若然人生際遇一定是有得必有失，那麼，葉翠翠○八年遇上內地富商黃有龍之後，便可以寫成以下方程式：

遇上黃有龍 = 勁多傳聞 + 形象變得負面 + 遭朋友離棄 + 被其他藝人落井下石 + 被無綫雪藏

結果，沒多久，她和他分了手；再沒多久，他跟「中國四大花旦之一」的趙薇結了婚，兼有了愛情結晶品，葉翠翠卻只能背着這一切是是非非，斯人獨憔悴。

然而，人總要進步呀，所以，失去了黃有龍後，接下來那幾年，翠翠的際遇方程式反而變得正面：

失去黃有龍 = 懂得自我檢討 + 改善個人態度 + 人緣催旺 + 工作量增加 + 懂得自我調節心理等待真正適合的人出現

因為一個不值得愛的人而付出了如此沉重的代價，當事人今天回想起來，只能怪自己當其時沒有帶眼識人，「我以前拍親拖，就會舂晒個頭埋去，乜都睇唔到！但事隔幾年，我依家只係想搵到一個可以細水長流嘅人，我唔怕等，我會利用呢啲等待嘅時間，去調校好自己嘅心態，做好自己！時間亦證明咗，我咁樣諗嘢個人會開心咗，一切都順利咗同變得好咗！」

我問她，如果可以選擇刪除人生中的某部分，會不會選擇○八年？「其實今日嘅我，都要多謝過去嘅我，我唔希望delete過去，咁樣會冇得同今日嘅我比較，我亦唔會知道，我嗰陣時有幾傻！」

確實是好一個愛情習作。

填充題

葉翠翠不擅辭令，也不懂得把說話包裝，多少也代表了她是個想嗰句、講嗰句的人，也代表了她過往很少接受個人專訪。

「我以前真係好驚做專訪，好驚我講咗嘅嘢，人哋會扭曲晒。真係o架！嗰件事發生嘅時候，我只要講一啲嘢，啲人都可以有十個變化走出嚟，然後將我寫到罪人咁，我每吸一啖氣、做一個動作都係一個罪，真係令我好驚！」

她說的「嗰件事」，是○八年她與黃有龍的一段情。當時有報道以「葉翠翠被內地富豪包養」作標題，結果，單單這十粒字隨即令她形象插水，慘上加慘的是，當時的她為了維護戀情，不能公開澄清，惟有啞子吃黃連。

我問翠翠，當時選擇不公開，是否黃有龍的意思？她即點點頭說：「我唔可以怪佢，係我自己聽佢講，又accept佢咁講，我先唔講出嚟。嗰陣人哋問親我，明明係事實嘅，我只可以講嗰一、兩成，咁人哋咪可以忖測另外嗰八成囉！其實公司都有叫我講出嚟o架，但我都係冇講到，我依家諗番起，我咁樣處理咪唔得囉！將來我唔會係咁o架啦，叫我唔好講呀？好呀，咁分手啦！哈哈哈哈！」

跟黃有龍分手後，翠翠便飛往英國療傷。

是非題

翻查有關翠翠這段情的資料，作為女性的我，其實也不難明解，為何當時的她會如此聽從男友的話，皆因這位在內地開設溫泉度假酒店的富商，先以找她做代言人為名追求她，然後又試過在她家樓下等足六、七個鐘，繼而更親自做柴可夫揸四個鐘車接送她往返內地香港，細心如此，又有財有勢，的確很易得女人歡心。

「喺樓下等我六、七個鐘？佢啱啱追我嗰陣時係囉！當佢愛你嗰陣，佢願意照顧你一生一世、生老病死，佢可以同你許下好多好多好好嘅承諾；但當佢唔再愛你時，乜嘢承諾都會消失晒、化為烏有！我嗰陣（拍拖時）以為係真o架，咁我自然會付出晒我嘅所有，但好快就find out到並唔係真嘅。」

跟高鈞賢緋聞傳了N年，男的條件不錯，但女的卻要睇定啲。

確實很快，因為，這段情最終只維持了短短三、四個月，分手原因在於黃有龍要求她先產子、後結婚，她不肯，他即走，她失戀了，可是外界當時看到的，就只有她忽然變得富貴的生活，加上她主持奧運時傳出她跟其他拍檔不和的是是非非，負面新聞不絕，奧運一過，無綫馬上把她雪藏起來。

「公司都冇話明係雪藏嘅，不過奧運之後嗰幾年，工作量真係少咗好多，未至於零工作，只係間中安排我做吓啲兩個禮拜嘅主持咁囉。搞到咁，我唔可以怪人，我當時的確做錯嘢嘛！」

數學題

感情撲空，工作量遞減，還要承受外界的白眼和輿論，翠翠坦言，○八年下旬的那段日子，是她人生中的低潮期。「我嗰陣日日喊，好唔開心、好唔明白！我諗到好想死！如果地獄有十八層，我當時已經跌咗去三十六層！」

