Kary Ng黑色喱士併白色領針織上衣$1,080白色併黑格紋長褲$1,580both KOOKAI
cover face
吳雨霏 情不禁
不愧讀國際學校，鬼妹仔性格，笑就笑，不扭怩，不造作；不愧青春少艾，面對事業，試就試，不懼色，不猶疑；不愧年少入行，前途與愛情，博就博，不服輸，不偏頗。
這日子，吳雨霏很多新聞，跟余文樂把臂遊英至今，她一副大方的姿態倒有點叫人不知所措，這年頭，藝人公開戀事，不止不會激怒粉絲，相反，個人正面形象得以提升，真箇時移世易了。
始終女兒家，終日將情郎掛嘴邊，有欠矜持，何況，歌愈唱愈好，形象愈賣愈旺，講太多，盞累事；始終熱戀中，把口唔講，以笑代替吧！我連男方個名都未提起，吳小姐已笑到花枝亂顫，情難自禁若此，作為旁觀者，戥你開心就真！
Profile
Kary Ng
原名：吳家穎
出生日期： 1986年 6月 9日（雙子座）
出生地：香港
身高： 5呎 4吋
體重： 100磅
語言：廣東話、普通話及英語。
簡歷： 15歲，參加叱吒 903的 Clean& Clear手牽
手大行動，被發掘並安排加入 Cookies組合。
04年，另組樂隊 Ping Pung。 06年，開始個人發展。
11年 9月，加入環球唱片旗下的新藝寶唱片至今。
主要作品：《殺她死》、《愛是最大權利》（ 04），《座右銘》（ 06），《逼得太緊》（ 07），《分手要狠》（ 08），《 Here We Are》（ 09），《我本人》（ 11），《告白》（ 12），《就有就有》（ 13）。
微博： http://weibo.com/karyng 
我唔可以冇愛情
26歲女，說出這話，很易理解，只是，今次對手是余文樂……我知我知，余先生外表俊朗，又搵到錢，多年來，即使緋聞不絕，總不能全部當真吧！擇友不靠外表，內在美更重要，在 Kary眼中，愛情來了，甚麼都對。
「好開心？ OK啦！哈哈哈……
「我沒特別收埋（新戀情），拍拖好正常。
「我只鍾意靚仔？唔係啩！哈哈哈……靚有好多定義，自信已經靚，一向自己處理形象，工作前，一定 scan過所有衫，適合至肯著上身，自己都唔舒服，又點靚？寧願別人覺得我煩。
「（到底你係咪鍾意靚仔？）哈哈哈……自己唔覺，第一印象好緊要，靚仔係好，但，睇一個星期、一個月、兩年，又係咁！最緊要大家性格相近，心地好。（對方心地好吸引你？）可以唔問嗎？哈哈哈……
「工作上，我好煩人，任何事情都想參與，包括拍 MV，之前，《告白》跟朋友合作當導演，今次，請佢（余文樂擔任《人非草木》導演）操刀，覺得幾有新鮮感，事前根本沒人估到佢識做。（你滿意作品嗎？）唔答可以嗎？哈哈哈……
「（喜事一件，何需介懷？）我好怕講太多會影響工作，細個時，戀愛大過天，回想起來，好唔抵！唔夠 professional；「感情上，我好獨立，大家一齊時，可以好開心，但也需要個人生活空間，我唔可以冇愛情，不過，又唔會放得好重，兩者若兼顧得好，事業有滿足感，愛情開心，咪 perfect囉！」
11年剛加盟便被安排出席集團高層會議並獻唱，證明深受公司重視，前途無限。《蘋果日報》圖片 
13年MV中，鍾情台灣型男楊佑寧，回到現實，戀上導演余文樂，這算不算一箭雙鵰呢呵？！
想過放棄
理想人生，從來需靠自己打造。數數手指， Kary入行已 11年，年紀輕輕，一派老練口吻， Cookies年代，盲頭烏蠅漫無目的等運到，遇上 Ping Pung，叫好叫座卻空有歌藝，今日，學寫歌學做幕後，捱出頭來的同時，也慨嘆並非免費午餐，原來少女柴娃娃的日子，一點也不娃娃。
「 Cookies時期，好想出碟，但太細個，唔知條路點行。 Ping Pung時，正式接觸唱片製作，出過一張 EP，反應幾好……我都想知點解最後要解散……人太新，冇乜 say，公司拿主意。
