向來兇神惡煞的崩牙駒，難得和「大家姐」司徒玉蓮（右二）忘我上台扭腰跳舞，小艾（左二）和祥嫂（左一）則在旁高歌助興。（馬龍攝）

八卦陣

崩牙駒　祥嫂　跳老舞

2013年01月17日 ~~ 第1193期 香港《壹周刊》

外號崩牙駒的澳門江湖猛人尹國駒，出獄後動作多多，為熱身復出作準備，繼前週以為老婆慶生，筵開四十八圍之後，上星期四，再以母親生日為名，搞了一場筵開一百三十三圍的盛大壽宴。


散席後崩牙駒意猶未盡，將酒家變舞池，大演 Cha Cha。（馬龍攝）

席間崩牙駒心情靚爆，不停滿場飛和賓客握手言歡，興起更邀請多位席上嘉賓輪流上台大唱經典懷舊金曲。壓軸更和街市偉紅顏知己，在澳門賭界被稱為「大家姐」的司徒玉蓮、新馬仔老婆祥嫂和女兒小艾，一同上台載歌載舞，仲大跳 Cha Cha。四位雖然加埋成二百歲，但寶刀未老，扭盡條腰跳老舞，一時之間令記者誤以為置身七十年代舞廳。
至凌晨散席時，賓客走得七七八八，崩牙駒跳舞跳到着晒火，唔捨得走，仲吩咐侍應將場內燈光變至 disco閃令令效果，調大音響，成班人又再圍圈跳 Cha Cha，最辛苦是旁邊一班保鑣，又要守住門口，又要望着駒哥在台上左搖右擺喺到扭。（艾馬） 

本週圖片　月薪九萬八「實 Q」 Ronald陳

Ronald（箭嘴）勉強擠出笑容，以身擋住示威者，政助瞬間變「實 Q」。（鄒潔珊攝）

立法會討論彈劾特首動議，預咗被否決，不過就有近四百名市民到場聲援。唔少建制派議員離開立法會時，被集會人士包圍，對住佢哋大叫：「可恥！無恥！」官員當中，只有政制及內地事務局局長譚志源夠膽喺集會人士面前行返政府總部，局長嘅政治助理陳岳鵬當然要護主，擋住衝向局長嘅示威者。月薪九萬八，原來人工係包埋做「實 Q」！（林璐菁） 

立會蔣元秋
男人唔夠揪

立法會元秋蔣麗芸上星期又喺會議上力撐梁振英，聲大大咁話︰「好多男人連自己嘅結婚紀念日都記得唔清楚，何況個花棚！」歪理都可以講得咁理直氣壯，認真厲害。
見到蔣元秋嗰種氣焰同霸氣，記者忍唔住請教堪輿學家區仲德。佢話從面相角度分析，元秋法令較闊又深，兩顴飽滿，上唇窄下唇薄，總括嚟講個人好有霸氣，氣勢凌人，係人都要就佢，否則就會俾佢鬧到狗血淋頭，兩、三個男人都唔夠佢講。


繼「你使唔使炒咗佢（吳克儉）呀？」蔣元秋再次發表驚人金句：「好多男人呀，連自己嘅結婚紀念日都記得唔清楚啦，何況個花棚！」愛狼之心，路人皆見。（羅國輝攝）


well done!（設計對白）
應該嘅！（設計對白）
唔知林鄭月娥係咪聽完元秋嘅「愛的宣言」後大受感動，散會後即刻行埋去拍拍佢手臂，以示鼓勵。（羅國輝攝）


區師傅話，元秋當旺，連男人都要讓佢三分，唔知佢老公梁海明同唔同意呢？（《蘋果日報》圖片）

區師傅仲話，一九五五年出世，屬羊嘅元秋而家行緊運，只係今年受凶星「勾神」同「歲煞」影響，容易口舌招尤，過多一個月踏入蛇年，佢個氣勢會仲旺盛，一直旺到 2015年羊年先會差啲。
唉，如果區師傅算得準，即係話，蔣元秋將會响立法會愈鬧愈起勁。奉勸各位議員，一字記之曰︰忍！記住︰認真一定輸！（林璐菁） 

高官退休喜 VS悲

退休後嘅周一嶽非常風騷，仲同記者講解如何酒後駕駛而不超標，就係只可飲一杯紅酒，仲要飲完最後一啖後兩個鐘先揸得車。醉駕波，學嘢啦！（羅國輝攝）

「官場技安」前食物及 衞生局局長周一嶽週日風騷出席新民黨兩周年晚宴，無官一身輕嘅佢，向記者大談自己超梳乎嘅退休生活，仲講到明暫時無打算執業做番醫生。佢話而家得閒行吓山、唱吓歌、打吓波，又可以每星期上堂學唱意大利歌劇，仲有時間睇埋近期 hit爆嘅電影《孤星淚》，認真寫意。 

周一嶽退休歎世界，但同佢差唔多同期退休嘅前 衞生署長林秉恩就無咁好彩，退休個幾月就輕微中風，雖然無乜大礙，但而家出入都要拎住枴杖，就連上個月去禮賓府領受銀紫荊星章嗰陣，都行到拐吓拐吓咁。上星期，記者喺瑪麗醫院撞到佢，佢由老婆陪住去睇眼科，記者見佢成個 look都好憔悴，比起做官時個樣老咗十年。查實佢今年只係六十一歲，希望佢快啲醫好呢啲小毛病，好好享受退休生活。（林璐菁）


林秉恩退休後不幸中風，而家出入要老婆相陪兼揸住枴杖，塊面瘦咗又愁咗。


想當年，一副愁爆樣嘅周一嶽，同埋精神奕奕嘅林秉恩，不時聯手統領抗疫戰線。（《蘋果日報》圖片）