當晚何哲圖介紹完 Ally後， Ally就主動繑實老闆。咁乖女、又靚女，仲要彈得唱得，好難紅唔起喎！
FBI
謝安琪鍾嘉欣最新師妹 《 FACE》校花謝文欣 5月攻樂壇
上週四（ 20日）星煥國際舉行春茗，當然 full cast晒冷啦！有一姐謝安琪，亦有男神許廷鏗及女神樂瞳等等。不過最大亮點就係老闆何哲圖（ Herman）宣布今年佢哋將力捧 20歲新人謝文欣（ Ally）。
呢位身高 5呎 7吋、個樣有啲似女神鍾嘉欣嘅唱作少女來頭唔小㗎，佢就係 2011年《 FACE》 UStar十強。其實比賽當晚就已經深得星煥老闆何哲圖賞識，覺得佢有才華又有修養，但由於當時 Ally仲讀緊大專，何老闆於是等到佢今年畢業先正式簽。 FBI即刻捉住 Ally訪問幾句，佢話：「已經錄緊歌， 5月就有第一首歌派台。」何哲圖更喺台上大讚 Ally家境好、又謙虛，擺明錫到佢燶，《 FACE》又成功捧出一位超級新星喇！
喺理大讀 fashion and design高級文憑嘅 Ally家境富貴， 2011年拍攝 UStar宣傳片時，佢就喺比華利山屋企自彈自唱，佢仲識作曲同唱開 demo。 
Ally 11年參加 UStar雖然得唔到冠軍，不過就被星煥國際老闆賞識，繼而進軍樂壇，同屆花花（左三）亦簽了 Paco成為女子組合 as one一員，校草冠軍 Kyle（右三）又主演過港台青春劇《 DIY2K》，好掂！ 
跟開容祖兒老師 Christine Samson學唱歌嘅 Ally，上年都去過星煥試音，唱周董首〈黑色幽默〉同欣宜嘅〈愛沒如果〉，難度超高。
星煥一姐謝安琪喺晚宴期間狂派利是，師妹 Super Girls即刻多謝師姐。
全站熱搜
留言列表
