張可頤已經過咗檔幫王維基，相中呢個組合短期內唔會再出現，大家落足眼力嘞！
有劇追
《天梯》消失中的愛情
繼《巾幗梟雄》同《義海豪情》後，金牌監製李添勝終於又有劇出！呢套《天梯》都係佢拍慣拍熟嘅民初劇，但就由真人真事改編，講姊弟戀，仲要係一段義無反顧、生死相隨嘅愛情。你話今時今日邊有呢種深情？係㗎！所以，咪先要煲劇囉。
由《巾幗梟雄》嘅米舖，到《天梯》嘅大藥行，梗要有啲家族情仇爭產先出到戲味嘅。老實講，睇今次個陣容，差咁啲最識做戲嘅綠葉囉！好在仲有羅蘭姐。
《天梯》由陳豪同張可頤擔正，但最初添哥其實想搵鄧萃雯做女主角，之不過「九姑娘」一向有性格要求多，最終傾唔成條件，就搵咗張可頤。講真，呢套劇嘅角色設定係女主角比男主角大 10年咁多，若果由鄧萃雯做，應該仲適合。算啦！天意嚟嘅，正如《天梯》個古仔，就由陳豪 10歲時，遇上 20歲、剛嫁人嘅張可頤講起，自此緣定一生。
姊弟戀．爭產記
今次故事背景設定為張可頤係大藥行嘅大少奶，有仔有女有奶奶錫，本來好幸福。點知後來老公病咗又出軌，最終仲死埋！一直只喺屋企相夫教子嘅張可頤，惟有出藥行主持大局，然後梗係俾大伯等人明恰暗算，好在變成男子漢嘅陳豪出現，拯救那些年嘅女神於危難之中。
之但係，嗰陣係民初呀！姊弟戀已經夠離經叛道，再加上張可頤係寡婦兼有三個仔女，簡直係天地不容啦。咁可以點呢？如果陳豪演嘅係啱啱投完票嘅香港人，大概……就唔會揀張可頤啦！但男主角係舊式人，仲要係神級情聖，最終佢決定帶住張可頤同三個細路避入深山隱居，仲用半個世紀，開鑿咗一條有六千幾級嘅天梯，方便最愛的人上落山，成就咗呢個喺國內感動萬千同胞、可歌可泣嘅愛情故事。
嗯，個人認為鑿天梯的確浪漫，但男主角識得搵啲嘢俾自己喺悶爆嘅深山消閒，令夫妻之間有多啲空間，呢啲先係男女相處嘅大智慧呀！
一個女人仔要頂住間舖，真係談何容易！所以陳豪見到小時候嘅女神張可頤咁慘，即時辭咗份好工，去藥行幫佢手。
陳豪原本係藥農，仲教埋黃德斌等同村好友去種啲名貴藥材，改善生計。
張國強飾張可頤老公，後來患病得陳茵媺照顧，發展出一段婚外情，不過陳最後同黃德斌相戀。哎吔，點解陳豪無份㗎？
人物關係圖
真的有天梯
1950年代，喺重慶市江津區中山鎮高灘村， 20歲嘅劉國江愛上 30歲、帶住幾個仔女嘅寡婦徐朝清。呢段愛情引嚟好多閒言閒語，最後兩人帶埋幾個細路一齊走入深山，種菜養雞，隱居幾十年。而劉為咗方便妻子下山，用 50年時間喺懸崖峭壁上，修鑿咗 6千幾級嘅石梯。直至 06年，有行山探險人士發現呢條天梯，令呢個情深故事曝光。
國內外百幾個傳媒湧到重慶探訪呢對老夫婦，但在 07年， 72歲嘅劉國江下田跌倒，腦血管破裂離世，遺下 82歲嘅徐朝清。這條愛的天梯，要在天上再續。
播映時間
由 9月 17日起逢星期一至五 8:30pm
翡翠台及高清翡翠台 
留言列表
