韓面
2PM祐榮谷肌單飛掂咗
今年嚟過香港兩次的韓國爆肌男團 2PM，以靚仔 Nichkhun同壞孩子 Rapper澤演最具人氣，不過今年突圍跑出單飛發展，竟然係一向白雪雪、唔多起眼的隊員祐榮。
23歲祐榮，雖然冇其他隊友咁靚仔，但勝在把聲可柔可剛多變化，至吸引更係佢今年的身形來個大轉變，由瘦奀奀白雪雪練到 6嚿腹肌兼黑黑實實，經理人公司 JYP老闆朴振榮公開讚佢乖仔又有實力， solo頭炮《 23 Male Single》大碟，於月頭推出，至今銷量已突破 3萬張，唔使黐住 2PM，一樣星夢高飛。
一向形象乖乖仔嘅祐榮，今次單飛出碟，專誠畫晒眼線化晒妝，仲玩埋野獸 look幫雜誌影大隻仔相。
2PM成員中，雖然最唱得隊友俊秀於上年已單飛推出單曲〈 Sunshine〉，但真真正正出一張個人大碟，祐榮就係 2PM中第 1個。今月頭正式 solo推出大碟《 23 Male Single》，呢個月主打歌〈 Sexy Lady〉喺韓國各大音樂節目熱播，谷得咁行，至今該大碟銷量已超過 3萬張，成績相當唔錯。
祐榮得以 solo出碟，全靠所屬 JYP Entertainment老闆朴振榮睇起，曾公開讚他勤力又有實力，最近祐榮於訪問中自爆：「 1年前，恩師朴振榮同我講，希望我係 2PM中，第 1個出 solo大碟嘅成員。當時我唔知點算好，之後講畀其他成員聽，好彩佢哋好支持我，我先有信心單飛出碟。」有隊友撐，最緊要有老闆照住，祐榮想唔紅都難。
榮媽以死撐仔
祐榮 𠵱家成為萬人迷，背後其實一殼眼淚。話說 5年前祐榮已下決心入演藝圈，當時祐榮其實已獲甄選而加入 JYP做藝人的機會，雖得到阿媽支持，但阿爸卻極力反對，還於祐榮簽約當日致電祐榮叫他放棄，而榮媽因睇唔過眼祐榮一直努力但不獲榮爸認同，一怒之下同榮爸話：「漢江河上將有兩具浮屍，一具係我一具係祐榮。」經威脅下，榮爸先肯讓祐榮加入演藝界。好彩有榮媽臨危不亂諗計說服榮爸， K-pop界先冇損失。
瘦奀奀
初出道時，祐榮又白又奀，個樣仲傻更更同 𠵱家簡直兩個人。
剝衫晒肌
據知祐榮平時每週做 3日 gym，但為拍《 Men’s Health》封面，加碼每週做足 7日 gym，每次 2粒鐘，卒之練到 6嚿腹肌，要突圍，當然要付出啦！
金毛攬女
祐榮首張個人大碟《 23 Male Single》，已於 7月 8日推出。染咗金毛嘅祐榮，早前上《 Mnet 20’s Choice》演唱碟中主打歌〈 Sexy Lady〉時，同 dancer攬實跳辣身舞，超野性！
攻電視劇
今年 solo出碟，其實上年祐榮已踩入電視界，接拍偶像劇《星夢高飛》，劇中祐榮就被小天后 IU暗戀。劇中祐榮只係配角，主角係 2PM隊友澤演同新影帝金秀炫。
吸強國 fans
自上年中開始，祐榮已以個人身份開咗微博，雖然只以韓文報告近況，但至今已吸納近 70萬粉絲。
唱好單飛
2AM趙權打低少時
JYJ俊秀唱出亞洲
留言列表