「當時，見到同期女仔跑得快，自己日日在家等電話等工作，等足半年，好迷惘，就算可以錄歌，進度行一陣停一陣，意志早被打沉；我個人好急，成日俾壓力自己，『做咗幾年，仲未有糧出？仲未賺到錢？』雖然唔使養家，我都想俾少少心意父母，咁都做唔到，覺得好冇面。
「想過放棄，惟家人叫我堅持，好難呀！
02年誰能一口氣唸出 Cookies各成員名字，你便是如假包換 80後。《蘋果日報》圖片 
04年Ping Pung時期， rock女唱歌總愛聲嘶力竭，好將多年烏氣一叫而盡。《蘋果日報》圖片
「事業前半段，得個『諗』字，有心無力，若再揀一次，寧願遲 2、 3年入行，讀多點書，個人更穩定、更清晰。
「直至準備轉公司，出去跟各人面談，至知自己價值，原來都 OK喎！
「我開始明白，機會要靠自己去爭取，譬如今次爭取寫歌，起初也擔心公司唔接受，但我唔係要做唱作人，純粹想參與 melody創作，寫點自己喜歡的旋律；坦白講，寫情歌或 K歌好易，一晚寫幾條 melody都得，但我唔想再獨沽一味，最後，公司叫我去馬。
「做得到，好比 check list上打多一個剔，超開心；「要是舊公司，他們會問『你得唔得呀？』（環球對你好好？）應該講，依家好難再有公司願意揼本去做碟，好難得；「入到環球，互相信任，對方簽得我，相信我一定 deliver出好作品，又搵最好監製幫我，被重視感覺，梗係好！」
唔係話你假！
Kary曾於加拿大國際學校唸書，總予人番書妹的感覺，性情爽朗，說話中英夾雜，但每遇表達上的骨節位，又能拿揑準繩，盡可能避免不必要的言語誤會，頗健談，原來，早期的她，坦言最憎跟人打交道，做人自我……鬼妹仔囉！
「身處香港，做歌手並不單純，涉及好多人事，坦白講，入行頭幾年，我最唔鍾意搞人際關係，想法好單純，『唱歌之嘛！點解要我去應酬？大家唔使咁熟啦！』人大了，才發現打好關係也非壞事，唔係話你假，只係當作識多一個朋友，依家你幫人，他朝人幫你，圈子細，大家兜個圈又見面；「真係要咁諗。
「我本身對自己唔係好有自信，舊公司時，安於現狀，好少失驚無神走出去跟人打交道，所以，根本唔知道別人眼中，到底吳雨霏係點？！
「 Cookies時代，個個賣青春賣少女，跟自己一心想唱歌理想背道而馳，不停問自己點解？後來又諗清楚，我只得 15歲，梗係賣青春，一班人柴娃娃至有睇頭。
「埋怨只因自己唔知自己想點。
「（其他成員一走出 Cookies，無不雙線發展，你似乎一直樂於唱歌，唔想拍戲嗎？）唔抗拒，做少少都冇壞。
「有時候覺得，多年來，音樂上花盡心思，好想專心經營，依家，公司及自己認為不妨擴闊一點空間，等緊好劇本，返大陸拍劇都唔拘，唔一定做主角，小角色都 OK；「當然，始終想以音樂事業為主。」
後記
Kary Ng白色碎花長袖恤衫$1,280紅色短褲$980藍色高踭鞋$1,480all KOOKAI白色背心金色手鈪及手繩all stylist's own
Kary說得對，人愛比較。
沒得揀，好哋哋，當多過一個選擇，人就身痕。
Kary還說，打從 Cookies開始，已習慣活在比較下，我又覺得，十幾個女仔，兜轉這十年，似乎只得吳小姐一個真正找到自己條路。
難怪她猛說自信自信自信……人沒自信，甚麼都不是。
「我唔會理人點諗。」
事業、愛情自有一套，盡情投下一己賭本，這已算贏了。
KOOKAI金鐘太古廣場 122號鋪 2722 9659
Fratelli Rossetti中環國際金融中心 2079號鋪 2722 9674
撰文：伍淑嫻
形象：黃健華
攝影： Kenji Leung
化妝： Arris Law
髮型： Heibie Mok@Hair Culture
鳴謝： KOOKAI
留言列表
