OLED曲芒內嘅有機自發光物料，厚度只得頭髮直徑三十分之一。

CLOSE-UP

2013科技預覽

2013年01月03日 ~~ 第1191期 香港《壹周刊》

無驚無險又到新一年，世界末日 no show，又可以將焦點放番喺手機、相機。講到今年嘅科技話題，屈曲屏幕、手機付費將會係兩大重點，另外，升級版嘅無線充電技術亦會令呢項用途變得實用，聽吓專家分析，就知點解。

HD抬頭

韓國品牌一向睇好 OLED技術， LG早前發布嘅 55吋 OLED電視，厚度只有普通 LCD電視一半，難怪 OLED曲芒都由韓國 Samsung做先。

講到科技趨勢，其實幾乎每年都有屏幕份，由以往嘅 Plasma、 LCD、 OLED顯像技術，到高清、立體等等嘅畫面質素，話題總唔會少。 Kelvin就預測今年嘅屏幕話題，一定係手機高清屏幕，同埋講咗好多年嘅曲芒。「手機、 tablet將會繼續大熱，不過，處理器、電池之類嘅硬件技術已去到樽頸位，突破性唔大，反而將 1920× 1080高清解像度屏幕放入手機，好似 HTC、 ZTE都已經做緊，今年將會成為主流。」 

曲芒彈起

Kelvin表示有觸控功能嘅 OLED曲芒最多只可以屈到拱形，「因為再屈落去會影響觸控準確度，起碼要等多幾年先解決到。」

梁嘉權 Kelvin
主攻光子學（ Photonic）研究，兩年前同朋友合資生產 tablet，並在內地設有實驗室進行屏幕研究。

另外， Kelvin話 OLED曲芒有機會彈起，因為係令手機屏幕變大，機身同時又可以變細嘅必要元素，「上年只得 Samsung表態話會今年生產，所以大家只會諗到用喺手機、 tablet上，但其實裝喺汽車擋風玻璃上面做導航、街燈柱上顯示流動廣告，甚至喺衫袖上面加個芒播片都得。」不過， Kelvin都要潑一潑冷水，「芒係就係可以屈，但觸控方面就仲未解決到準確度問題，未必可以作細緻觸控。」 

手機消費

章濤話日後去戲院買飛，會收到一連串消費資訊，連諗節目都慳番。

章濤
無線電技術商會主席、商台互動顧問

手機付費，喺外國嘅應用已算普及，好似上年倫敦奧運，選手喺選手村裡面嘟手機就買到嘢；韓國亦將首爾多個地鐵站改造成虛擬商店，只要用手機對住月台上嘅 QR code，就可以用手機買餸，慳番唔少時間。
上年年尾，手機買物終於殺到香港，滙豐就率先為手機推出 NFC（ Near Field Communication）拍卡付款服務，其他銀行唯有死跟，例如恒生已宣布今年上半年會推出類似服務。不過，章濤就話如果以為手機只可充當「八達通」，諗法實在太膚淺，「用手機直接俾錢只算係最簡單應用，尤其當 Apple嘅 iOS 6設有 Passbook功能，用家可以將登機證、戲飛同埋禮物卡，全部擺入 iPhone，要用嗰陣拎部 iPhone出嚟，就可以直接幫你填好晒所有個人資料， 㩒幾個掣就可以買到嘢，嚟緊甚至可以搞一站式消費，商機無限。」
章濤仲話新推廣方式甚至會改變傳統消費模式，「以前消費者上網睇產品再俾錢買，賣家較為被動，但將來賣家可以借助手機定位及推播通知（ Push）功能，主動搵出隱藏買家。舉例以前嘅戲院 app只限買飛，但結合定位同推播功能後，玩法變化可以更多，好似用手機買完戲飛，系統會根據仲有幾耐先開場，推介用家去附近邊間食肆，散場時仲會顯示埋返屋企嘅交通工具，又或者推介附近酒吧都得。」 




地鐵閘門變成虛擬商店，只要用手機一嘟即可買餸，再由專人送上門，極之方便。


滙豐去年率先推出 iPhone拍卡付款服務，預料今年將有更多銀行會照跟。

隨處 Wi-Fi

港鐵嘅 iCentre提供免費 Wi-Fi上網，唔使再輪候電腦。

除咗手機俾錢會 hit，近年愈嚟愈多公眾地方都開放免費 Wi-Fi，等網民無時無刻都可以無線上網，例如，港鐵上年已經喺 14個車站大堂或月台，提供免費 Wi-Fi服務，今年會再擴展落去，九巴亦嘗試喺幾個轉車站加裝免費 Wi-Fi。另外，近年唔少航空公司都研究緊喺客機內強化 Wi-Fi，波音就喺上個月進行實飛測試，記錄究竟飛機上各個區域嘅 Wi-Fi信號接收能力，同埋會唔會干擾飛機同控制塔嘅無線電通訊。 