感情亮紅燈後，有嘗試過箍煲嗎？「冇！仲搵佢嚟做乜？咁做唔會覺得更加心如刀割，一下一下咁鎅緊自己咩？我當時只可以選擇自己嚟承受呀！」

當時令她更煩的，是跟黃有龍感情結束後，還有另一個要跟進的手尾——物業。那時有報道說，她自從「被包養」後，即大拿拿以三千萬購入兩個賽西湖單位，其中一個更是一個轉手便賺了逾百萬，有博見報藝人也乘勢加多兩嘴落井下石，笑指她是「股神」。

「呢兩個物業，當每個千五萬。一個只畀咗首期五百萬，包括埋我投資股票所賺到嘅，仲要租畀人嚟供。另一個已經畀佢收返，我同佢講：『我唔想咁醜，你on top加一百萬，當我獲利套現啦。』當時所謂嘅買家就係佢。我依家講番出嚟，係因為我朋友鼓勵我，佢話我講咗出嚟，起碼還番我一個公道，我亦可以澄清，我並冇擁有到兩個三千萬嘅單位。」

因為合作拍《4inlove》，韋家雄即公開向她示愛。

初入行與李逸朗的一段情，不堪回首矣。

選擇題

直至○九月下旬，黃有龍與趙薇結婚，不夠半年，又證實了趙薇已懷孕。

看到報道，可有難過？「嗰刻係囉。不過好快我就諗通咗：佢（趙薇）不過係一個再紅啲嘅明星，我同佢（黃有龍）係點樣分手，人哋又點樣一齊，都已經過咗去啦，都唔關我事啦！呢個人既然唔係我命中注定嘅嗰個，咁我咪等我嗰個囉！唔係每段感情都可以開花結果o架嘛！」

只是，這幾年來，有關翠翠的感情新聞，男主角都只是傳足緋聞N年的港男高鈞賢，以及去年年初拍《4 in love》時，公開表示對她有好感的劇中拍檔韋家雄。

「追，係有嘅，但試過嗰次（黃有龍那段情）之後，我真係要小心啲去面對愛情呀！我唔想再受傷害，我承受唔到啦！我啱啱先走出陰影，如果我再唔帶眼識人，或者立亂識人、拍拖，到頭來受傷嘅咪只係我自己！」

翠翠說，當年參選港姐純粹「試吓」，結果摘下后冠來。

但那兩位緋聞男士，條件不好嗎？「有時唔係話人哋追你，就同嗰個人一齊嘛，愛情除咗要講感覺，我依家覺得仲要喺拍拖前畀多啲時間去了解雙方，如果對方真係鍾意我，我諗佢唔介意用時間嚟了解咗我先囉。所以我呢幾年我只會盡量去做好自己，改善自己，我唔想拍散拖，我只係想搵真正啱我，可以細水長流嘅人，我好相信當我調節好自己嘅心態後，個天就會畀個適合嘅人我！」

不怕寂寞嗎？「有時都悶到爆燈o架，新年、情人節、平安夜、聖誕、倒數、生日都係一個人，你明唔明呢種感受呀？我都會諗，我係咪衰到咁呢？但跟住我又會同自己講：『如果你係一個好人，自然會搵到一個對你好好嘅人！』我真係信，係你嘅自然你嘅，若果個天真係畀我搵到一個好好嘅人，我真係唔怕等，就算要等三年、六年、十年，都值得呀！」

是的，信則有，不信則冇，道理很簡單。

小時候的翠翠，父親經常帶她四圍去。

葉翠翠愛情冇問題

時間是否人生際遇跌至谷底時的最佳良藥，關鍵只在於你懂不懂得自救。

翠翠說，她的人生谷底自○八年起，至一一年才開始有起色。「上年年初，我就有得拍《我的如意狼君》，拍完過咗幾個月，就話拍《4 in love》，兩套劇個角色都好好，戲份又多，中間又有好多工作，我覺得好開心o架！因為我呢幾年真係不斷係咁自我檢討，不斷咁去改善自己對人對事對工作嘅態度，我覺得真係有人會睇到o架！」

只是，在一切稍為安穩之際，去年十月一次身體檢查，卻驗出了胰臟有個數cm的腫瘤，令她一下子來回地獄又折返。「我當時真係好灰！要做手術，所有工作要停晒，我啱啱先喺地獄走返上嚟，唞到啖氣，點解又要我落返去呢？個瘤係良性定惡性呢？我會唔會死呢？我又唔敢話畀人知，好彩係，我唔係因為乜嘢唔舒服或有乜嘢病徵先發現個瘤，亦好彩係，醫生話以佢嘅經驗，個瘤係良性嘅居多。」

然後，切割手術順利完成，翠翠身體亦無恙了，而且有了更大的得着。「我依家真係冇乜嘢驚，地獄我又去過，生死關頭我又試過，我覺得，人只要做好自己，個天一定會畀條出路我行囉！」

如果她跟黃有龍那段情，是讓她看透愛情的習作，那割腫瘤這件事，應該是一個讓她看透生與死的習作吧！