close
睇陳可辛响片場指揮拍戲睇得多，拖住兩個小妹妹做湊仔公，罕見！
同你吟一吟
陳可辛父親節變勞動節
陳可辛執導嘅電影《中國合伙人》，國內票房高見五億，有份俾錢投資嘅佢，安樂晒！星期日（六月十六日）父親節，陳可辛輕輕鬆鬆約埋外父夏春秋，同老婆吳君如成家人去數碼港酒樓飲下午茶，一齊慶祝！
三代同堂齊晒人，不過囡囡陳是知似乎唔多鍾意食蝦餃燒賣，扭計要去超市買朱古力，陳可辛做廿四孝老豆，一手拖住囡囡，另一隻手拖住親友嘅女，一齊行去對面超市入貨。
陳導湊女，同湊星一樣耐性十足，兩位小妹妹買完朱古力，又話要買餅，陳可辛照辦。
湊女拍片一樣掂，唔使勞煩吳君如出手，飲茶飲足個幾鐘，埋單走人，冬叔落到樓，全程笑晒，一個父親節，滿足兩個老豆。
去到超市，囡囡陳是知唔夠高攞餅，陳可辛即出手。 
買完餅同薯片都未夠，兩個小妹妹再行去睇糖，陳可辛從後跟到實。 
父親節茶聚，冬叔一家齊人，臨走時，吳君如仲同爸爸傾多兩句先上車。 
撰文：八珍
全站熱搜
留言列表
