close



媽咪姐

爆趣「名二代」

2012年10月19日 ~~ 第899期 忽然１周

禮拜日（ 14日），一年一度「莎莎婦女銀袋日」喺 沙田馬場舉行，唔少政商名人盛裝出動，搖身一變紳士淑女，鬥靚鬥搶。不過論新鮮感，點及首次去馬場嘅名人二代，個個細路扮大人， 10個趣呀！

汪詩詩囡囡
潮拎 iPhone5


細妹汪圓圓行騷，汪詩詩帶埋囡囡（ Jasmine）捧場。第一次入馬場嘅 Jasmine，自己揀咗藍色裙仔，襯埋頭上花花，少女味濃。今年 8歲大嘅佢，仲手拎 iPhone5電話，好潮喎！汪詩詩解釋話︰「佢都想要，不過我屋企好嚴格，佢只可以用簡單打得出嘅電話。部 iPhone係圓圓嘅， Jasmine當手袋仔咁拎住啫。」

樂易玲拖仔拉頭馬


樂易玲一家入場捧曾志偉有份嘅名駒「卡加精神」。一見隻馬跑出，佢開心到彈起，即時拖埋老公同兩個仔拉頭馬。現場睇，阿仔鬼咁醒目，除咗識揀有利位置影相，仲戴埋副螢光超落場，即時搶晒鏡！




樂易玲拉完頭馬依然笑到見牙唔見眼，唔知以為佢係馬主。

寇鴻萍母女嚇鬼


除咗一班小朋友養眼，寇鴻萍同大女唐貝詩亦唔弱。兩個一早到場，應大會指定打扮，刻意戴上花帽見人。不過襯到過晒龍，強國味濃。咦，佢哋係咪搞錯咗，以為今日係去「廣東道」呀？


寇鴻萍以紅黑主題打扮，火紅唇膏已經夠激，再襯埋半透紅點黑絲襪仔，唔知以為佢去咗萬聖節 party㖭。



郭詩慧囝囝做紳士


莎莎國際搞活動，點少得太子女郭詩慧（ Melody），佢同老公陳振邦抱埋囝囝陳頌言（ Jacob），一家三口以黑白色造型撐場。 6個月大嘅 Jacob肥嘟嘟，一身 Junior Armani，成個小紳士咁款，可愛到暈。 Melody話︰「爹哋媽咪（小圖）希望可以抱埋孫仔拉頭馬。」





arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