘢
共產黨格外襟撈

張曉明揚言「西環不治港」，足見佢真話同謊言都分唔開，難怪襟撈過戈培爾。（《蘋果日報》圖片）

中聯辦新主任張曉明貌似開明，但臭罌出臭草；共產黨就必定假、大、空，講大話，即使嚟到香港亦戒唔甩。故此一抵埗，佢就揚言「西環不治港」。講得咁口響，夠膽就同契仔謝偉俊公開對質，睇吓邊個講大話。
「西環治港」當又不只於插手地區選舉而已，冇西環發功，你估 689又做唔做得成特首呢？至於西環點樣干預特區之政改進程，留番張曉明同劉慧卿撐枱腳慢慢回味啦！
納粹黨宣傳部長戈培爾話，謊言說上一千次就係真理，可見佢老哥起碼都知乜嘢叫謊言。張曉明啲咁嘅共產黨就連真話同謊言都分唔開，而只知黨性服從；阿爺話咗「一國兩制」、「港人治港」，咁唔理西環做過啲乜，都肯定唔係治港。納粹黨識得乜嘢叫做謊言，共產黨唔使識，難怪佢哋襟撈咁多啦！ 

中環人語迷你版

男人連結婚紀念日都唔記得，何況個花棚！

估中邊個中環人講呢句說話，送你 PNY 8GB SDHC Class 10記憶卡一張
有意參加者，請於一月二十一日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

答案
將來施政千祈不要疏忽。

唐英年
得獎者： Yeung Tsz Suet
中獎時間： 1:00pm 9/1/13 

本刊員工及直系親屬不得參加。
為求公平及杜絕偷步搶答起見，請於星期三下午一時後
來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年一月二十四日本欄揭曉。 

(宗菁華)