漫遊毒物

Dead Space 3恐怖新定義

2013年01月30日 ~~ 第297期 Face

《一代宗師》中，唔係老前輩宮師父退隱前鬆晒章，新人葉問邊有得極速上位。
但驚嚇電子遊戲就唔一樣，由細嚇到機迷大嘅老祖宗《 Bio Hazard》 15年來都不斷改良、從未想過退隱；所以新一代嚇死人 game王《 Dead Space》，一樣要集集求變，新一集《 Dead Space 3》加入 Online雙打同砌槍系統，外星怪物隻隻都肢體扭曲，比打喪屍更富變化，學晒宮家六十四手先夠揪。




機種： PS3、 XBox360
廠方： EA
種類：第三身射擊
遊玩人數： 1人(單機)/2人(網絡)
售價：$449 

走出船艙　降落失落星球

咪話我知新角色 John（右）唔係取經於 Iron Man老友 War Machine，連眼部發紅光都抄到足。

《 Dead Space》講工程師 Issac於宇宙船中慘遇異形襲擊，成船人幾乎死清光下，一個人用士把拿、電鋸打怪物。今集終於由船內打到出船外， Issac經過前兩代冒險，決心追查引發死靈異變現像嘅古代遺蹟聖印（ The Marker），會合其他劫後餘生者出發去冰天雪地嘅 Tau Volantis星球找線索，卻於降落時發生意外， Issac要一邊找尋失散嘅同伴一邊喺布滿死靈嘅星球上解開聖印之謎。 




Issac乃工程師一名，但穿上名為 RIG嘅盔甲之後就好似 Iron Man一樣咁作戰，今集仲會有多種功能不同嘅裝甲畀玩家換裝。比如呢件就係雪地用，有毛毛外層夠保暖。 




今次主場景係冰凍星球，但仍然會有太空船同無重力場景， fans唔使擔心變咗玩 CAPCOM隻《 Lost Planet》。 

核突死靈睇真啲

《 Dead Space》中的聖印病毒，輕則令人產生幻覺互想殘殺，重則能令屍體感染異變成死靈體 Necromorphs。有別於其他槍 game，射爆頭都阻佢哋唔住，攻擊四肢肢解方為上策。今集死靈受襲後更會出現不同變化，例如從傷口伸出新觸手，或拾起同伴殘肢融合。另外，不同死靈殺人嘅方法都各有不同， fans愛自殺睇盡主角唔同死法，喺 YouTube就有唔少主角被殺場面大合集。


除咗有人型死靈之外，仲有超大型怪物，究竟係由咩物體異變出嚟，就要喺遊戲入面解謎。


上 YouTube搜尋「 Dead Space Dead Scene」，主角千奇百趣死相任睇，有腰斬有爆頭有穿肚，慘烈過十大酷刑。

全新體驗　二人合作

上集只有網絡對戰，今集終於可以二人合作一齊過關打死靈。除咗 Issac，另一位玩家控制新角色 John。基本流程單打同雙打無異，但雙打時兩名玩家所遇到嘅情況會有不同， John受到聖印影響會睇到 Issac睇唔到嘅異像，有時可能要靠呢啲異像做提示搵路。又或者一名玩家開緊機關時畀死靈襲擊，另一名玩家就要保護佢，各有職責玩落似《 Bio6》。不過雙打一定要上網打，不設單機分割 2P，記得用耳機玩，一齊驚、一齊嗌先過癮。


雙打見到有唔對路地方，細膽/冇咁勁嘅 1位可以先企遠等一等，不過記得溝通好，大家鬥禮讓都唔係辦法。


其中一個雙打要素係可以互換道具，彈藥、藥箱等消耗品，技術差都可以靠朋友撐住。

D.I.Y.砌神兵　生存靠新招

記者率先拎到實 game，玩咗一陣發覺今集打大交情況極多，不時會俾死靈圍揪，好彩 Issac都好打咗好多，唔只有新招式同動作。更可以執部件改裝武器，種類同自由度都大增。遊戲入面嘅武器包含上槍身同下槍身，上槍按 R2/RT射擊為主要射擊， RB/RT就作下槍身副射擊，自由組合不同特性嘅武器，幾咁誇張離譜嘅重火力武器都可以砌埋一齊，要掌握好呢幾種新要素先有望喺新戰場生存。




砌槍介面比較複雜，先要揀框架（ frame），再揀上下槍身（ Upper/Lower tools），最後揀放射器（ Tips）。


砌槍用嘅武器配件可以喺補給箱或敵人屍體身上搜尋到。


筆者呢把就係上槍身用軍用槍身，按 RT射機關槍；下槍身用電漿切割器，按 RB出刀斬人，遠攻近守，係開 game早期必用組合。

槍戰要識避

今集把槍勁係咗，但死靈亦多咗遠距離攻擊，所以亦順勢加入滾動回避同 take cover搵牆擋槍兩個新操作。例如開場冇耐就打嘅蜘蛛怪，行行吓會突進攻擊，就咁跑一定避唔開，呢個時候用連按兩下 L1/LB碌地回避。怪物死靈體當然可怕，故事中段仲有一批宗教狂熱分子「統一教」，佢哋竟想奪得聖印令人類變晒死靈。同佢哋戰鬥時會近於一般第三身射擊，按右控桿下方，可蹲姿貼近掩護物，再做瞄準動作就做到探身射擊，安全好多。


槍戰仲易死過打肉搏，今集持槍嘅怪物多咗好多，大把機會練習。


蜘蛛怪嘅突進攻擊單靠跑好易中招，真係唔熟回避的話，可以放射冷凍光線整慢對手。

Gears of War前傳　人獸戰有睇頭

頂唔順《 Dead Space》咁恐怖，剩係想爽爽快快玩槍 game，等多一陣就有《 Gears of War： Judgement》陪你射個痛快。結束咗經典三部曲之後，《 GOW： J》以前傳形式講番獸族第一次從地底來襲時嘅「事變日」故事。當時主角頭巾大隻佬 Marcus仲坐緊監，故事會由金毛仔 Baird同火車頭 Cole嘅視點出發，遊戲最近公布咗人獸對戰新模式「 OverRun」嘅詳情， 8種獸族首次任玩，絕對唔係外傳咁簡單。


Baird係三部曲入面唔算主要角色，初初公布時以佢為主角唔少人大感意外。


每個職業同獸族都有自己特殊能力，例如右方嘅苦役獸可以穿過圍欄及大叫，細細粒嘅爆炸蟲就可以自爆同快跑。


除咗 OverRun，仲有冇分隊 10人亂戰嘅 Free for All新模式，扭轉《 GOW》過往嘅合作精神。




機種： XBox360
廠方： Epic Games
種類：第三身射擊
遊玩人數： 1-2人(單機)/2-10人(網絡)
發售日期： 2013年 3月 19日 

OverRun任玩獸有睇頭

獸族去到後期可以叫出潛地獸等大型獸族，守軍好難擋。

OverRun以 5對 5形式進行，獸族扮演進攻一方，人類則要以發電機作據點死守。雙方陣營各自飾演人類同獸族一次，以最短時間破壞發電機為目標。人類共有 4種職業，復活只可用回原本職業，揀咗就冇得重選。相反獸族戰死後可從 8大種族中任選其一再投胎，儲夠點數仲可揀 4種威力強大之高級種族：血獸、百足蟲、潛地獸，系統明顯係唔公平，好在過版後會人獸互換再玩一次，睇邊一面做怪物時更快攻陷對手，以分出勝負。 

撰文：司徒港燊
攝影：葉偉豪