3D隨街印

Formlabs FORM 1無論外形同操作都好過 MakerBot Replicator，就算貴少少都值得。

上年 3D打印機開始興起，加上平價 3D打印機 MakerBot Replicator萬幾蚊有部，令唔少人入咗部返屋企試印。不過， Replicator又要裝膠線，又怕印製過程走位，反而今年見街嘅雷射 3D打印機 Formlabs FORM 1，定價雖然要兩萬幾蚊，但只要倒啲溶液入去就可以打印 3D模型，操作簡單好多。 

大熱電動車

Tesla電動跑車 Model S賣相吸引，估唔到性能亦夠強勁。

電動車上年叫做站穩陣腳，當中獲《時代雜誌》選為二○一二最佳發明嘅電動車 Tesla Model S，更加係最佳例子，唔單只賣相吸引，性能亦夠強， 0至 96公里加速只需 5.6秒，扭力強過唔少電油跑車，而且充滿電可行駛 480公里，真正實用。至於今年，就要留意全新寶馬 i3電動車系列，快速充電技術（ 30分鐘充滿八成電力，可行駛約 160公里），值得期待。 

升級充電

有無線充電後，上車唔使再嘥時間搵充電插頭，隨手掟上塊板就開得車。

無線充電發展多年，不過一直都冇統一標準，直至一○年 Wireless Power Consortium推出 Qi標準， Samsung、 Sony、 HTC、 Panasonic、 Philips等超過一百個品牌已相繼加入，好似 LG、 Nokia已先後推出咗 Nexus 4同 Lumia 920，豐田汽車（ Toyota）亦會為今年推出嘅 Avalon車系（香港冇得賣）加入 Qi充電裝置。 

眼控手機

創辦人 Sergey Brin近日經常戴住 Google Glass做訪問，仲賣花讚花香話新產品一定 hit。

上年 Samsung推出嘅 GALAXY S III配備眼球追蹤技術（ eye tracking），當用家視線離開手機就會自動熄機。丹麥哥本哈根大學（ University of Copenhagen）研發嘅「 Senseye」眼控手機系統仲勁，淨係用隻眼就可捲動網頁同打機，仲話今年同手機品牌合作量產化。另外，傳聞快將上市嘅 Google Glass，將會加入專利眼控解鎖技術，話題多多。 

2013年必睇「科 show」

想掌握最新科技走勢，唔一定要日日追住科技新聞，上半年只要留意以下幾個重要展覽或發布會就夠。

一月
6-7日　 PMA（ Photo Marketing Association International）
喺美國拉斯維加斯舉行，主力展覽相機同攝錄機，各大品牌都會發表話題新機，好似上年 Nikon就發表咗全片幅旗艦機 D4，今年傳聞新機則有 Canon EOS 7D Mark II及 Sony 2000萬像素全片幅單鏡機。
網址： http://pmai.org


唔少突破性產品或技術，都會揀 CES亮相。

8-11日　 Consumer Electronics Show（消費電子展）
簡稱 CES，緊接 PMA於同地舉行，參展商類型廣泛，幾乎乜嘢電子產品都有。
網址： http://cesweb.org

31日至 2月 2日　 MacWorld
香港人捱眼瞓都要睇 MacWorld，因為年年都有新品發布，不過全系列 Apple產品都喺早兩個月升晒級，今年唔知仲有乜值得捱眼瞓？
網址： http://macworld.com

二月
25-28日　 GSMA Mobile World Congress（流動通訊會議）
手機界晒冷活動，每年都會喺西班牙巴塞隆拿舉行，唔單只有新機，仲有大量流動新技術或服務登場，可以話係未來生活嘅指標，同獨沽一味齋睇新機 show有好大分別。
網址： http://gsma.com

三月
5-9日　 CeBIT（漢諾威消費電子、信息及通信博覽會）
雖然近年 CeBIT大跌 watt，唔及 CES同流動通訊會議矚目，不過展場佔地達一百萬平方米，分為 27個展館，論規模， CeBIT依然唔可以睇小。
網址： http://cebit.de

五月
15-17日　 Google I/O
以往喺美國三藩市舉行嘅 Google I/O，只係 Google同程式開發公司嘅交流會，講軟件居多，不過近年 Google積極進軍 gadgets界， Google I/O逐漸變成新機及系統發布會，注目度直線上升，相信今年都會延續新機傳統。
網址： http://developers.google.com/events/io

六月
11-13日　 E3
美國一年一度嘅遊戲展（亦係美國唯一大型遊戲展），有幾重要可想而知，近年三大「台柱」： Sony、微軟同任天堂都揀喺呢度發布新機，日本嘅東京遊戲展逐漸失色，唔睇都冇損失。有傳今年 Sony、微軟都會喺 E3發表新嘅 PlayStation同 Xbox，好期待。
網址： http://e3expo.com 

text：科技組
photo：吳卓凡、吳超德