close
揞名爆
「女強人」躁底大爆發
早幾日媽咪姐同幾個靚太去嘆咖啡，一坐低啫， A太就忍唔住爆：「哎呀，我上個禮拜諗住去食個下午茶啫，點知俾『女強人』嚇鬼死我呀！」咁大件事？但平日喺公仔箱見「女強人」做主持嗰時大方得體，智慧型嚟㗎喎！ A太就話嘞，佢嗰日同老公去咗間 cafe嘆茶，撞啱「女強人」亦喺裏面拍嘢，本來大家各有空間，「無啦啦」仲有明星睇，好 happy啦！之不過，事情就發生喺一向欣賞「女強人」嘅 A生，忍唔住攞個電話出嚟，影咗偶像一張相之後！
說時遲那時快， A生啱啱放低個電話，「女強人」已經衝到佢張枱前面，瞪大對眼大鬧：「你頭先係咪影我相！我見到你影我相呀！」嘩嘩嘩，呢位公仔箱阿姐嗰時個樣直情好似想殺人咁款！雖然平日報紙雜誌都話佢做事嚴謹，但就估唔到只係影張相亦咁大反應，當堂嚇到 A生都呆咗。咁之後點收科呢？ Well， A太話佢老公死都唔認影過相，「女強人」都奈佢唔何，惟有黑晒面咁返埋位拍嘢，然後全程都「 」住 A生囉。
查實無端端被影，確係會唔 like嘅。但「女強人」都做咗 N咁多年公眾人物，有啲嘢，不如睇開啲啦！
全站熱搜
留言列表
