面對面
最佳女朋友 黎芷珊
46歲的黎芷珊，在入行第 29年迎來了第一個事業高峰，主持的《最佳男主角》請來的盡是娛樂圈數一數二的影帝天王、收視升又有猛料，相對於雷聲大雨點小兼且觀眾緣極差搞到節目《爆足一周》要腰斬的查小欣，贏足九條街。
叫得出芷珊姐姐大名的，本來只限於那班看《閃電傳真機》和《城市追擊》長大的七十、八十後，《最佳男主角》後，突然紅到去大中華，強國人震驚，這個不知道從哪裏跑出來、其貌不揚的女主持，竟然是梁家輝、鄭伊健和陳小春的前女友、連周星馳、梁朝偉都話傳過緋聞，前度一個二個走紅、從不把舊情掛在嘴邊借位上，所以多年以後還能保持關係友好仲使得郁，呢種咪就係最佳女朋友囉。
低調了接近 30年突然爆紅，黎芷珊說好壞參半：「少咗私人時間、多咗是非要回應係唔多慣，不過我最近啱啱甩拖，呢件事充撐咗我唔少時間，等我唔好亂諗嘢……」
兩個月前，芷珊姐姐與比他年輕 12年、相戀 9年的無綫藝人張達倫協議分手，看她說到傷心處兩泡眼淚在眼眶裏打轉，我忙叫攝影師舉機拍攝，芷珊姐姐急急印走眼淚避開鏡頭：「唔好影啦……乜你哋咁殘忍㗎……唔好俾人見到我咁啦……我唔想呀……」
再次成為前度，女朋友哭了。
包辦女主角
還是那句，人紅自然是非多。低調了大半輩子，芷珊姐姐最近突然被狗仔隊跟蹤，接連登上娛樂版，每天忙着接電話回應是非。繼不斷被扯進與查小欣爭鋒比較的報道後，再有最新消息說，做紅《最佳男主角》，添食作《最佳女主角》芷珊姐姐會被前有線主持陸浩明取代。
「絕對冇咁嘅事，我都唔知呢啲消息邊度嚟。一路個節目都係我籌備、我約嘉賓，好多人已經應承仲要度好期，成件事我從來都冇假手於人、亦冇聽過要畀第二個做。女主角人選……都係等訪問做好出街時再公布，我怕有變數。」
芷珊姐姐一向穩打穩紮，所以《最佳男主角》直到出街前才公布天王巨星嘉賓名單，大家才知道芷珊姐姐的人情咭原來咁把炮：「以我性格，其實舒舒服服就夠，並唔係要追求啲咩高峰。先排突然間想為自己做啲嘢，朋友提議我用吓自己嘅人脈，又咁啱嗰排同公司傾緊約，就提出一個咁嘅要求，做一個屬於自己嘅節目，一切係天時地利人和。」
黎芷珊說，《男主角》嘉賓名單本來可以更強更多，奈何計劃中一星期一集的節目被電視台安排一星期五集：「仲有好多人想請、可以請，人哋應承咗但係一個月內實在畀唔到期，不過唔怕，我哋已經籌備緊拍第二輯。」
除了正在拍攝中的《最佳女主角》、籌劃中的第二輯《最佳男主角》，加入電視台 26年後，黎芷珊首次被指派擔任台慶司儀，每天報紙雜誌電台排隊約訪問，外勞司儀工作突然暴增，還落實將擔任電器和護膚品代言人，真正的名利雙收：「遲啲嘅高峰總好過唔嚟吖。」
《最佳男主角》每集尾聲都會請嘉賓自爆小秘密，謝霆鋒自揭皮膚癌一集收視 26點，爆過《爆足一周》。
10年冇做專訪，上週五（ 2日）梁朝偉在壓軸篇《最佳男主角》罕有大談童年秘史。
《 430穿梭機》年代的舊愛鄭伊健，無論情變專訪定貼身出埠探班，次次都由黎芷珊包辦。
做過偶像派
黎芷珊生於澳門，姑母黎婉華是賭王何鴻燊的元配，從小就跟何家千金超瓊、超蕸玩大，叫姑丈何鴻燊做 Uncle Stanley。 16歲落 Disco結識初戀男友梁家輝， 17歲被發掘加入歌唱組合「少女雜誌」出碟做歌手。歌星生涯兩年後因為唱片公司財困完結，由 Uncle Stanley出面引薦進無綫主持兒童節目，咁就廿多年。
「啱啱入少女雜誌時都叫 hit過，返學生活都冇咩壓力，咁啱揀中我，咪去玩吓囉。我唔係發明星夢，但係當年唱片公司包裝少女雜誌，係安排陳慧嫻賣唱功，我同陳樂敏（少女雜誌第三名成員）係偶像派，哈哈哈……」自稱是偶像派，芷珊姐姐自己都不好意思，哈哈大笑：「嗰個年代賣可愛，我都得嘅……」
