李璨琛拍拖兩年的圈外女友梁志瑩共諧連理，筳開39席設宴親朋，一向前衛的他梳了個「牛脷酥」十分搶鏡，並以歌曲《天梯》作為愛的宣言，李璨琛外表前衛內裡怕醜，當要求跟太太當眾接吻竟是他紅了面。
新郎哥李璨琛率領16兄弟團，浩浩蕩蕩的往北角酒店迎娶新娘子梁志瑩，一對新人簽紙儀式過後，乘坐花車出巡行大運，之後雙雙會見傳媒，二人溫馨的接受訪問，李璨琛表示接新娘過關時最難頂是與兄弟一人一邊咬甩蕉皮，而又透露開門利是是4位數字，他謂：「好順利，有少少淚光。」
晚上設宴不少圈中人紛紛到賀，場面星光熠熠。
激咀靚老婆 李璨琛好肉緊呀
2012-11-17 16:48:00
喺記者面前咀嘴就話驚啫，註冊禮成呢個情深一吻，一定要啦﹗
講到接新娘，李璨琛當然少不免要讀愛的宣言。姊妹團安排佢將《天梯》嘅歌詞讀一次，表現生硬嘅琛仔話自己係有少少緊張，個身仲有少少「興」。問到新娘子覺得老公李璨琛表現成點？戴住兩卡婚戒嘅Pae好冧咁話：「在心中。」
噚晚琛仔按傳統做上頭儀式，至於有冇家全之寶交畀太太，琛仔話：「我咪家全之寶囉﹗」講到同太太如何結緣，佢就話：「有一次同一班男仔朋友去大浪灣游水，見到成班女仔，就埋去媾佢，當時佢唔係太騷我；後嚟喺另一個場合再見到，之後就開始一齊，經歷一次求婚就成功喇﹗」一對新人明年先去馬爾代夫渡蜜月，計劃兩年後生仔。
讀誓詞嗰陣，琛仔話自己都眼濕濕。
張達明癌病初癒 快閃李璨琛婚宴
2012-11-17 20:17:20
患癌暴瘦30磅嘅張達明，久休後正康復階段，佢都趁李璨琛今日大婚出嚟湊吓熱鬧。見佢戴帽著咗外套，因為接受化療，令皮膚仍然較為黝黑，猶幸精神唔錯，見到記者，仲笑晒打招呼，俾大家影相，回復昔日鬼馬本色。
達明嚟到琛仔婚宴場地逗留15分鐘就走，佢話：「最近好番好多，留低食飯唔係咁好，好開心，琛仔好靚仔。」問到佢近排嘅狀況，達明就話：「OK﹗多謝關心﹗」
大病初癒嘅張達明，笑晒同大家揮手，精神不俗。
達明話依家康復進度OK，叫大家放心﹗
張達明喺李璨琛婚宴上逗留咗15分鐘先走。
出入暫仍需友人攙扶，但明顯達明嘅情況已經好番好多。加油呀﹗
入嚟嗰陣仲整蠱做怪，no problem啦﹗
劉浩龍單拖去飲 一提祖兒﹕「超﹗」
2012-11-17 20:23:44
容祖兒近日被何韻詩出櫃單嘢搞到頭都大埋，又傳祖兒自韓國返港後，一直閉關，情緒低落。佢男友劉浩龍今晚就單拖出席李璨琛喺北角嘅婚宴，被問到點解唔帶女朋友嚟，劉浩龍好輕佻咁回應：「超﹗」
等到電視台同佢做訪問，劉浩龍就笑到四萬咁嘅樣話：「恭喜李璨琛結婚。」問佢今次係咪嚟取經？劉浩龍扯開話題：「祝李璨琛年生貴子，三年抱兩。」咁係咪勾起佢結婚成家嘅念頭先？劉浩龍即刻話：「李璨琛call我喇，要入去先喇﹗」
你睇劉浩龍幾紅﹗幾多咪牌「隊」住佢﹗
