近年一直在內地拍劇的李彩華（Rain），上周五（二日）出席「仁美愛心滿亞洲」慈善晚宴後，高調自爆幾年前有人「要求我做合約以外嘅不道德交易。」惹得全城關注。

剛於周日（四日），她在寰宇國際主席林小明前妻趙雪英的陪同下，接受本刊獨家訪問，巨細無遺詳述當年的一點一滴，指有一晚有人在夜店裏叫她陪一名某城中知名人士出埠兩周，還叫她任意開價，作為身體上有親密接觸的報酬。

周日Rain受訪時表現激動，對於被問價陪出埠，她多次強調自己有腰骨有膊頭：「寧願瞓街都唔做！」

瞓街都唔做

入行十二年的Rain，對本刊憶述這件發生於約○八年至○九年的苦痛經歷，她自言當年是入行後首度遭人提出作不道德交易，「有晚在卡拉OK，現場有公司同事、我細佬、細佬當時女友等，期間有人同我講，先叫我唔好同趙小姐講，跟住叫我做啲合約以外嘅嘢，係啲不道德行為，我當時即刻答『呢啲嘢我唔做』。拒絕咗之後工作量少咗好多，雖然我係家中經濟支柱，但我瞓街都唔會做。」身旁的趙雪英補充說︰「Rain同我講，話有人叫佢出埠兩個星期，叫佢開個價。」

對於不道德交易的含義，是否要身體接觸，Rain解說︰「當然係。呢啲先係不道德行為和交易。（有冇講陪邊個？）有提過個名，但我唔識。」趙雪英謂︰「呢啲唔使畫公仔畫出腸，唔通傾吓偈咩。嗰個人好多人識，報成日見到，但我唔會講。」

當日趙雪英全程陪同Rain接受本刊訪問，Rain多次感謝趙雪英當年借出一百萬元協助解約。

Rain賠錢離開林小明打骰的寰宇，友情不再。圖為07年Rain生日會上，林攬着Rain慶祝。

賠百萬贖身

Rain指當晚拒絕作不道德交易後，回家即向母親哭訴，「我講畀阿媽知時都有喊，佢聽完都有啲激動，我哋咪靜觀其變一排。但見之後嘅工作真係少咗，唔對路，都開始擔心，真係好大鑊，個人又好灰好愁，好擔心前途無晒、演藝事業會玩完。最後決定不如拆合約離開，跟住咪搵B姐（趙小姐暱稱）幫手。」

趙雪英憶述當日Rain母女二人親自上門求助，說︰「我見到Rain眼紅紅，Rain媽就臉紅紅好激動。佢哋將件事講完畀我聽後，仲話想開記者會公開。其實我嗰時响公司都被『架空』咗，又要搞離婚，但都應承咗幫佢，後來仲借咗一百萬畀佢解約。其實我從來都無叫人做嗰啲嘢，我唔賺呢啲錢，相信神會懲罰啲壞人！」最終Rain在一○年三月以一百萬元賠給公司，提早解約。

上周五（二日），Rain和趙雪英一同出席慈善晚宴，Rain自爆當年有人要求她作不道德交易，即成全城熱話。