賭王三房陳婉珍次女何超蓮，早前趁農曆年假返港陪家人度歲。準備返回英國繼續升學前，本刊發現她一身街坊look，在兩名好友陪同下到中環的化驗所驗身，連抽三筒血，更驚青問記者：「好驚，個傷口唔知會唔會爆？」

超蓮聲言是次抽血，是為了交驗身報告給學校。還有一年便大學畢業的她，坦言畢業後不會返香港，而會留在英國搵工，將來更打算嫁去外國。「總之我唔會在香港找男朋友，只會在外國找，唔想好似做騷咁。」

穿上鬆身運動衫褲的超蓮，到中環的醫療中心登記做身體檢查，她知道要抽血，露出戰戰兢兢的神情。

空肚抽血

日前，穿上運動衫褲的何超蓮，與兩名好友由家中出發，到中環中建大廈的醫療中心做身體檢查。

半小時後，見她一臉痛苦的樣子走出來，原來剛被抽了三筒血，她解釋：「因為今年是讀英國大學的最後一年，要交驗身報告，我第一次抽血，好驚，個傷口唔知會唔會爆？」

由於空肚抽血，事後超蓮表現得極之肚餓，一行三人行到美輪街的「勝香園」平民大牌檔醫肚。沿途行過pizza店，嗅到pizza香的超蓮，站在櫥窗前望到口水流，忍不住提議每人買一件，邊行邊食頂肚，但遭友人否決，「咁核突，唔好啦！」超蓮表現失望，惟有餓住個肚繼續行。

離開診所，行過香噴噴的pizza店，好肚餓的超蓮望到眼定定，流晒口水，她提議不如一人一件，邊行邊食，但兩個朋友齊聲拒絕：「唔好，太核突啦！」，她失望地離開。

踎大牌檔

行到「勝香園」，卻遇上所有枱坐滿人，三人惟有在街頭呆站五分鐘等位，但超蓮沒有介意，樂於享受街坊生活，最後被安排與其他人搭枱。超蓮叫了一碗番茄牛肉麵和凍奶茶，慢慢食，食得好滋味，亦無人理會這位何家千金踎街邊大牌檔。

醫飽肚後，孝順的超蓮走到對面街的「九記牛腩」，外賣一碗牛腩河給母親三太陳婉珍，之後便乘坐她的專用座駕返回家中。

超蓮在兩名朋友壯膽下，先至敢去抽血，半個鐘後，她按着傷口出來，「我第一次抽血，個傷口唔知會唔會爆呢？」