Edison都驚緋聞？ 快閃避索模
2012-11-17 20:49:53
同自己舖頭Sales Angela搭上嘅陳冠希，最近大晒同女友嘅恩愛合照，唔介意話畀大家知，女友Angela係佢台灣舖頭Juice嘅售貨員，畀女友一個名份。好冧喎﹗
今晚Edison都有出席李璨琛嘅婚宴度。起初獨自步行到酒店嘅Edison，原先喺酒店旁嘅側門進入，經傳媒要求下，Edison好合作咁走番去正門，畀大家影相，點知咁啱又係嚟飲嘅0靚模黃芝棋同時行到門口，大家誤以為佢哋係約埋一齊嚟飲，仲叫佢哋一齊影合照。
當時Edison都未知發生咩事，只係覺得有啲奇怪：直至有人問Edison係咪約埋黃芝棋一齊嚟嗰陣，Edison即刻煞有介事兼好認真咁話：「唔係呀﹗」即刻掉頭走人，免得被誤傳緋聞。
本來行側門嘅陳冠希，應記者要求行正門俾大家影相。
點知中途殺出0靚模黃芝棋。
大家仲以為佢兩個係約埋一齊嚟，所以要求佢哋合照。
Edison一聽到記者以為佢哋約埋嚟飲，嚇到走都走唔切呀。
嘉賓陸續到 個個趕住走？
2012-11-17 20:53:23
去飲李璨琛同太太梁志瑩Pae婚宴嘅賓客，陸續到達婚宴場地北角海逸君綽酒店，當中包括吳彥祖伉儷、張兆輝伉儷、洪天明、唐文龍、黃柏高、關禮傑、梁漢文、蘇永康、JJ賈曉晨、黃子華、錢國偉及蔡一傑等。
黃柏高匆匆到場放低禮物、逗留10分鐘就離開，而經常婚宴飲醉嘅梁漢文話，今日盡量唔飲醉，因為8點幾就要走，因為有騷要做，梁漢文話：「我經常見到一對新人出席一啲場合，見到佢兩個好夾。」徒步到場嘅JJ賈曉晨就話，佢係趁拍攝空檔時間趕過嚟，又話打完招呼就走。乜李璨琛嘅朋友真係忙咯﹗
賈曉晨同梁漢文似乎都好忙吓，女嗰個要開工，男嘅要開騷。都係逗留一陣就走。
Paco匆匆到場，放低禮物、逗留10分鐘就走。
張兆輝同關禮傑
吳彥祖、Lisa S
錢國偉外套都未著好就趕入場。
蔡一智
洪天明單拖到場，老婆大人周家蔚就乖乖喺屋企安胎。
黃子華幾靚仔﹗
志偉日日飲醉 今晚又要打橫出去
2012-11-17 21:22:33
李璨琛嘅婚宴真係星光熠熠，姍姍來遲嘅仲有陳奕迅伉儷、何超儀夫婦，當然唔少得近日每次婚宴都有佢份嘅曾志偉。由杜德偉結婚到樂樂盈盈擺酒，呢幾晚志偉都不醉無歸，佢話：「今晚送禮金﹗會飲盡去，呢兩個月多飲宴，醒完又瞓，好辛苦，飲埋今餐可以抖一抖。」其實去飲都係一齊慶祝求開心，志偉晚晚飲到盡，梗係辛苦啦。
陳太徐濠縈姍姍來遲，一落車個樣咁驚恐嘅？
好彩有個背後男人吹神扶住。
曾志偉話飲埋呢餐就可以抖一抖喇﹗
JJ同傳過緋聞嘅錢國偉一齊走，小心又俾人傳「一齊失蹤3粒鐘」呀﹗
愛情得意嘅滕麗名。
沈嘉偉
新郎哥出嚟派利是喇﹗恭喜恭喜﹗
蘇永康一馬當先…咦，得你一個嘅？
心急得滯，女友跟唔切你嘅步伐呀﹗
留言列表
