有獎有動力！（設計對白）

老豆梁平是香港茂名市同鄉總會董事，早前傳出種票疑雲，繼而被大起底，在港擁有過千個物業。其愛女樂壇新人梁佑嘉（Abella），憑住大水喉射住，前後提了二百萬俾無綫買節目廣告時段谷人氣，去年尾，更成功攞得無綫「最受歡迎女新人」銅獎、港台及新城女新人獎。
有錢易辦事，梁佑嘉初九請員工食飯，又私下派八萬獎金分給公司同事，再每人一萬蚊大利是，超級識做。

分錢醒同事
上週二晚（一月三十一日初九），梁佑嘉在佐敦金御庭訂了一圍$4,888全包宴，做波士請公司同事食開年飯。
晚上七點半，穿上黑衫短褲的梁佑嘉，在男助手護駕下抵達酒家，由於經理人公司只有王若琦以及梁佑嘉兩個新人，當晚出席的大部分是幕後及公司同事。
開年飯唔算豪，乳豬、鮑魚片都是傳統意頭菜，開席前，梁佑嘉先派一百蚊開工利是，男助手見有記者出現，即時用手遮鏡頭。
食飯期間，梁佑嘉跟同事有講有笑，接近十點才離開，並主動企定給記者拍照。
據知梁佑嘉當初背住父母偷學唱歌三年，一心在樂壇發展，出道第一年即攞到幾個新人獎，成績滿意，即向同事派發年度獎金，以示獎勵。
「Abella冇公主病，同經理人Jonas（林建華）有商有量，食開年飯嘅地點，佢都係揀番喺經理人公司附近就啲同事。
唔好睇嗰晚食嘅菜式好普通，其實Abella好細心，見公司幫佢劈到咁多獎，佢都好識做，私底下攞咗八萬蚊出嚟，當係獎金分俾大家。公司人唔多，會計、A&R、宣傳同助手等，加埋都係得八個人，所以每人都分到成萬蚊。有獎金，食乜都一樣咁開心。」知情者說。

每月六萬買衫
低調冚富貴家底，梁佑嘉平時出入，坐的保母車是價值廿多萬的日產七人車，就算跟同事開完工食飯，大多數都揀普通茶餐廳，但置裝出鏡則例外，貪靚的她買靚衫絕不手軟，每月置裝費平均要六萬。「佢最捨得使就係買衫，如果細心留意，一定睇到佢咁耐以來，冇重複著過每一套衫，就算唔使出鏡，都唔會重複。」老豆大把，梁佑嘉揼本扮靚做好包裝，的確無必要慳住使。

富貴新人
新人想打響知名度，少不免要揼重本宣傳。今時今日做歌手，唔單只要睇得唱得，仲要屋企有米至得，近年確有唔少樂壇富貴新人。

許廷鏗
父親許義鏞是「香港腎臟基金會」副主席，名下擁有五個物業，包括現時居住的大圍湖景花園四千呎獨立屋，物業資產超過八千萬。讀港大牙醫系的許廷鏗，名副其實係少爺仔。

王梓軒
父親王英偉專營房地產投資生意，保守估計身家超過五億，王梓軒所屬的OMF唱片公司亦由王父出錢開設。家底夠厚，甫出道已深得樂易玲歡心，唔少TVB綜藝騷都有份，年初更成功揮低TVB親生仔王祖藍，奪得勁歌總選「年度傑出表現」金獎。

劉子千
樂壇教父劉家昌及前電影女星甄珍寶貝仔，為了栽培劉子千。去年底兩公婆一擲八千萬台幣購入台北淡水河畔豪宅，作為金笸籮的音樂天地，豪宅亦是劉子千成名作《唸你》MV的拍攝場地，用得唔好嘥。 ####


梁佑嘉訂的開年飯，一席$4,888，有乳豬、鮑魚等好意頭菜。


梁佑嘉派利是，在旁的男助手即時用手遮記者鏡頭。

 
食完飯離開酒家，輕鬆好多的梁佑嘉又派利是俾記者，每封五十蚊。




去年出道，梁佑嘉貼二百萬主持了多個節目，其中一個是《Smart遊首爾•梁佑嘉》。

 
梁佑嘉老豆梁平是隱形富豪，在港擁有千多個物業。


在無綫《勁歌》頒獎禮搏到「最受歡迎女新人」銅獎，僅輸俾親生女欣宜及林欣彤，合理。


出鏡衫從來唔重複的梁佑嘉，每次出席《勁歌》，都悉心打扮。（《蘋果日報》圖片）







arrow
arrow
    全站熱搜
    創作者介紹
    創作者 litalife 的頭像
    litalife

    818 娛樂八掛大放送★

    litalife 發表在 痞客邦 留言(0) 人氣()

    E-mail轉寄