到底請唔請得郁周星馳：「冇人真正拒絕我，係夾唔到期，希望下一輯配合到時間。」
17歲加入少女組合「少女雜誌」，黎芷珊話自己當年唔唱得，純賣可愛。
黎芷珊說，歌星時代的粉絲分成兩派，要不冧爆黎芷珊、陳樂敏，要不忠於陳慧嫻，嫌她倆虛有其表。想當年學校門口、電台電視台門口，去到邊都有歌迷等候叫囂，改行做電視後，從《 430穿梭機》做到《閃電傳真機》；從《城市追擊》做到《東張西望》，從偶像歌手做到跑新聞的娛樂記者，從沒想到二十多年後角色又調換：「突然間人人都想知我嘅嘢……都幾得意。其實呢啲嘢喺我生命中一路發生緊，以前我冇興趣講，亦都冇人有興趣知。幾得意，我發掘咗人哋嘅新聞咁多年， 𠵱家掉番轉俾人發掘我。」接近三十年娛圈資歷，黎芷珊說，老一輩的、上了位的，有的是前度男友、其他的都識於微時，用得到時大多都會畀個面；新人後輩，看在她好歹也是「姐」字輩，也都恭恭敬敬：「我鍾意笑，個樣又冇乜殺傷力，出去採訪又好少『夭』住人啲是非嘢，等人睇佢哋個尷尬樣，所以咪個個信得過我囉。人脈係儲番嚟嘅，係我入行三十年最大本錢，我相信對人好，人哋就唔會對我衰，最壞聽過嘅說話，大多數係網上評語，不過我明知佢哋嘅來意，又做咩要擺喺心呢？」邊班網友來意不善？咪台灣天王羅志祥班粉絲囉。
發誓冇下次
黎芷珊說，錄影《最佳男主角》期間，正值與張達倫情變：「明明情緒好波動，每日個心揦住揦住痛，但係又要 㩒住個心情去化妝整頭做訪問……呢個 timing發生得好得意，有時七點鐘買個飯盒返去，講電話講到十點幾都未得閒食，工作充撐咗我大部分時間，等我唔使諗一個人點消磨時日、諗少啲嘢，但係總有一個人靜落嚟嘅時候，就會諗吓以前乜都一齊做、去朋友聚會永遠都一齊，以後去到邊都係一個人，就會覺得自己好陰功……」說到這，又是眼紅紅。
早前有雜誌拍到黎芷珊與張達倫還是不時見面，黎芷珊分手後繼續「使」前度男友，芷珊姐姐說：「本來一齊住喺我度，分手後我唔想觸景傷情搵地方搬，就搵佢嚟幫我手啫。實在太多一齊嘅回憶同共同朋友，所有嘢一剎那間要割捨，對我哋兩個都唔容易，我哋見番面，都會一齊喊……」既然大家都捨不得，我不懂為甚麼沒辦法走下去：「年齡囉！係人都拍過拖，好愛嘅時候個個乜都唔理，去咗先至算。時間耐咗，問題就會浮出嚟。佢鍾意戶外活動鍾意行山、我年紀愈大愈應付唔到。兩個人一齊一定要有共同嗜好，但我哋兩個就愈行愈遠……我都衰，關係穩定以後，會習以為常、老馮咗，愈做愈少，成日覺得來日方長，今日唔做咪遲啲做囉……原來遲啲就係遲啲，唔會再有機會做。」有沒有機會復合？黎芷珊說：「我見唔到有……」下次還會嘗試姐弟戀嗎？黎芷珊答得暫釘截鐵：「唔會，我發誓！」 
何鴻燊係姑丈，同何家姊妹由細玩到大，何家一有新聞，又係黎芷珊出動。
同張達倫拍拖 9年，月前分手：「開頭諗住唔得咪走囉，點知愈踩愈深……」
笑點低？
分手後，黎芷珊搬屋、深閨謝絕朋友聚會，就係怕觸景傷情。
舊情人一個二個飛黃騰達，被「尊稱」為新一代集郵女主持的黎芷珊，最放不下的還是被指「二打六」的前度張達倫：「情緒其實係自己嘅選擇，明知諗會唔開心，咪避開唔諗囉；明知觸景會傷情，我咪唔再出街食飯，唔去我哋一齊去過嘅地方囉。我成日提自己，叫自己習慣冇佢嘅日子，掉低啦……學吓自己一個人生活啦……」
芷珊姐姐說，有些網友嫌她主持《最佳男主角》笑點低，係唔係都大笑一餐附和嘉賓，我在想，那種時候，笑應該比哭難受得多吧！ 
撰文：朱小博
攝影：范仲良
化妝、髮型： Meegan
形象： Bryan@the Flaming
服裝： MAGin, Sinequanone, mi-tu
場地提供： Bridal Corner
留言列表
